PAUL kut i thir cikcin le amahcongtu Rom ralkap pakhat hi zoh tuah u! Paul cu Rom ah thongtla a si. Rom siangpahrang Sizar nih amah cu zeitindah tuah awk a si ti bia a chah hlan lo a hngah ko. Thong a tlak lio ahcun, a duh mi paoh amah kha lennak nawl an pek hna.

Rom an phaknak in ni thum hnu ah Paul nih Judah i upa hna kha rak ka tong hna seh tiah a cah hna. Cucaah Rom khua i Judah mi tampi cu a sin ah an ra. Paul nih an sin ah Jesuh le Pathian pennak kong kha a chimh hna. A cheu nih an zumh i Krifa ah an cang, sihmanhsehlaw a dang cu an zum lo.

Paul nih amah a congtu ralkap hna zong kha a chimh ve hna. Cuka i kum hnih chung thongtla in an chiah lio ahcun paul nih a chimh khawh mi hna kip kha phung a chimh tawn hna. Cu ruang ah Sizar innchungkhar mi hna hmanh nih Pennak thawng ṭha cu an theih i, a cheu cu krifa ah an cang.

Sihmanhsehlaw cabuai cung i ca a ṭial lengmang mi, hi a milengpa hi ahodah a si? Nan ruat kho maw? A si, Timote a si. Timote zong Pennak kong a chim caah thong a rak tla ve, asinain a luat ṭhan cang. Cun amah cu Paul bawmh awk ah a ra. Timote nih a ṭial lengmang mi cu zeidah a si nan hngal maw? Zoh tuah u sih.

Tuanbia 110-nak chung i Filip le Efesa khua hna kha nan hngal ti maw? Khi khua hna ahcun Paul nih Krifabu dirh awk ah a rak bawmh hna. Atu cu thong chung i a um lio ah, Paul nih hi Krifa hna sin ah cakuat kha a ṭial. Cu a cakuat hna cu Baibal chung ah an um i annih cu Efesa le Filipi tiah ti an si. Hi cu Paul nih Timote kha Filipi khua chung i an Krifa hawikom hna sin ah ca ṭial awk ah a chimh lio a si.

Filipi mi hna cu Paul cung ah an rak ṭha ngaingai. Hika i thong-inn chung a um lio ah laksawng zong an hun kuat i, cucaah Paul nih annih cu a lawmh hna. Cu an laksawng cu Epafroditas nih a rak put. Sihmanhsehlaw fakpi in a zaw i a thi dengmang. Atu cu a dam deuh ṭhan cang i an khua lei ka tlung ṭhan cang lai a ti. Filipi i a kir tik ah hi Paul le Timote sin in cakuat cu amah nih a phorh lai.

Thong chung a um lio ah Baibal chung i kan ngeih mi cakuat dang pahnih Paul nih a rak ṭial rih. Pakhat cu Kolose khua chung i Krifa hna sin ah a si. Cucu zei an ti dah nan hngal maw? Kolose an ti. A dang pakhat cu Kolose khua chung ah a um ve mi a hawikom ṭha Filimon sin ah a ṭial mi a si. Cu ca chung ahcun Filimon a salpa Onesimas kong a ṭial.

Onesimas cu Filimon sin in a zam i Rom khua a phan. Zeitimaw in Paul cuka i thong a tlaknak kong kha Onesimas nihcun a rak theih ve. A sin ah a rak leng i, Paul nih Onesimas sin ahcun phung a chimh. A rauhhlan ah Onesimas zong cu Krifa Pakhat a hung si ve. Atu cu Onesimas cu a rak zam kha aa ngaichih. Cucaah Filimon sin i a cakuat chung ahcun zeidah Paul nih a rak ṭial nan hngal maw?

Paul nih Filimon cu Onesimas kha ngaihthiam awk ah a nawl. Paul nih: ‘Amah cu na sin ah ka rak in kuat ṭhan. Sihmanhsehlaw amah cu atu ah na salpa lawng a si ti lo. Krifa unau ṭha pakhat zong a si cang,’ tiah a ti. Onesimas nih Kolose khua i a kir tik ah hi ca pahnih cu a phorh hna. Pakhat cu Kolose khua i Krifa pawl caah a si i, a dang pakhat cu Filimon sin ah kuat mi a si. Filimon cu a salpa Krifa pakhat a si cang ti a hngalh tik ah zeitluk in dah aa lawmh hnga ti cu ruat hmanh.

Paul nih Filipi mi hna le Filimon sin i ca a kuat tik hna ah hin lung lawmh awk taktak a si mi thawng ṭha a ngei. Paul nih: ‘Nan sin ah Timote kha ka rak thlah lai. Sihmanhsehlaw keimah zong a rauhhlan ah kan tlawng te hna lai,’ tiah Filipi mi hna cu a ti hna. Cun Filimon sin ahcun: ‘Ka umnak ding ah hmun pakhat in rak ka timhpiak cia,’ tiah a ti.

Paul cu thong chung in a luat tik ah hmun tampi i Krifa unau hna kha a tlawng hna. Sihmanhsehlaw a hnu ah Paul cu Rom khua chung ah thong an thlak ṭhan. Tutan cu an ka thah cang lai ti kha a hngalh. Cucaah Timote sin ah ca a kuat i khulrang in ra zokzok tiah a ti. Paul nih: ‘Pathian sin ah zumhfek tein ka um cang i, Pathian nih laksawng a ka pek lai,’ a ti. Paul an thah hnu kum tlawmpal ah Jerusalem cu hrawh ṭhan a rak si. Atu cu Rom mi hna nih an hrawh cang.

Sihmanhsehlaw Baibal chung ah a dang tampi a um rih. Jehovah Pathian nih lamkaltu Johan kha Biathlam zong tel in Baibal hmanung bik ca hna kha a rak ṭialter. Hi Baibal cauk nih hmailei kong a chim. Atu cu hmailei ah zeidah a tlung lai ti cawng cang tuah u sih.