Tantara 112

Sambo Dobo Tamy Nôsy Araiky

ZAHAVA baka! Sambo io dobo! Raha io nitraisatraisaka! Hitanao olo aby milomaon̈o an̈aty rano io? Sasany efa antety. Paoly io koa ma tan̈aty tao? Alô zahavatsika ino raha nahazo izy.

Alaiva onon̈o fa Paoly nigadra taon̈o aroe ta Kaisaria. Izy ndreky gadra sasany amy zay nahaondran̈a sambo, andeha Roma. Irô koa fa navy narikitry Nôsy Kreta, nisy tsiko nare be. Nare loatra tsiko, ke sambo io tsy voavily eky. Irô tamy zen̈y tsy nahita masoandra matsan̈a, tsy nahita lakintan̈a alin̈y. Koa fa nandeha andra, olo tan̈aty sambo tao efa tsy nan̈anten̈a ho velon̈o eky.

Paoly amy zay nitsangana, nivolan̈a: ‘Atsika tsisy ho maty, fa sambo ty fo ho robaka. Nisy anjelin’ny Zan̈ahary navy taminakahy alin̈y in̈y, nivolan̈a: “Kaza mavozo anao Paoly! Anao tsy maintsy avy amy Kaisara, mpanapaka romanin̈y an̈y. Zan̈ahary hamonjy anao ndreky olo jiaby sambo araiky aminao.” ’

Koa fa sasak’alin̈y, tamy faha-14 andra nampanisy tsiko be in̈y, olo tan̈aty sambo tao nahay fa rano efa nijotsojotso! Irô nandatsaka andrisa, fôtony andra nahiziky, tsao sambo io kon̈o vato. Kiakan’izin̈y, irô nahatazan̈a sisin-dranomasin̈y. Irô nieritreritry han̈adôko sambo an̈y.

Irô amy zay koa fa tsy ela ho avy antety, sambo in̈y kon̈o bongon’ny jia, ke tavela tao. Rano nihetsiky mare, ke nampitraisaka sambo in̈y. Sefon’ny maramila nitaondra gadra aby io nivolan̈a: ‘Zay mahay milomaon̈o, alô milomaon̈o mandeha antety. Zay tavela amy zay man̈araha afaran-drô, mangalà tapaka kakazon’ny sambo, kaza avôsotro.’ Zen̈y edy raha ataon-drô io. Irô jiaby 276 tan̈aty sambo tao tafitsaka velon̈o, miran̈a raha nivolan̈in’anjely in̈y fo.

Malta an̈aran̈a nôsy io. Olo tao tsara fan̈ahy. Irô nikarakara olo jiaby boaka tan̈aty sambo in̈y. Andra amy zay koa fa tsara, Paoly nahaondran̈a sambo hafa, nindesin̈y ta Roma.

Asan’ny Apostoly 27:1-44; 28:1-14.