Makani 112: Kufwidwa Bwato Ansumbu
LANGA bwato nkobwiile kukunauka! Bwakwamauka. Hena wababona bantu basotokela mumeenda? Bamwi basika kale kutala aalwizi. Hena ooyu ngu Paulu? Atubone cali kumucitikila.
Koyeeya kuti kwamyaka yobilo Paulu wali muntolongo mu Kaisaleya. Kumane walo abamwi basintolongo babikkwa mubwato kuya ku Loma. Nobainda munsi aansumbu ya Kiliti, muwo uubbubbula wabakatazya kapati. Muwo wabbubbula cakuti bantu baalilwa kunyona bwato. Alimwi tabakonzyi kulibona zuba masyikati nizyiba nyenyezi masiku. Limwi kwiinde mazuba manji, ibali mubwato batyompwa akuyeeya kuti tabakonzyi kufwutuka.
Kumane Paulu waimikila wati: ‘Taku muntu naba omwe uulaafwe, pele buyo bwato.’ Masiku mungelo wa Leza waboola akundaambila kuti: ‘Utayoowi Paulu! Weelede kwaakwiima kumpela lya Kaisala muleli wa Loma. Alimwi Leza uya kubafwutula boonse aabo mbomuli limwi.’
Ciindi kaciyanda kusika akati kamasiku mubuzuba bwa 14 kuzwa muwo niwakatalika kubbubbula, bali mubwato batalika kubona kuti meenda ayaciceya. Akaambo kakuyoowa kupwaya mumabwe mumudima, babwiimika bwato kwiinda mukubwaanga aamwi. Buce buyo bacibona icito. Bakwasula bwato kuya acito camuseenga.
Basike afwiifwi acito, bwato bwalipwaya kucilwi camuseenga kumane bwapatila. Eelyo mayuwe atalika kulipwaya kubwato, aboobo bwato bwatalika kukwamauka. Sikalumamba mupati wati: ‘Nywebo nyoonse nomukonzya kusaya amusotoke mulwizi musaye kuya kutala aalwizi. Nywebo nyoonse nomwasyaala amusotoke mubaccilile mubweze zyakwamuka zyabwato mujatilile.’ Oobu mbucaba. Munzila eeyi boonse bantu bali 276 bakali mubwato basika kutala kakunyina wafwa kweelana ambwaakasyomezya mungelo.
Nsumbu eeyi iitwa kuti Melita. Bantu mbaasilubomba kapati, aboobo bababamba kabotu aabo bazwa mubwato. Imuwo nowaleka kubbubbula, Paulu bamukkwezyeka mubwato bumbi bamutola ku Loma.
Milimo 27:1-44; 28:1-14.
Mibuzyo
- Ncinzi cacitika kubwato mbwakkwelede Paulu nobwainda munsi ansumbu ya Kiliti?
- Ncinzi Paulu ncaamba kuli baabo bali mubwato?
- Mbuti bwato mbobwakwamauka?
- Malailile nzi ngaapa sikalumamba mupati, alimwi balibongaye bantu basika kutala kakunyina wafwa?
- Yiitwa buti nsumbu njobaimina, alimwi ncinzi cacitika kuli Paulu imuwo nowaleka kubbubbula?
Mibuzyo aimwi
- Bala Incito 27:1-44.
Mbuti lusyomo lwesu ndotujisi kukusyomeka kwazyilembedwe mu Bbaibbele mboluyuma notubala cibalo calweendo lwa Paulu lwakuya ku Loma? (Inc. 27:16-19, 27-32; Lk. 1:3; 2 Timo. 3:16, 17)
- Bala Incito 28:1-14.
Ikuti bantu batakombi Leza bakucisi ca Melita bakaba alubomba kumwaapositolo Paulu kubikkilizya abasilweendonyina bakafwidwa bwato akuti ‘bakabatambula caluzyalo lwini-lwini,’ ino ncinzi Banakristo ncobeelede kutondezya, alimwi ikapati munzila nzi? (Inc. 28:1, 2; Heb. 13:1, 2; 1 Pita 4:9)
