TALA mefano olo eshi Paulus a mangwa nomalyenge noku li mepashukilo lomukwaita Omuroma! Paulus okwa kala a idililwa modolongo muRoma. Okwa li e na okukala modolongo a teelela oku ke lipopila koshipala shOmukesari waRoma. Pefimbo olo Paulus a kala modolongo, ovanhu ova li va pitikwa va kale have mu talele po.

Konima yomafiku atatu okudja eshi Paulus a fika muRoma, okwa li a tuma elaka kovawiliki velongelokalunga lOshijuda ve uye kuye. Oshidjemo, Ovajuda vahapu vomuRoma ova li ve uya kuye. Paulus okwa li e va udifila shi na sha naJesus nosho yo Ouhamba waKalunga. Onghee hano, Ovajuda vamwe ova li va ninga Ovakriste, ndele vamwe kava li va itavela.

Paulus okwa li yo a udifila ovakwaita ve lili noku lili ovo va li have uya oku mu pashukila. Paulus okwa kala a idililwa modolongo muRoma oule womido mbali nokwa kala ta udifa pomhito keshe a mona. Oshidjemo, nokuli noilyo youkwaneumbo wOmukesari oya li ya uda onghundana iwa yOuhamba, navamwe vomuvo ova li va ninga Ovakriste.

Ndele mbela omutalelipo oo ta shangele onhumwafo koshitaafula oye lyelye? Oto dulu okutengeneka kutya edina laye olyelye? Heeno, oTimoteus. Timoteus naye okwa li a tulwa modolongo omolwokuudifa Ouhamba, ndele pomhito opo okwa hangwa a mangululwa mo. Ngaho okwa li ashike e uya okukwafela Paulus. Mbela ou shi shii kutya Timoteus ota shange shike? Natu ka taleni kutya oshike.

Mbela oto dimbuluka oilando imwe oyo twa li twe lihonga mehokololo 110? Shimwe oFilippi, shikwao oEfeso. Paulus okwa li a kwafela mokutota po omaongalo opaKriste moilando oyo. Onghee hano, okwa li ta shangele Ovakriste vomomaongalo oo eenhumwafo fimbo e li modolongo. Eenhumwafo odo otadi hangwa mOmbibeli nohadi ifanwa Ovaefeso nosho yo Ovafilippi. Paulus ota lombwele Timoteus a shange oinima oyo a hala okulombwela Ovakriste ovaholike vomuFilippi.

Ovafilippi ova li hava ungaunga naPaulus nombili. Ova li yo have mu tumine eeshali eshi a li modolongo. Onghee hano, Paulus okwa li te va pandula omolwoinima aishe oyo. Epafroditus oye a li a eta eeshali daPaulus. Ndele okwa li a kwatwa koudu nokwa li ta yahama neenghono hanga a fya. Lao linene, okwa ka veluka nokwa li e lilongekida okushuna keumbo. Epafroditus oye a li e na okutwaalela onhumwafo oyo ya dja kuPaulus naTimoteus eshi ta shuna kuFilippi.

Fimbo Paulus e li modolongo okwa li a shanga natango eenhumwafo mbali odo di li yo mOmbibeli. Imwe okwa li e i shangela Ovakriste vomoshilando shaKolossi. Mbela ou shi shii kutya ohai ifanwa shike? Ohai ifanwa Ovakolossi. Onhumwafo imwe okwa li ei shangela kaume kaye kopofingo wedina Filemon oo a li ha kala yo muKolossi. Onhumwafo oyo oya li tai popi shi na sha naOnesimus omupiya waFilemon.

Onesimus okwa li a faduka po omwene waye Filemon, ndele ta i kuRoma. Ndele Onesimus okwa ka uda kutya Paulus oku li modolongo muRoma. Onghee hano, okwa li a ya kuye e ke mu talele po na Paulus okwa li e mu udifila. Diva, Onesimus naye okwa li a ninga Omukriste. Hauxuuninwa, okwa li e udite nai eshi a faduka po Filemon. Mbela ou shi shii kutya Paulus okwa li a shanga mo shike monhumwafo yaFilemon?

Paulus okwa li a pula Filemon a dimine po Onesimus. Paulus okwa li a shangela Filemon a ti: ‘Ame ohandi mu shunifa kwoove. Paife ke fi ashike omupiya woye, ndelenee omumwaxo omuholike.’ Eshi Onesimus a shuna kuKolossi, okwa li a twaalela eenhumwafo odo mbali, imwe oya shangelwa Ovakolossi naimwe oya Filemon. Filemon ka li tuu a hafa eshi a li a uda kutya omupiya waye okwa ninga Omukriste!

Eshi Paulus a shangela Ovafilippi nosho yo Filemon, okwa li e va lombwela onghundana iwa shili. Okwa li a lombwela Ovafilippi a ti: ‘Ohandi mu tumine Timoteus, ndele naame ohandi ke uya yo kunye ndi mu talele po oule wokafimbo.’ Okwa li yo a shangela Filemon a ti: ‘Longekidile nge onhele meumbo loye.’

Konima eshi Paulus a mangululwa modolongo, okwa li a talela po ovamwaxe Ovakriste keenhele dihapu. Ndele lwanima, natango Paulus okwa ka tulwa modolongo muRoma. Pomhito oyo okwa li e shi shii kutya ota ka dipawa. Onghee hano, okwa li a shangela Timoteus onhumwafo nokwe mu pula e uye kuye meendelelo. Paulus okwa shanga a ti: ‘Onda kala omudiinini kuKalunga nota ka pa nge ondjabi.’ Konima yomido dinini okudja eshi Paulus a dipawa, Jerusalem osha ka hanaunwa po vali. Pomhito oyo, osha li sha hanaunwa po kOvaroma.

Ndele Jehova Kalunga okwa li a longifa omuyapostoli Johannes a shange natango omambo axuuninwa Ombibeli, mwa kwatelwa embo lEhololo. Embo olo lEhololo otali tu lombwele shi na sha noiningwanima yomonakwiiwa. Natu ka taleni moshitukulwa tashi landula kutya oshike tashi ka ningwa po monakwiiwa.