HISTORIA 112
Ralaayibu ló toib isla
¡BIBIʼ gannlo bark reʼ caguichni! ¡Cabílni! ¿Rabilo buñ ni ma noʼ lainy nís la? Tipnésyibu ma cadxin roʼ nisdaʼ. ¿Noʼ Pablo ladyibu la? Guisuidyno xí láani casaclóo Pablo.
Bisednaladx, por chop íz noʼ Pablo press lainy gudx Cesarea. Ór cú raxelyibu Pablo lainy toib bark né tipnés buñ ni noʼ press par tzeyibu gudx Roma. Ma yaaca guidxinyibu isla ni laa Creta, rasaló rac toib buroʼdant nadzuʼpy né nigolú rasisni bark cú. Guirá buñguieeu ni noʼ lainy bark diti labúu raxonyibu láani. Rodzu diti labúu rabíyibu Govitz né gueʼel diti labúu rabíyibu vitzón. Radxiin midid ni ma xidal dzú noyibu lainy nisdaʼ xpensaryibu ma gaityibu.
Ór cú Pablo riás né raiby layibu: Ni toibto gaity, nosi bark reʼ guinitló. Portín goxin reʼ toib ángel xtuny Dios bieed ronoʼya né góoch naʼ: ¡Pablo, diti guidzuibylo! Naplo xi de guidxinlo nisló César buñguieeu ni rony mandary gudx Roma. Né Dios guilaa guirá buñ ni noʼ né looy lainy bark reʼ.
¡Ma godudy catorce dzú de goló gosaló buroʼdant né galaʼ gueʼel de dzureʼ, guirá buñ ni cayony dxiin lainy bark raduidyibu cuent que ló nisdaʼ ronoʼyibu diti guelni. Como ma gueʼel láani radzuibyibu guicá bark reʼ laidy guiee, por ngú rasalyibu lainy nisdaʼ anclas par guicaani bark né diti guixonyni más. Raraa stoib dzúcu rabíyibu roloo nisdaʼ ro nabich. Ragoʼ guicyibu mod tzanéyibu bark cú lagary reʼ.
Órni ma cabigaxyibu roloo nisdaʼ, bark reʼ riaʼisyni laidy tip montón yohx né ragni cú. Ór cú xcuann nisdaʼ rasaló racáni cué bark reʼ né rasaló rabílni. Buñ ni cayaan layibu ni nac buñxirop ni rasanir nisló xidalguixo soldad raiby layibu: Guirá ni labúu rasobló, colguisobló hasta guidxinto roloo nisdaʼ ló yoovich. Stipnésto láaca colguisandop después lainy nís né colguiquiin yac balaʼ xtunyca bark par diti guiguichto. Ngú ni ronyibu, né guirá 276 buñ ni noʼ lainy bark radxiinyibu ro nabich né ralaayibu, mod goní ángel cú.
Isla ro bidxinyibu laani Malta. Buñ ni rabés lagary reʼ nigolú buñtzay layibu, racnéyibu guirá buñ ni bieed lainy bark cú. Órni rabés rac buroʼdant cú, ragoʼyibu Pablo lainy stoib bark né rinéyibu Pablo gudx Roma.
