NUAWƆ se yɔlɔŋ nda baa Pɔɔl o ba woŋ. O biyɔɔ niŋ Pɔɔl cho Luom naŋ ni. Sowɛinɔ maLuomaŋndo cho ndu ikɛi yɔŋ o nyaanuŋ. Pɔɔl cho o chumndo niŋ le mbo tuei nyɛ masa bɛndu Luomaŋnda cho kɛɛsiaa le ndu tosallo. Teleŋ o cho hoo o biyɔɔ niŋndo, ma chɛl mi waŋnda hiŋ ndu yilɔɔ.

Mɛɛ palɛi hiou iyaa o fuuluu Pɔɔllo Luom, mbo yɔŋ yooŋgoo le mi simlachiaa Chuuwa huŋ yil ndu. Okoŋ, mi Chuuwaa bɔɔ bɔɔ huŋ naa Pɔɔl cha. Mi Pɔɔl dimul nda yooŋgu kɛndɔɔ a Chiisu okɔɔ vɛlɛa masale Mɛlɛkaleŋ. Mi apum laalaŋ ma simnuŋ Kilisiɔŋnda. Kɛ apum laalaŋ te.

Sowɛiyaa nda kɛsi le ma wa Pɔɔl lehɔlla bɛɛ, mbo dimul nda suɛi Mɛlɛkɛi. Le wɔsila tiɔɔŋnda Pɔɔl wa laŋ o biyɔɔ niŋndaŋ, mbo dimul wanaa bɔɔ bɔɔ suɛi Mɛlɛkɛi. Wanaa wa wallo Siisa o ba bɛŋgu wa bɛɛ, mi Pɔɔl dimul nda yooŋgu kɛndɔɔ a masale Mɛlɛkaleŋ okɔɔ. Mi apum simnuŋ Kilisiɔŋnda.

Kɛ nɛɛ cho yɛ wana yilaa chal hoo poonyiaa o tibiiyo choo wo? A nɔla ma chɔm wana o cho wo? Timotii ni. Timotii bɛɛ ma duau ndu o chiɛi manyumndo niŋ le mɛɛ o wa suɛi Mɛlɛkɛi dimio yɛ. Kɛ o sɔla vɛlɛ malɔɔ. Le Pɔɔl malaa o hiŋ naŋ ni. A sina pa nyɛ Timotii cho hoo poonyiaa wo? Ŋ nuaŋnuŋndɔ.

A loonuŋ pa Filipai nda Ɛfisɔɔ o Bundɛi 110 niŋ? Pɔɔl kila kundala le Kilisiɔŋndaŋ o chieeŋ muŋ niŋ ni. Teleŋ o wa o chiɛi manyumndo niŋndo, mbo poonyiaa yaulaŋ o Kilisiɔŋnda haa lo. Yaulaŋndaŋ la cho o Baabuiyo niŋ. A veelu laŋ aa Ɛfisiaŋnda a Filipiaŋnda. Pɔɔl cho niko Timotii dimullo nyɛ o nɔ mbo poonyiaa o chaaŋaa nduaa laalaŋaa cho Filipai chiee wa lo.

Filipiaŋnda wa bɔɔ wanaa kɛndɛ naa Pɔɔl cha. Teleŋ o wa o chiɛi manyumndo niŋndo, ma yɔŋ ndu nyɔŋ tau. Mɛɛ balika koŋ Pɔɔl cho nda hoo mello ni. Ɛpafulodaitɔɔ hiŋ a nyɔŋ muŋ naa Pɔɔl cha ni. Kɛ mbo huŋ naa tau, ndoo lo chobe mi ndoo vi. O seŋgu vɛlɛ nduyɛ o yeema mbo miiŋgu Filipai chiee. Ɛpafulodaitɔɔ cho yaulaŋndaŋ biyɔɔ Pɔɔl o ba mbo kuɛ a laŋ Filipai. Nduyɛ, Ɛpafulodaitɔɔ nda Timotii nɔ le miiŋgoo Filipai ni.

