Maana 113nan

Paul bɛ Romɛ

E KA nɛgɛ jɔlɔkɔ lajɛ Paul bolow la! Romɛka sɔrɔdasikɛ min bɛ k’a kɔlɔsi, e ka o fana lajɛ. Paul ye kasoden ye Romɛ. A bɛ ka makɔnɔni kɛ walisa k’a dɔn Romɛ masakɛ Sesar bɛna min kɛ a la. Mɔgɔw tun bɛ se ka taa bɔ a ye kaso la.

Tile saba o kɔfɛ, Paul nana Romɛ, a ye ci bila Yahutudiinɛ ɲɛmɔgɔw ma u ka na a lajɛ. O la sa, Yahutu minnu bɛ Romɛ dugu kɔnɔ, olu caman nana. Paul ye u waaju Yesu ko la ani Ala ka masaya fana ko la. Dɔw dara a ka kuma la, ka kɛ Krecɛnw ye, nka dɔw ma da o la.

Sɔrɔdasi minnu tun bilala Paul kɔlɔsili kama, Paul ye olu fana waaju. A ye san fila minnu kɛ kaso la, o waati kɔnɔna na, Paul tun bɛ se ka mɔgɔ o mɔgɔ waaju, a ye olu bɛɛ waaju. O cogo la, hali Sesar ka sokɔnɔmɔgɔw ye Masaya kibaru duman mɛn. U dɔw yɛrɛ kɛra Krecɛnw ye.

Nka mɔgɔ min bɛ ka sɛbɛnni kɛ tabali kan, o bɛ se ka kɛ jɔni ye, e fɛ? Timote de don. Timote fana tun donna kaso la bawo a ye waajuli kɛ Masaya ko la. Nka, ale bilala ka bɔ kaso la. A nana yan yɔrɔ la walisa ka Paul dɛmɛ. I b’a dɔn Timote bɛ ka min sɛbɛn wa? An ka o lajɛ ɲɔgɔn fɛ.

Yali i hakili bɛ Filipe ni Efese duguw la maana 110 nan na wa? Paul ye dɛmɛ don walisa Krecɛn jɛkuluw ka sigi o duguw la. K’a to kaso la sisan, Paul bɛ sɛbɛnw ci o yɔrɔ Krecɛnw ma. O sɛbɛnw bɛ Bibulu kɔnɔ. U bɛ wele ko Efesekaw ani Filipekaw. Paul bɛ k’a fɔ Timote ye sisan a ka kan ka min sɛbɛn u teriw ma minnu ye Filipe Krecɛnw ye.

Filipekaw ɲɛna Paul ma kosɛbɛ. U ye nilifɛn ci a ma k’a to kaso la. O kosɔn Paul bɛ ka u waleɲumandɔn o ko la. Epafrodite de nana ni o nilifɛn ye. Nka, Epafrodite banana kosɛbɛ Romɛ fo a tun bɛ ɲini ka sa. A fari fisayara sisan. A bɛ k’a labɛn ka segin ka na so. Ni a bɛna segin Filipe, a bɛna taa ni Paul ni Timote ka lɛtɛrɛw ye a bolo.

 Ka Paul to kaso la, a ye lɛtɛrɛ fila wɛrɛw sɛbɛn. Olu bɛɛ bɛ Bibulu kɔnɔ. Kelen cira Kolose dugu Krecɛnw ma. I b’a dɔn o bɛ wele cogo min na wa? O bɛ wele ko Kolosekaw. A ye tɔ kelen ci a teri kɛrɛnkɛrɛnnen ma min tɔgɔ ko Filemon. Ale fana tun sigilen bɛ Kolose. O lɛtɛrɛ tun bɛ Filemon ka jɔnkɛ kan min tɔgɔ ko Onɛsimɛ.

Onɛsimɛ bolila ka bɔ Filemon fɛ ka na Romɛ. A y’a mɛn tuma min na ko Paul bɛ kaso la o yɔrɔ la, a taara bɔ Paul ye. Paul ye Onɛsime waaju. A ma mɛn Onɛsimɛ fana kɛra Krecɛn ye. Onɛsimɛ nimisara sisan a bolili ko la. I b’a dɔn Paul ye min sɛbɛn Filemon ka lɛtɛrɛ kɔnɔ wa?

Paul y’a ɲini Filemon fɛ a ka yafa Onɛsimɛ ma. A y’a sɛbɛn ko: ‘Ne b’ a kɔsegin i ma. Nka, sisan a tɛ i ka baarakɛden dɔrɔn ye tun dɛ, a ye i balimakɛ ɲuman Krecɛn dɔ de fana ye.’ Onɛsimɛ kɔseginnen Kolose, a taara ni o lɛtɛrɛ fila ye a bolo. Kelen tun ye Kolosekaw ta ye, tɔ kelen tun ye Filemon ta ye. An bɛ se ka miiri Filemon ka nisɔndiya la, a kɛlen k’a dɔn ko a ka baarakɛden kɛra Krecɛn ye.

Paul ye Filipekaw ni Filemon ka lɛtɛrɛw sɛbɛn tuma min na, kibaruya dumanw tun b’a bolo ka lase u ma. Paul y’a sɛbɛn Filipekaw ma ko: ‘Ne bɛ Timote ci aw ma. Nka, ne fana bɛna bɔ aw ye sɔɔni.’ A y’a sɛbɛn Filemon ma ko: ‘Jiginyɔrɔ dɔ labɛn ne ye.’

Paul bilala tuma min na, a taara bɔ a balimakɛw ni a balimamuso Krecɛnw ye yɔrɔ caman na. Nka kɔfɛ, Paul kɛra kasoladen ye kokura Romɛ. A y’a dɔn o tuma na ko u bɛna a faga. O kama, a ye sɛbɛn ci Timote ma, k’a ɲini a fɛ, a k’a teliya ka na. Paul y’a sɛbɛn ko: ‘Ne kɛra kantigi ye Ala fan fɛ. Ala bɛna ne sara.’ San damadɔw o kɔfɛ, Paul fagara, Jerusalɛm fana cira tuguni, nka nin sen in na Romɛkaw fɛ.

Sɛbɛn caman wɛrɛw bɛ sɔrɔ Bibulu kɔnɔ. Jehova Ala ye ciden Yuhana bila a ka Bibulu kitabu labanw sɛbɛn. Jirali kitabu bɛ o sɛbɛnw na. O kitabu bɛ kuma siniko de kan. Min bɛ an ɲɛ sini, an bɛna o ye sisan.

Kɛwalew 28:​16-31; Filepekaw 1:13; 2:​19-30; 4:​18-23; Heburuw 13:23; Filemon 1-25; Kolosekaw 4:​7-9; 2 Timote 4:​7-9.