LAJ Pablo wank saʼ tzʼalam saʼ li tenamit Roma ut naxkʼul rulaʼ. Jun laj puubʼ nakʼaakʼalenk re. Laj Pablo yook roybʼeeninkil kʼaru tbʼaanuuq re xbʼaan laj Cesar, li awabʼej re Roma.

Ak oxibʼ kutan xwulajik laj Pablo saʼ li tenamit Roma, naq kixtaqla xbʼoqbʼalebʼ laj Judio, li wankebʼ xwankil. Joʼkan naq naabʼalebʼ laj Judio keʼwulak chi rilbʼal laj Pablo. Tojaʼ naq laj Pablo kiʼaatinak chirix li Jesus ut chirix li Xnimajwal Awabʼejilal li Yos. Naabʼalebʼ laj Judio keʼok chi paabʼank ut wankebʼ inkʼaʼ keʼpaabʼank.

Chiru li wiibʼ chihabʼ naq laj Pablo kiwank saʼ tzʼalam kixpuktesi li chaabʼil esilal rehebʼ laj puubʼ li keʼkʼaakʼalenk re ut rehebʼ chixjunil li keʼwulak chi rilbʼal. Joʼkan naq ebʼ li wankebʼ saʼ li rochoch li awabʼej keʼrabʼi ajwiʼ resil li chaabʼil esilal ut wank keʼok chi paabʼank.

Ani li winq wank rikʼin laj Pablo ut yook chi tzʼiibʼak? Aʼan laj Timoteo. Laj Timoteo kiwank ajwiʼ saʼ tzʼalam xbʼaan xpuktesinkil li chaabʼil esilal. Anaqwan kichalk xtenqʼankil laj Pablo. Ma nakaanaw kʼaru yook xtzʼiibʼankil laj Timoteo?

Saʼ li tzolom 110 xooʼaatinak chirix li tenamit Filipos ut Efeso. Saʼebʼ li tenamit aʼin, laj Pablo kitenqʼank re xaqabʼankil ebʼ li chʼuut. Anaqwan naq laj Pablo wank saʼ tzʼalam kixtzʼiibʼa ebʼ li hu choʼq rehebʼ laj paabʼanel aʼin. Ebʼ li hu Efesios ut Filipenses wankebʼ saʼ li Santil Hu. Laj Pablo kixye re laj Timoteo kʼaru tixtzʼiibʼa rehebʼ laj Filipos.

Ebʼ laj Filipos chaabʼilebʼ rikʼin laj Pablo. Keʼxtaqla jun xmaatan chirix laj Epafrodito. Laj Epafrodito kinimank xyajel, joʼkan naq kachʼin chik ma kikamk. Ut naq kikʼira, kisutqʼiik Filipos, saʼ li xtenamit ut kixkʼam li xhu laj Pablo, li kixtzʼiibʼa laj Timoteo. Saʼ li hu aʼin laj Pablo kixbʼanyoxi ajwiʼ li maatan li kitaqlaak re.

Toj wank saʼ tzʼalam laj Pablo naq kixtzʼiibʼa wiibʼ chik li hu li wank saʼ li Santil Hu. Jun rehebʼ li hu aʼin, choʼq rehebʼ laj paabʼanel re li tenamit Colosas. Ma nakaanaw chanru xkʼabʼaʼ li tasal hu? Colosenses xkʼabʼaʼ. Ut li jun chik hu choʼq re laj Filemon, li ramiiw re Colosas. Li hu naʼaatinak chirix laj Onesimo, li xmoos laj Filemon.

Laj Onesimo kiʼelelik chiru laj Filemon ut kiwulak Roma. Naq kixnaw naq wank laj Pablo saʼ tzʼalam kiwulak chi rilbʼal. Aran naq laj Pablo kixye li chaabʼil esilal re laj Onesimo. Joʼkan naq laj Onesimo saʼ junpaat kiʼok chi paabʼank. Ut kixkʼe reetal naq moko us ta naq kiʼelelik chiru laj Filemon. Ma nakaanaw kʼaru kixtaqla xyeebʼal laj Pablo re laj Filemon?

Kixtaqla xyeebʼal naq tixkuy xmaak laj Onesimo. Joʼkan naq kixtzʼiibʼa aʼin: ‹Tintaqla wiʼ chik aawe laj Onesimo. Abʼan moko kaʼaj ta chik choʼq aamoos. Anaqwan aawech aj paabʼanel›. Naq laj Onesimo xko Colosas, kixkʼam chirix li wiibʼ chi hu aʼin: jun choʼq rehebʼ laj Colosenses ut li jun chik choʼq re laj Filemon. Kʼajoʼ tana kisahoʼk saʼ xchʼool laj Filemon naq kixnaw naq laj Onesimo, li xmoos, aj paabʼanel chik!

Junes chaabʼil esil kixtaqla laj Pablo rehebʼ laj Filipenses ut re laj Filemon. Kixtaqla xyeebʼal rehebʼ laj Filipenses: ‹Tintaqla eere laj Timoteo ut moqon wanqin ajwiʼ eerikʼin›. Ut kixtaqla xyeebʼal re laj Filemon: ‹Tyiibʼ innaʼaj, xbʼaan naq tinkanaaq saʼ laawochoch›.

Naq kiʼelk saʼ tzʼalam laj Pablo, xko rilbʼal chaq ebʼ li rech aj paabʼanel li wankebʼ saʼ jalan jalanq chi naʼaj. Naq kiʼok wiʼ chik saʼ tzʼalam saʼ li tenamit Roma, laj Pablo naxnaw naq teʼxkamsi. Joʼkan naq laj Pablo kixtaqla jun li esil hu re laj Timoteo re naq tchalq saʼ junpaat chi rilbʼal ut kixye: ‹Tiik inchʼool chiru li Yos ut aʼan t-osobʼtesinq we›. Moko najt ta xkamik laj Pablo naq keʼxjukʼ wiʼ chik li tenamit Jerusalen, abʼan anaqwan ebʼ laj Roma keʼbʼaanunk re.

Ak kamenaq chik laj Pablo naq li Jehobʼa kixbʼaanu naq li Apostol Juan tixtzʼiibʼa jalan chik ebʼ li tasal hu, jun rehebʼ aʼan li Apocalipsis. Li tasal hu Apocalipsis naʼaatinak chirix li kutan chaalel. Toj tqatzol chanru tkʼulmanq aʼin.