QʼOK twitza kyiʼj kaden ateʼk tiʼj tqʼabʼ Pablo, ax ikx lu jun soldad te Roma tok xqʼuqelte. Ma tzʼokx presin Pablo toj Roma. In nayon ajxi tbʼaj t-ximen César tiʼ kbʼantel tuʼn tukʼil. Tej tokxtaq Pablo tuj carcel, xi qʼoʼn ambʼil te tuʼn kypon xjal tukʼe.

Tej otaq tzikʼ oxe qʼij tponlen Pablo tuj Roma, e tzaj ttxkoʼn junjun nejenel kye okslal tuʼn kypon tukʼe. Tuʼntzen jlu, e pon nim xjal judiy aju najleqeʼtoq tuj Roma. Yolen Pablo kyukʼe xjal lu tiʼj Jesús ex tiʼj tkawbʼil Dios. At junjo e ok te okslal ex aqetzun txqantl mitiʼ i ok te okslal.

Ax ikx yolin Pablo tiʼj Tyol Dios kyukʼe qeju soldad e xqʼuqin tiʼj. Tej tten Pablo kabʼe abʼqʼi pres tuj Roma, xi tpakbʼan Tyol Dios te alkyexku pon tukʼe. Tuʼntzun jlu, axpe ikx qejo tuj tja César kybʼi aju tbʼanel tqanil tiʼj tKawbʼil Dios, ax ikx at junjo e ok te okslal.

¿Alkyejo xjal ma pon ex ntzʼibʼen twiʼ mes? ¿Nel tnikʼe alkye? A Timoteo. Ax ikx te otaqxi tzʼokx pres tuʼnju npakbʼantoq tiʼj tKawbʼil Dios, naqtzen tuʼnj o tzʼetz tzaqpiʼn. Ma tzul onil tiʼj Pablo. ¿Nel tnikʼe tiʼ nkubʼ ttzʼibʼin? Ok kʼelel qnikʼ tiʼj.

¿Naʼnx qejo tnam te Filipos ex Éfeso tuʼne aqeju ateʼkux toj Txʼolbʼabʼil 110? Onin Pablo tuʼn kyxi tzyet junjun congregación atztzu. Tej tokxteq Pablo pres, xi ttzʼibʼan uʼj kye qeju okslal lu. Aqejo uʼj lu Efesios ex Filipenses kybʼi tuj Tuʼjil Tyol Dios. A Pablo xi qʼamante te Timoteo tiʼ kxel ttzʼibʼen tuj uʼj kye qejo kyamiw atqeʼ toj Filipos.

Kubʼ kybʼinchen aj Filipos nim tbʼanel te Pablo. Xi kysamaʼn jun oyaj te tuj pres, tuʼntzunju xi tqʼoʼn Pablo chjonte kye. A Epafrodito pon qʼiʼn teju oyaj lu. Naqtzen tuʼnj tzaj nim tyabʼ Epafrodito aju chʼixme kyim tuʼn. Bʼanix juntl maj ex pon ambʼil tuʼn taj tuj ttnam. Xi tiʼn tuʼj Pablo ex Timoteo tej tmeltzʼaj toj Filipos.

Tej tokxtaq Pablo pres kubʼ ttzʼibʼin kabʼetl uʼj aqejo ateʼkux tuj Tuʼjil Tyol Dios. Jun kye qeju okslal atqeʼ toj Colosas. ¿Bʼiʼn tuʼne tiʼ tbʼi uʼj lu? Colosenses. Atzun juntl uʼj xi ttzʼibʼan te Filemón aju tamiw at tuj tnam Colosas. Aju uʼj lu nyolin tiʼj Onésimo, ajo jun tmajentoq Filemón.

Noq etz oq Onésimo tuj tja Filemón ex pon toj Roma. Okle tbʼiʼn qa tokxteq Pablo pres tuj Roma. Xiʼ keʼyilte Pablo ex ok ten Pablo yolil tiʼj Tyol Dios tukʼil. Lwey naj ok Onésimo te okslal. Tzaj tbʼis Onésimo tuʼnjo el oq. Tuʼntzen jlu, ¿ojtzqiʼn tuʼne tiʼ xi ttzʼibʼen Pablo toj uʼj te Filemón?

Xi tqʼamaʼn Pablo te Filemón tuʼn tkubʼ tnajsaʼn til Onésimo. Kubʼ ttzʼibʼin kyjalu: ‹Kʼajel nsamaʼne Onésimo tukʼila, nya oʼkxtl kokel te tmajena. Ax ikx jun tbʼanel ermantl te›. Tej tmeltzʼaj Onésimo tuj Colosas i ex tiʼn qejo kabʼe uʼj lu, jun kye aj Colosas ex jun te Filemón. ¡Ole tzalajxix Filemón tej tok tbʼiʼn qa otaq tzʼok Onésimo aju tmajen te jun okslal ik tzeʼnj te!

Tej tkubʼ ttzʼibʼen Pablo uʼj kye aj Filipos ex te Filemón, kubʼ ttzʼibʼen tbʼanel tqanil kye. Xi tqʼamaʼn Pablo jlu kye aj Filipos: ‹Kxel nsamaʼne Timoteo kyukʼeye, ax ikx weye ya chʼixtl npone kyukʼile›. Ax ikx kubʼ ttzʼibʼan jlu te Filemón: ‹Bʼinchankuye jatumel chin kjeleye tukʼila›.

Tej tetz Pablo tuj carcel, xi kyukʼe okslal kyoj txqantl tnam. Yajxitl, okx qʼoʼn juntl maj Pablo pres tuj Roma. Tbʼi Pablo tqanil qa ok kbʼel bʼiyoʼnteq. Kyjuʼtzun xi ttzʼibʼen te Timoteo tuʼn tpon lwey tukʼe. Xi ttzʼibʼin jlu: ‹Ma bʼent tajbʼil Dios wuʼne, ex a tzul qʼonte chojbʼel weye›. Tej otaqxi kyim Pablo, kubʼ xitin juntl maj Jerusalén, tuj maj lu kyuʼn aj Roma.

Tej tkyim Pablo, e kubʼ tzʼibʼen mastl uʼj aqeju ateʼkux tuj Tuʼjil Tyol Dios. Ajbʼen Juan tuʼn Jehová tuʼn kykubʼ ttzʼibʼan qejo mankbʼil (último) uʼj, jun kyxol qe jlu aju Apocalipsis. Aju uʼj lu nyolin tiʼ kbʼajel toj ambʼil tzul. Qo xnaqʼtzal tiʼj.