Paulus wa etwa moRoma
EHUNGI 113
Paulus wa etwa moRoma
OUKETANGA mbu ri ku Paulus mo u munu? Wina pe nomurwe wovita waRoma ngu me mu tjevere. Paulus wa ri omukamburwa moRoma. Eye aa undju kutja Omukesare waRoma ma tye kutja me mu tjiti vi. Eye ngunda a ri omukamburwa, ovandu aave yandjerwa okuyekumuryangera.
Omayuva yetatu kombunda yaindu Paulus tje ya moRoma, eye wa tuma omambo kovanene tjiva wOvajuda ve yekuhakaena na ye. Okutja Ovajuda ovengi mba ri moRoma ve ya. Paulus we ve zuvarisira ohunga na Jesus nOuhona waMukuru. Tjiva va kambura nave rire Ovakriste, nungwari varwe kave kamburire.
Paulus wina wa zuvarisira ovarwe vovita pekepeke mbaave mu tjevere. Ozombura mbari eye nḓa ri omukamburwa, Paulus wa zuvarisira kangamwa auhe eye ngwaa yenene. Komuhingo mbwi, nandarire ovazamumwe vOmukesare va zuva ohunga nombuze ombwa yOuhona, nu tjiva vawo va rira Ovakriste.
Nungwari owaṋi ngo ngwe yekuryangera Paulus nu ngu ma tjangere potjiriro? Mo yenene okuhaka? Omurumendu ngo oTimoteus. Timoteus wina wa ri mondeko mena rokuzuvarisa ohunga nOuhona, nungwari eye wa kuturwa rukwao. Neye we ya mba okuvatera Paulus. Ove mo tjiwa kutja Timoteus aa tjanga tjike? Indjo tu tare.
Ove mo zemburuka ovihuro vyaFilipi na Efesus mEhungi 110? Paulus wa vatera okuuta ozombongo zOvakriste movihuro mbyo. Okutja indu Paulus tja ri mondeko, eye wa tjanga otutuu kOvakriste mba. Otutuu twi tu ri mOmbeibela, nu tu isanewa Ovaefese nOvafilipi. Paulus nambano ma raere Timoteus imbi mbi ma sokutjanga komapanga wawo Ovakriste moFilipi.
Ovafilipi va tjinda Paulus momuano omuwa. Owo va hindira Paulus otjiyandjewa ngunda e ri mondeko, okutja Paulus nambano me ve pe ondangi kotjiyandjewa tjo. Omurumendu ngwa eta otjiyandjewa oEpafroditus. Nungwari eye we yekuvera tjinene nu wa hara okukoka. Okutja kombunda wa kara nawa nu we ri rongera okuyaruka konganda. Eye wa twaerera orutuu ndwi okuza ku Paulus na Timoteus indu tja yaruka koFilipi.
Paulus ngunda a ri mondeko, eye wina wa tjanga otutuu tuvari tu tu ri mOmbeibela. Orutuu rumwe wa tjanga kOvakriste motjihuro tjaKolose. Ove mo tjiwa kutja ru isanewa vi? Oro ru isanewa Ovakolose. Rwarwe orutuu eye ndwa tjanga kepanga re roposengo rena Filemon ngwa turire moKolose wina. Orutuu rwa ri ohunga Onesimus, omukarere waFilemon.
Onesimus wa hena okuza ku Filemon ne ya koRoma. Okutja Onesimus we yekuzuva kutja Paulus wa ri mondeko moRoma. Eye we kemuryangera, nu Paulus we mu zuvarisira. Tjimanga Onesimus wina wa rira Omukriste. Okutja Onesimus wa ri nomuhihamwatima kutja wa hena ku Filemon. Nambano ove mo tjiwa kutja Paulus wa tjanga tjike morutuu rwe ku Filemon?
Paulus wa ningira Filemon kutja ma isire Onesimus. Paulus wa tjanga na tja: ‘Ami me mu tumu ma kotoke kove. Nu nai eye kamukarere woye porwe nungwari eye wina Omukriste omukweṋu.’ Indu Onesimus tja yaruka ku Kolose eye wa twaerera otutuu tuvari twi, rumwe kOvakolose na rwarwe ku Filemon. Ripura kutja Filemon wa ri nenyando pupe ṱa pi okuzuva kutja omukarere we wa rira Omukriste.
Indu Paulus tja tjanga otutuu kOvafilipi na ku Filemon, eye tjiri wa ri nombuze ombwa. Paulus wa raera kOvafilipi a tja: ‘Ami me tumu Timoteus ku eṋe. Nungwari ami me yekumuryangera kombunda kaṱiṱi.’ Nu ku Filemon, eye wa tjanga na tja: ‘Ndji ṱunina oruveze mbi yekukara po.’
Indu Paulus tja kuturwa eye wa kavarura Ovakriste movirongo ovingi. Nungwari kombunda Paulus wa kamburwa rukwao na tuwa mondeko moRoma. Otjikando hi eye aa tjiwa kutja ma zepewa. Okutja eye wa tjanga orutuu ku Timoteus ne mu ningire kutja me ye tjimanga ku ye. Paulus wa tjanga na tja: ‘Ami mba ri omuṱakame ku Mukuru, nu Mukuru me kendjipa ondjambi.’ Ozombura ozonḓiṱi Paulus tja za nokuzepewa, Jerusalem tja nyonwa rukwao, nu otjikando hi tja nyonwa i Ovaroma.
Nungwari mu novingi mOmbeibela. Jehova wa tjangisa omuapostele Johanes omambo omasenina wOmbeibela, ngu ya kamburiramo embo rOmavandururiro. Embo rOmbeibela ndi ri hungira ohunga noruyaveze. Nambano indjeye tu rihonge kutja moruyaveze mamu katjitwa tjike.
Oviungura 28:16-31; Ovafilipi 1:13; 2:19-30; 4:18-23; Ovaheberi 13:23; Filemon 1-25; Ovakolose 4:7-9; 2 Timoteus 4:7-9.
