Chihande 113

Paulu muLoma

TALA malenge vanamukase Paulu, kaha achitale liswalale wavaLoma anakumulama. Paulu hifunge muLoma. Anakutatamina munavamulingila kuli Kesale waLoma. Numba hifunge, oloze vatu vanavetavisa kwizanga nakumumeneka.

Paulu hakutwama makumbi atatu muLoma himwasanyika vatwamina javaYuleya vezenga vamumone. Shikaho, vaYuleya vavavulu muLoma hikwiza. Paulu himwavambulila vyaYesu nawangana waKalunga. Vamwe hinavetava nakupwa vaka-Kulishitu, oloze vamwe kavate.

Paulu mwambulila namaswalale vavavulu vaze vanakumulamanga. Hamyaka yivali vanakumulama Paulu kuno mwafunge, anakwambulula kukala mutu mwamona. Shikaho navamuzuvo yaKesale hinavevwako mujimbu wamwaza waWangana, kaha vamwe hinavapwa vaka-Kulishitu.

Nyi ou ngeji ali nakusoneka hamesa ikiye iya? Unahase kumuvuluka nyi? Eyo, ikiye Chimoteu. Chimoteu vamukashile mukamenga hakwambulula Wangana, oloze vanamukasununa cheka. Kaha neza kuno amukafwe Paulu. Unejiva vyali nakusoneka Chimoteu nyi? Tutalenu kanawa.

Unakwanuka ngwetu jinganda jaFwilipi naEfwesu muChihande 110? Paulu akafwile kuputuka vikungulwilo vyavaka-Kulishitu mujinganda kana. Jino, shimbu ali mukamenga, himwasoneka mikanda kuli vaka-Kulishitu vakuze. Mikanda kana yatwama muMbimbiliya, kaha vayivuluka ngwavo Wavaka-Efwesu naWavaka-Fwilipi. Hano jino Paulu anakulweza vyatela Chimoteu kusonekela vakwavo vaka-Kulishitu muFwilipi.

Vaka-Fwilipi valikoji chikuma kuli Paulu. Vanamutumina wana mukamenga ali, kaha shikaho Paulu anakuvasakwilila hachuma kana. Epafwolitu ikiye lunga naunehe ou wana. Oloze himwaviza chikuma nakusaka kufwa. Jino ali kanawa cheka kaha nalizange lyehi kuya kwimbo. Mwaya nou mukanda wakufuma kuli Paulu naChimoteu hakukinduluka kuFwilipi.

Shimbu Paulu achili mukamenga, himwasoneka mikanda yeka yivali yize tukwechi muMbimbiliya. Umwe wavaka-Kulishitu vakuKolose. Unejiva muvausanyika nyi? Ngwavo Wavaka-Kolose. Mukanda ukwavo anakuutuma kuli sepa lyenyi Fwilemone uze nawa atwama muKolose. Mukanda kana unakuhanjika hangamba yaFwilemone, Oneshimu.

Oneshimu amuchinyine Fwilemone nakwiza kuLoma. Pamo Oneshimu kuno kukiko ejivile nge Paulu atwama mukamenga. Ejile nakumutala, kaha Paulu himwamwambulila Oneshimu. Nakushimbula chiku Oneshimu alumukile nakupwa muka-Kulishitu. Jino Oneshimu himwanyengetela hakuchina chenyi. Kaha unejiva ovyo Paulu mwasonekela Fwilemone mukanda nyi?

Paulu mwamulomba Fwilemone amukonekeleko Oneshimu. Paulu ngwenyi: ‘Ngunakumukindulwisa cheka kuli ove. Oloze keshi cheka ndungo kahako, oloze hindumbwetu muka-Kulishitu wamwaza.’ Oneshimu hakukinduluka kuKolose hikumbata yino mikanda yivali, umwe wavaka-Kolose ukwavo waFwilemone. Tunahase kushinganyeka hakuwaha nevu Fwilemone hakuwana nge ngamba yenyi napu jino muka-Kulishitu.

Paulu hakusoneka kuli vaka-Fwilipi nakuli Fwilemone, ali chikupu namujimbu wamwaza. Paulu mwalweza vaka-Fwilipi ngwenyi: ‘Nguli nakumitumina Chimoteu. Ami nawa kalinwomu ngwizenga nakumimona.’ Kaha kuli Fwilemone, himwasoneka ngwenyi: ‘Ngulongesele kwakushikila.’

Omu Paulu vanamusokola hikuya kuli vandumbwenyi vaka-Kulishitu muvihela vyavivulu. Oloze Paulu hinavamukasa cheka muLoma. Shimbu yino nejiva jino ngwenyi vanakuya nakumujiha. Shikaho himwasonekela Chimoteu nakumusanyika ezenga washi. Paulu ngwenyi: ‘Ngunashishika kuli Kalunga, kaha Kalunga mwakangufweta.’ Omu hanahichi myaka yayindende Paulu hikumujiha, Yelusalema hinavayenyeka cheka kuli vaLoma jino.

Oloze muMbimbiliya muli vyavivulu. Yehova Kalunga azachishile kaposetolo Yowano kusoneka mikanda yakukumishilako, haze hali namukanda waKusoloka. Uno mukanda wamuMbimbiliya wahanjika havyuma vyakulutwe. Echenu tulinangule jino ovyo navikeza kulutwe.

Vilinga 28:16-31; Wavaka-Fwilipi 1:13; 2:19-30; 4:18-23; WavaHepeleu 13:23; WaFwilemone 1-25; Wavaka-Kolose 4:7-9; WaChimoteu 2, 4:7-9.