Mi Pɔɔl poonyiaa vɛlɛ yaulaŋ la tiɔɔŋ la naŋ nɔ o Baabuiyo niŋndaŋ. Teleŋ o wa o chiɛi manyumndo niŋndo o poonyiaa laŋ ni. Mbo yɔŋ o pilɛ o Kilisiɔŋnda lo Koloose chiee. A sina pa mɛɛ nda veelu yauwo hoo yɛ? A veelu ndu aa Kolosiaŋnda. O pilɔɔ naa Filɛmɔŋ chaaŋ ndɔ cha o poonyiaa ndu ni. Koloose Filɛmɔŋ wa ichali ni. A Onisimɔɔ okɔɔ Pɔɔl poonyial Filɛmɔŋ yauwo hoo ni. Onisimɔɔ yɛ, chɛ Filɛmɔŋndo o wa ni.

Paale pilɛ, mi Onisimɔɔ chimbu Filɛmɔŋ o ba mbo huŋnuŋ Luom. Loŋ o huŋ tuei ni maa Pɔɔl cho o chiɛi manyumndo niŋ. Mɛɛ o hiŋ Pɔɔl yilɔɔ naa o cho o biyɔɔ niŋnda, mi Pɔɔl dimul ndu suɛi Mɛlɛkɛi. Chɔ chɔ, mi Onisimɔɔ bɛɛ simnuŋ Kilisiɔŋnɔɔ. Mɛɛ mi Onisimɔɔ kial suei le mɛɛ o chimbu yɛ. A sina pa nyɛ Pɔɔl Poonyial Filɛmɔŋ o yauwo hoo niŋndo?

Pɔɔl nyɔɔlu Filɛmɔŋ le mbo mal Onisimɔɔ haki. Mi Pɔɔl poonyiaa aa: ‘I cho ndu miŋgioo naa num cha. Kɛ o cho lɛ ko chɛ num te pa. Chaaŋ num Kilisiɔŋnɔ kɛndɛ kɛndɛ o cho niŋ vɛlɛ ni.’ Mɛɛ Onisimɔɔ wa miiŋgoo Koloose, mbo kua a yaula tiɔɔŋndaŋ ndaŋ. O pilɛ le Kolosiaŋnda, o pilɔɔ le Filɛmɔŋ. Ŋ yiyaŋndɔ niko mɛɛ Filɛmɔŋ wa a kɔlkɛndɛ yɛ mɛɛ o sina maa chɛ ndɔɔ simnuŋ Kilisiɔŋnɔɔ.

Mɛɛ Pɔɔl poonyial Filipiaŋnda a Filɛmɔŋ, mbo dimul nda yooŋgu kɛndɔɔ. Mbo poonyial Filipiaŋnda aa: ‘I cho Timotii viomɔɔ naa nya cha. Kɛ ya pila bɛɛ, I cho nya hunɔɔ yilɔɔ suŋ suŋ.’ Mbo poonyial Filɛmɔŋ aa: ‘Toosiaa pɔɔ yiyaa le ya. Num o bɛŋgu choo ya cho hunɔɔ wa ni.’

Mɛɛ nda mal Pɔɔl, mbo balu puaa pilla a nde pilla yilɔɔ silɔ o fondaŋ nda bɔɔ bɔɔ. Kɛ mɛɛ nyɔɔ viou kpɛɛ, ma bii vɛlɛ Pɔɔl ma duau ndu o chiɛi manyumndo niŋ Luom. O laŋ niŋ, mbo sina kɛsɛ kɛsɛ maa a nɔ le ndu diyɔɔ. Lelaŋ, mbo poonyial Timotii maa o huŋndɔ chɔ chɔ. Mi Pɔɔl poonyiaa aa: ‘I loo laalaŋndo choo o Mɛlɛka niŋ, lelaŋ Mɛlɛka cho ya paawaa ke le laalaŋ nuu.’ Mɛɛ wɔsioŋ hiou ŋtiŋ o piɔm Pɔɔllo kɔɔli, mi Chulusalɛm sɔla vɛlɛ tambei. Luomaŋnda tɛɛmbuu ndu niŋ o laŋ ni.

Kɛ sɔɔŋ cho tau o Baabuiyo niŋ. Kiilanɔɔ Chɔŋ Mɛlɛka Jɛhowa dimul ni mbo poonyiaa yaula mɛɛlaa laŋ kpɔŋ o Baabuiyo niŋ. Chɔŋ koni poonyiaa vɛlɛ Sɔɔŋ Chɔɔmaŋndoŋ ni. A chilaŋ okɔɔ yauwo hoo soo ni. Ŋ pɛɛkuŋ niko a siɔdii lachioo okɔɔ.