AKIMONA minyololo yo bamukashile Paulo, kabiji mona ne mushilikale wa bena Loma ubena kumusopa. Paulo wajinga kaili mu Loma. Wapembejilenga kumuchibila mambo kwi Kesala wa bena Loma. Byo akijinga kaili, bantu bebaswishishe kwiya na kumupempula.

Byo papichile moba asatu kufuma pafikijile Paulo ku Loma, watumine jiwi kuba’mba bantangi bamo ba Bayudea bakaye na kumumonapo. Kino kyalengejile Bayudea bavula ba mu Loma kwiya na kumumona. Paulo wibasapwijile pe Yesu ne pa bufumu bwa Lesa. Bamo baitabijile ne kwikala ke bena Kilishitu, bino bakwabo kechi baitabijile ne.

Kabiji Paulo wasapwijile ne ku bashilikale bavula bamusopelenga. Pa myaka ibiji yo ajinga kaili, Paulo wasapwijile ku yense ye akonsheshe kwamba nanji. Kino kyalengejile ba mu nzubo ya kwa Kesala kumvwa mambo awama a Bufumu, kabiji bamo baikele ke bena Kilishitu.

Pano nga awe mwenyi waikala ku tebulu na kunemba ye ñanyi? Abya wakonsha kweseka kumutongola jizhina nyi? Ee, wajinga Timoti. Timoti naye bamukashilepo mu kaleya na mambo a kusapwila mambo a Bufumu, bino babwelele bamukasulula. Kabiji waishile na kukwashako Paulo. Nanchi wayuka byo abena kunemba Timoti nyi? Twaya tumone.

Abya ukivuluka mizhi ya mu Filipai ne Efisesa yaambiwapo mu Jishimikila nambala 110 nyi? Paulo wakwashishe kutendekesha bipwilo bya bwina Kilishitu mu yoya mizhi. Pano byo ajinga mu kaleya, Paulo wanembejile bano bena Kilishitu makalata. Ano makalata aji mu Baibolo, kabiji atelwa’mba Efisesa ne Filipai. Paulo wabujilenga Timoti bya kunembela bena Kilishitu ba ku Filipai.

Bena Filipai bamulamine bingi bulongo Paulo. Bamutumijile bya bupe mu kaleya, kabiji Paulo wibasanchijile bingi. Epafolodita ye mwanamulume waletele byobya bya bupe. Bino wakolelwe bingi pepi na kufwa. Pano wakosele ne kwinengezha kuya jibiji ku muzhi wanji. Ye wasendele nkalata yanembele Paulo ne Timoti pa kubwela ku Filipai.

Paulo byo akijinga mu kaleya, wanembele makalata akwabo abiji aji mu Baibolo. Nkalata imo yanembejilwe bena Kilishitu ba mu Kolose. Nanchi wayuka byo itelwa nyi? Itelwa’mba Kolose. Nkalata ikwabo yanembejilwe mulunda wa kine kine, aye Filemonyi waikalanga mu Kolose. Ino nkalata yaambilenga pa kalume wa kwa Filemonyi aye Onesimusa.

Onesimusa wanyemene kufuma kwi Filemonyi ne kuya ku Loma. Byo afikile ku Loma po po ayukile amba Paulo bamukasa. Onkao mambo, wayile na kumumona, kabiji Paulo wamusapwijile. Palutwe kacheche Onesimusa naye waikele mwina Kilishitu. Pano Onesimusa waumvwine bibi kuba’mba wanyemene. Nanchi wayuka Paulo byo anembele mu nkalata kwi Filemonyi nyi?

Paulo wamubujile Filemonyi amba amulekeleko mambo Onesimusa. Paulo wanembele’mba: ‘Mbena kumubwezha aye mwine ko muji. Pano kechi pamo nobe kalume ne, ke mulongo mutemwe.’ Onesimusa byo abwelele ku Kolose, wasendele ano makalata abiji, imo ku bena Kolose, kabiji ikwabo kwi Filemonyi. Filemonyi watemenwe bingi pa kumvwa amba kalume wanji waikala ke mwina Kilishitu.

Paulo byo anembejile bena Filipai ne Filemonyi, wanembele mambo awama. Paulo waambijile bena Filipai amba: ‘Mbena kutuma Timoti kwi anweba. Ne amiwa mwine nsakukeya palutwe kacheche.’ Kabiji Filemonyi wamunembejile’mba: ‘Nengezhai mwakufikila amiwa.’

Paulo byo bamukasulwile mu kaleya wapempwile balongo ne banyenga yanji bena Kilishitu ku mapunzha avula bingi. Bino babwelele bamukasa ke kaili jibiji mu Loma. Pa kikye kimye wayukile amba basakumwipaya. Onkao mambo, wanembejile Timoti ne kumulomba amba apelawizhe kwiya. Paulo wanembele’mba: ‘Nabalamenga lwitabilo kwi Lesa, kabiji Lesa ukampa munchinya.’ Byo papichile myaka icheche kufuma po bamwipayijile Paulo, Yelusalema bamonawine jibiji ku bena Loma.

Pano bino mu Baibolo muji byavula. Yehoba Lesa wamukwashishe mutumwa Yoano kunemba mabuku apelako, kubikakotu ne buku wa Lumwekesho. Uno buku wa mu Baibolo waamba pa bya kulutwe. Pano twaya tufunde pa byo kikekala kulutwe.