KITAA! Naguguba an barko! Tikalunod na ito! Nakikita mo ba an mga tawo nga nagkalukso ha tubig? An iba aada na ha baybayon. Hi Pablo ba ito? Aton kitaon kon ano an nahitabo ha iya.

Hinumdumi nga duha ka tuig nga priso hi Pablo ha Cesarea. Katapos, hiya ngan an iba nga mga priso ginpasakay ha barko ngan nagbyahe ngadto ha Roma. Pag-agi nira hirani ha isla han Kreta, nagkaada hin makusog nga bagyo. Makusog gud an hangin salit waray na makontrol han mga tripulante an barko. Ngan masirom bisan kon adlaw, ngan waray mga bitoon kon gab-i. Paglabay hin damu ka adlaw, an ngatanan nga sakay nawad-an na hin paglaom nga matalwas.

Katapos, tinindog hi Pablo ngan nagsiring: ‘Waray bisan usa ha iyo an mamamatay; an barko la an maguguba. Kay kagab-i an usa nga anghel han Dios nagpakita ha akon ngan nagsiring: “Pablo, ayaw kahadlok! Kinahanglan umatubang ka ha Romano nga magmarando nga hi Cesar. Ngan tatalwason han Dios an ngatanan nga kaupod mo ha barko.”’

Ha katutnga han ika-14 ka adlaw na nga pagbinagyo, naobserbahan han mga tripulante nga an tubig nagtitikahababaw! Tungod kay masirom, nahadlok hira nga bumunggo ha mga bato, salit ira iginhulog an mga angkla. Pagkaaga nakakita hira hin baybayon. Nagdesisyon hira nga dumuong hito nga baybayon.

Han hirani na hira ha baybayon, sinanglad an barko ha baras ngan waray na ito makaabante. Katapos, nagtikang ito maguba tungod han dagku nga balod. An opisyal han mga sundalo nagsiring: ‘Kamo nga mag-aram lumangoy, pag-una kamo paglukso ngan paglangoy ngadto ha baybayon. Katapos, an diri maaram lumangoy, sunod ha ira ngan kuha hin mga bahin tikang ha barko basi magamit nga abayan.’ Ito gud an ira ginbuhat. Salit an ngatanan nga 276 ka tawo nga sakay ha barko talwas nga nakaabot ha baybayon, sugad la han iginsaad han anghel.

Ini nga isla tinatawag nga Malta. Buotan gud an mga tawo dinhi, ngan ira ginbuligan an mga sakay ha barko. Han maopay na an panahon, ginpasakay hi Pablo ha lain nga barko ngan gindara ngadto ha Roma.