ALOLE! combo cisimene ni yakusawusya! Cikukasika yipisyayipisya! Ana akwawona ŵandu ŵasumbile m’mesiwo? Ŵane akwawula kumkuli. Ana jwali apojo ali Paulo? Kwende tulole yayiŵele mkumtendecela jwalakweju.

Akumbucile kuti kwa yaka yiŵili Paulo ŵaliji mkayidi ku Kaisaliya. Sambano jwalakwe yimpepe ni akayidi ŵane akwakwesya combo ni kwawulaga nawo ku Loma. Pakupita ciŵandika cilumba ca Kulete, mbungo jamacili jikwaputa. Cimbungoco cikupuga mnope mwati acalumewo ngakukombola kucijongolela combo. Ngakukombola kuliwona lyuŵa musi, atamose ndondwa cilo ngakusiwona. Pambesi pakwe, pali papite masiku gejinji, ŵandu ŵali mu comboco akukayicila naga cakulupuce.

Kaneko Paulo akwima nikuŵeceta kuti: ‘Pangali mwa jemanja jucawe, nambo comboci cicijonasice. Pakuŵa cilo cipiteci lilayika lya Mlungu lyayice kwa une ni lyasasile kuti, “Mkajogopa, Paulo! Cimkajime pameso pa Kayisala jwakulamulila jwa Loma. Soni Mlungu cakulupusye ŵandu wosope ŵamkwenda nawo yimpepe panyasapo.”’

Ciŵandika sikati ja cilo pa lisiku lya 14 citandilile mputowo, ŵakwendesya combowo, atandite kuyiwona kuti mesi gakunandipilanandipila! Ligongo lyakuti akogopa kugunda maganga ciloco, akuponya nangula syawo. Kuli kucele akuciwona ciko. Jemanjaji akuganisya yakuti alinje kwima ni comboco pa cikopo.

Pakuŵandicila mu ngulugulu nyasa comboco cikuputa liwunjili lya msanga, ni cikulepela kwenda. Kaneko matumbela gakutanda kuciputa ni cikutanda kukasikakasika. Jwamkulungwa jwa asilikali akuŵeceta kuti: ‘Wosope ŵampaka akombole ng’ambila asumbile candanda m’nyasamu kuti ang’ambile kwawula kumkuli. Ŵane wosope asumbile pacamalisye jemanjaji, ni akamulile yipisya ya combo kuti akatiŵila.’ Ŵanduwo akutenda yeleyi. Mwakutenda yeleyi ŵandu wosope ŵakwana 276 ŵaŵakwesile comboco akukopocela kumkuli ŵangawulala palipose, mpela mwalyaŵecetele lilayika lila.

Cilumbaco cikukolanjikwa kuti Malita. Ŵandu ŵakwe ali ŵambone mnope, ni akupeleka cikamucisyo kwa ŵandu ŵaŵaliji m’combo ŵala. Mputowo pawutulele, Paulo akumkwesyasoni combo cine kwawula najo ku Loma.