ໂປໂລໃນນະຄອນໂລມ
ບົດ 113
ໂປໂລໃນນະຄອນໂລມ
ເບິ່ງໂຊ້ທີ່ເຂົາໃຊ້ລ່າມໂປໂລແດ່ ແລະເບິ່ງທະຫານໂລມເຝົ້າຍາມເພິ່ນ. ໂປໂລເປັນນັກໂທດຢູ່ໃນນະຄອນໂລມ. ເພິ່ນພວມລໍຖ້າຈົນກວ່າເຊຊາຜູ້ປົກຄອງແຫ່ງນະຄອນໂລມຈະຕັດສິນວ່າຈະເຮັດຢ່າງໃດກັບເພິ່ນ. ຂະນະທີ່ເປັນນັກໂທດຢູ່ ປະຊາຊົນໄດ້ຮັບການອະນຸຍາດໃຫ້ເຂົ້າຢາມເພິ່ນໄດ້.
ສາມມື້ຫຼັງຈາກໂປໂລມາເຖິງນະຄອນໂລມ ເພິ່ນສົ່ງຂ່າວໄປຍັງຫົວໜ້າຂອງພວກຍິວບາງຄົນເຊີນໃຫ້ມາພົບເພິ່ນ. ຜົນກໍ່ຄືຊາວຍິວຫຼາຍຄົນໃນນະຄອນໂລມພາກັນມາ. ໂປໂລປະກາດແກ່ເຂົາກ່ຽວກັບພະເຍຊູແລະລາຊະອານາຈັກຂອງພະເຈົ້າ. ບາງຄົນກໍ່ເຊື່ອຖືແລະເຂົ້າມາເປັນຄລິດສະຕຽນ ແຕ່ສ່ວນຄົນອື່ນບໍ່ເຊື່ອ.
ໂປໂລຍັງປະກາດແກ່ພວກທະຫານແຕ່ລະຄົນທີ່ມີໜ້າທີ່ຄວບຄຸມເພິ່ນນັ້ນດ້ວຍ. ໂປໂລປະກາດແກ່ທຸກຄົນເທົ່າທີ່ເຮັດໄດ້ເປັນເວລາສອງປີທີ່ເປັນນັກໂທດຢູ່ທີ່ນີ້. ຜົນກໍ່ຄື ແມ່ນແຕ່ຜູ້ຄົນຢູ່ໃນລາຊະສຳນັກຂອງກະສັດເຊຊາກໍ່ໄດ້ຍິນຂ່າວດີກ່ຽວກັບລາຊະອານາຈັກ ແລະບາງຄົນໄດ້ເຂົ້າມາເປັນຄລິດສະຕຽນ.
ແຕ່ຄົນມາຢາມຜູ້ນີ້ຊຶ່ງພວມຂຽນໜັງສືຢູ່ທີ່ໂຕ໊ະແມ່ນໃຜ? ເຈົ້າເດົາໄດ້ບໍ? ເປັນຕີໂມເຕນັ້ນເອງ. ຕີໂມເຕເຄີຍຢູ່ໃນຄຸກຄືກັນເພາະການປະກາດເລື່ອງລາຊະອານາຈັກ ແຕ່ເຂົາມີອິດສະຫຼະອີກເທື່ອນຶ່ງ. ແລະເຂົາມາທີ່ນີ້ເພື່ອຊ່ວຍໂປໂລ. ຕີໂມເຕພວມຂຽນຫຍັງເຈົ້າຮູ້ບໍ? ໃຫ້ເຮົາເບິ່ງຕໍ່ໄປ.
