TAQSIṬ TIS 113

Bulus di temdint n Ṛuma

ARGAZ-​AGI yeţwarzen s snasel d Bulus. Wagi i t-​iɛussen d yiwen uɛsekṛiw aṛumani. Bulus yella d ameḥbus di temdint n Ṛuma, yeţṛaǧu ad iɛeddi zdat n ccṛeɛ n Qayṣer. Di lḥebs ideg yella, ɛemmden-​as a d-​rzun fell-​as lɣaci.

Mi ɛeddan tlata wussan segmi i d-​iwweḍ ɣer temdint n Ṛuma, Bulus iceggeɛ ɣer kra n imeqranen n Wudayen akken a d-​asen a t-​ẓren. Ɣer taggara aṭas n Wudayen n temdint n Ṛuma i d-​iṛuḥen ɣur-​es. Bulus ihdeṛ-​asen ɣef Ɛisa ţ-​ţgelda n Ṛebbi. Kra seg-​sen umnen, uɣalen d imasiḥiyen, ma d wiyaḍ ggumman.

Bulus iberreḥ daɣen i iɛsekṛiwen-​nni i t-​iţɛassan. Iberreḥ ɛamayen di lḥebs-​agi n temdint n Ṛuma i kra n win i d-​yussan a t-​iẓer. Swakka, slan ula d iɛeggalen n wexxam n Qayṣer s lexbaṛ n lxiṛ n Tgelda. Kra seg-​sen uɣalen d imasiḥiyen.

Lameɛna, anwa-​t wergaz-​agi yeţţarun? Tɛeqleḍ-​t? D Timuti. Ula d neţţa rran-​t ɣer lḥebs uqbel a d-​iṛuḥ ɣer dagi axaṭer iberreḥ ɣef Tgelda n Ṛebbi. Asmi i d-​yeffeɣ syenna, yusa-​d ad iɛiwen Bulus di lḥebs-​agi. Teẓriḍ acu akka yeţţaru? D ayen ara nwali.

Tecfiḍ ɣef temdinin n Filibus akk-​d Ifasus i nwala di teqsiṭ 110? Di temdinin-​nni, Bulus yesbedd tijemmuyaɛ timasiḥiyin. Tura yeqsed ihi ad yaru si lḥebs tibṛatin i imasiḥiyen yellan dinna. Nezmer a naf deg Wedlis Iqedsen tibṛatin-​agi yeţţusemman “At Ifasus” akk-​d “At Filibus”. Akken i teţwaliḍ di ţţeswiṛa, Bulus atan yeqqar i Timuti ayen ara yaru i leḥbab-​nsen imasiḥiyen yellan di temdint n Filibus.

At Filibus xedmen leḥsan i Bulus. Ceggɛen-​as tikci ɣer lḥebs. D yiwen wergaz iwumi qqaren Ibafrudit i s-​ţ-​iwwin. Lameɛna yeɣli-​d lehlak iṣeɛben ɣef Ibafrudit-​agi armi qrib yemmut. Acu kan yeḥla, dɣa issewjed iman-​is ad yuɣal s axxam-​is ɣer temdint n Filibus. D neţţa ara yawin yid-​es tabṛaţ-​agi n Bulus d Timuti. Deg-​s, Bulus icekkeṛ At Filibus ɣef lxiṛ i s-​xedmen.

M’akken yella di lḥebs, Bulus yura snat n tebṛatin nniḍen yellan deg Wedlis Iqedsen. Tamezwarut yura-​ţ i imasiḥiyen n temdint n Kulus. Teẓriḍ amek i teţţusemma? At Kulus. Tabṛaţ tis snat yura-​ţ i Filimun, amdakkel-​is ɛzizen i gzedɣen ula d neţţa di temdint n Kulus. Tabṛaţ-​agi teɛna Unizim, aqeddac n Filimun.

Unizim yerwel seg wexxam n Filimun, iṛuḥ ɣer temdint n Ṛuma. Dinna yesla belli Bulus yella di lḥebs, dɣa iṛuḥ a t-​iẓer. Bulus iberreḥ i Unizim i guɣalen s lemɣawla d amasiḥi. Ɣer taggara, Unizim yendem imi gerwel. Teẓriḍ d acu yeḍleb Bulus i Filimun di tebṛaţ-​is?

Bulus iḍleb i Filimun ad isemmeḥ i Unizim. Yura-​yas: ‘Atan ceggɛeɣ-​ak-​t-​in a n-​yuɣal ɣur-​ek. Lameɛna tura d gma-​k amasiḥi n ṣṣeḥ i gella mačči d aqeddac-​ik kan.’ Asmi i guɣal ɣer temdint n Kulus, Unizim yewwi yid-​es snat n tebṛatin-​nni. Yiwet i imasiḥiyen n temdint n Kulus, ma ţ-​ţayeḍ i Filimun. Nezmer a nxayel acḥal i gefṛeḥ Filimun mi t-​yewweḍ lexbaṛ belli yuɣal uqeddac-​is d amasiḥi.

Asmi i gura Bulus i wat Filibus d Filimun, ixebbeṛ-​iten s yiwet n lḥaǧa yessefṛaḥen. Yenna i wat Filibus: ‘Aql-​i ceggɛeɣ-​awen Timuti, yerna qrib a n-​aseɣ ula d nekk ɣur-​wen.’ I Filimun yura: ‘Heggi-​yi taxxamt anda ara qqimeɣ.’

Mi d-​iffeɣ Bulus si lḥebs, yerza ɣef watmaten ţ-​ţyessetmatin-​is imasiḥiyen deg waṭas imukan. Lameɛna, mi gɛedda kra n lweqt, rran-​t daɣen ɣer lḥebs di temdint n Ṛuma. Acu kan tikkelt-​a yeẓra a t-​nɣen. Yura ihi tabṛaţ i Timuti akken a d-​iṛuḥ ɣur-​es s lɛejlan. Bulus yenna-​yas: ‘Qqimeɣ d unṣiḥ zdat n Ṛebbi, neţţa a yi-​ibarek.’ Mi ɛeddan kra n iseggasen segmi i nɣan Bulus, tamdint n Yarucalim teţwanger abrid nniḍen. Lameɛna, tikkelt-​a d lɛeskeṛ n Ṛuma i d ssebba n nnger-​agi.

Deg Wedlis Iqedsen llant diɣen leḥwayeǧ nniḍen. Yahwa Ṛebbi yeḍleb i wemceggeɛ Yuḥenna ad yaru tiktabin tineggura n Wedlis Iqedsen; gar-​asent taktabt n Uweḥḥi. Taktabt-​agi teţmeslay-​aɣ-​d ɣef wayen i d-​iteddun. A nwali tura d acu ara yeḍrun ɣer zdat.

Lecɣal 28:16-31; At Filibus 1:13; 2:19-30; 4:18-23; Iɛebṛaniyen 13:23; Filimun 1-25; At Kulus 4:7-9; 2 Timuti 4:7-9.