ເຈົ້າຈື່ເມືອງຟີລິບປີຫຼືຟີລິບແລະເມືອງເອເຟດໃນເລື່ອງໜ້າ 110 ໄດ້ບໍ? ໂປໂລໄດ້ຊ່ວຍຕັ້ງປະຊາຄົມຄລິດສະຕຽນໃນເມືອງເຫຼົ່ານີ້. ຕອນນີ້ຂະນະທີ່ເພິ່ນຢູ່ໃນຄຸກ ໂປໂລຂຽນຈົດໝາຍເຖິງຊົນຄລິດສະຕຽນທີ່ນັ້ນ. ຈົດໝາຍເຫຼົ່ານີ້ຢູ່ໃນຄຳພີໄບເບິນ. ແລະຈົດໝາຍເຫຼົ່ານີ້ຖືກເອີ້ນວ່າເອເຟດແລະຟີລິບ. ຕອນນີ້ໂປໂລພວມບອກຂໍ້ຄວາມໃຫ້ຕີໂມເຕຂຽນເຖິງເພື່ອນຄລິດສະຕຽນທັງຫຼາຍໃນເມືອງຟີລິບ.
ຊາວເມືອງຟີລິບເຄີຍສະແດງນ້ຳໃຈກະລຸນາຫຼາຍຕໍ່ໂປໂລ. ເຂົາໄດ້ຝາກສິ່ງຂອງມາໃຫ້ເພິ່ນໃນຄຸກທີ່ນີ້. ດັ່ງນັ້ນໂປໂລຈຶ່ງກ່າວຄຳຂອບໃຈເຂົາສຳລັບສິ່ງຂອງນັ້ນ. ເອປາໂຟດີດເປັນຜູ້ທີ່ໄດ້ນຳເອົາສິ່ງຂອງນັ້ນມາ. ແຕ່ເຂົາເກີດລົ້ມປ່ວຍລົງເກືອບຕາຍ. ບັດນີ້ເຂົາສະບາຍດີແລ້ວແລະພ້ອມທີ່ຈະເມືອບ້ານ. ເຂົາຈະຖືຈົດໝາຍນີ້ຈາກໂປໂລແລະຕີໂມເຕໄປດ້ວຍເມື່ອເຂົາເມືອເມືອງຟີລິບ.
ຂະນະທີ່ຢູ່ໃນຄຸກໂປໂລຂຽນຈົດໝາຍອີກສອງສະບັບທີ່ພວກເຮົາມີຢູ່ໃນຄຳພີໄບເບິນ. ສະບັບນຶ່ງຂຽນໄປເຖິງຊົນຄລິດສະຕຽນໃນເມືອງໂກໂລດ. ສະບັບນີ້ເອີ້ນວ່າຢ່າງໃດເຈົ້າຮູ້ບໍ? ໂກໂລດ. ຈົດໝາຍອີກສະບັບນຶ່ງເປັນຈົດໝາຍສ່ວນຕົວໄປເຖິງເພື່ອນໃກ້ຊິດຄົນນຶ່ງຊື່ຟີເລໂມນ ຊຶ່ງຢູ່ທີ່ເມືອງໂກໂລດຄືກັນ. ຈົດໝາຍສະບັບນີ້ເປັນເລື່ອງກ່ຽວກັບໂອເນຊິມຜູ້ຮັບໃຊ້ຂອງຟີເລໂມນ.
ໂອເນຊິມໄດ້ປົບໜີໄປຈາກຟີເລໂມນແລະມາທີ່ນະຄອນໂລມ. ໂອເນຊິມໄດ້ຮູ້ຂ່າວກ່ຽວກັບໂປໂລວ່າເພິ່ນຖືກຂັງຄຸກທີ່ນີ້. ເຂົາໄດ້ມາຢາມເພິ່ນແລະໂປໂລຈຶ່ງປະກາດແກ່ໂອເນຊິມ. ບໍ່ຊ້າບໍ່ນານໂອເນຊິມໄດ້ເຂົ້າມາເປັນຄລິດສະຕຽນດ້ວຍ. ຂະນະນີ້ໂອເນຊິມເສຍໃຈທີ່ຕົນໄດ້ໜີໄປ. ໃນຈົດໝາຍສະບັບທີ່ມີໄປເຖິງຟີເລໂມນນັ້ນໂປໂລບອກວ່າຢ່າງໃດ ເຈົ້າຮູ້ບໍ?
ໂປໂລຂໍຟີເລໂມນໃຫ້ຍົກໂທດໂອເນຊິມ. ເພິ່ນຂຽນວ່າ: ‘ຂ້າພະເຈົ້າສົ່ງເຂົາກັບມາຫາທ່ານ ປັດຈຸບັນນີ້ເຂົາບໍ່ພຽງແຕ່ເປັນຄົນຮັບໃຊ້ຂອງທ່ານ ແຕ່ຍັງເປັນພີ່ນ້ອງຄລິດສະຕຽນທີ່ດີອີກດ້ວຍ.’ ເມື່ອໂອເນຊິມເມືອຍັງເມືອງໂກໂລດເຂົາຖືຈົດໝາຍສອງສະບັບນີ້ໄປດ້ວຍ ສະບັບນຶ່ງເຖິງຊາວໂກໂລດແລະອີກສະບັບນຶ່ງເຖິງຟີເລໂມນ. ເຮົາຄົງພໍເຂົ້າໃຈໄດ້ວ່າຟີເລໂມນຈະມີຄວາມດີໃຈຫຼາຍປານໃດເມື່ອເຂົາຮູ້ວ່າຄົນຮັບໃຊ້ຂອງຕົນໄດ້ເຂົ້າມາເປັນຄລິດສະຕຽນ.
ເມື່ອໂປໂລຂຽນຈົດໝາຍເຖິງຊາວຟີລິບແລະເຖິງຟີເລໂມນ ເພິ່ນມີຂ່າວດີແທ້ຈິງບາງຢ່າງ. ໂປໂລບອກຊາວຟີລິບວ່າ: ‘ເຮົາຈະສົ່ງຕີໂມເຕໄປຫາພວກທ່ານ ແລະບໍ່ດົນເຮົາຈະມາຢາມທ່ານດ້ວຍ.’
ເມື່ອໂປໂລຖືກປ່ອຍເປັນອິດສະຫຼະເພິ່ນໄປຢາມພີ່ນ້ອງຄລິດສະຕຽນຫຼາຍບ່ອນ ແຕ່ຕໍ່ມາໂປໂລຖືກຂັງຄຸກໃນນະຄອນໂລມອີກເທື່ອນຶ່ງ. ເພິ່ນຮູ້ວ່າເທື່ອນີ້ເພິ່ນຈະຖືກຂ້າ. ດັ່ງນັ້ນເພິ່ນຈຶ່ງຂຽນເຖິງຕີໂມເຕແລະຂໍໃຫ້ມາຫາເພິ່ນໄວໆ. ໂປໂລຂຽນດັ່ງນີ້: ‘ຂ້າພະເຈົ້າໄດ້ຮັກສາຄວາມຊື່ສັດໝັ້ນຄົງຕໍ່ພະເຈົ້າ ແລະພະເຈົ້າຈະປະທານບຳເໜັດແກ່ຂ້າພະເຈົ້າ.’ ບໍ່ກີ່ປີຕໍ່ມາໂປໂລຖືກຂ້າ ນະຄອນເຢຣຶຊາເລມຖືກທຳລາຍອີກ ເທື່ອນີ້ໂດຍຊາດໂລມ.
ແຕ່ມີເລື່ອງອີກໃນພະຄຳພີ. ພະເຢໂຫວາພະເຈົ້າໄດ້ໃຫ້ອັກຄະສາວົກໂຍຮັນຂຽນສອງສາມເຫຼັ້ມສຸດທ້າຍ ລວມທັງພະທຳຄຳປາກົດດ້ວຍ. ປຶ້ມພະຄຳພີເຫຼັ້ມນີ້ບອກເຖິງອະນາຄົດ. ຕໍ່ໄປນີ້ໃຫ້ເຮົາຮຽນຮູ້ວ່າອະນາຄົດຈະເປັນຢ່າງໃດ.
ກິດຈະການ 28:16-31; ຟີລິບ 1:13; 2:19-30; 4:18-23; ເຫບເລິ 13:23; ຟີເລໂມນ 1-25; ໂກໂລດ 4:7-9; 2 ຕີໂມເຕ 4:7-9.
