KOTO cadena ña̱ ndíka̱a̱ ndaʼa̱ ta̱ Pablo, veʼeka̱a ñuu Roma ndíka̱a̱ra. Koto ta̱ soldado ta̱ ndáañaʼá. Ta̱ Pablo ndátura chi kúma̱ní kunda̱a̱-inira ndáaña keʼé na̱ chíñu ñuu Roma xíʼinra. Tá ndíka̱a̱ra veʼeka̱a yóʼo táxina kíʼvi savana xítoniʼninara.

Tá ni̱ya̱ʼa u̱ni̱ ki̱vi̱ ña̱ ki̱xa̱a̱ ta̱ Pablo ñuu Roma, ni̱ka̱ʼa̱nra ná kixi na̱ xi̱ku̱aʼa na̱ ñuu Judá kotoniʼninara. Ña̱kán ku̱a̱ʼání na̱ ñuu Judá na̱ ndóo ñuu Roma va̱xina xítoniʼninara. Ta̱ Pablo nátúʼunra xíʼinna xa̱ʼa Ndióxi̱. Savana ka̱ndíxana ta ndu̱una discípulo ta̱ Jesús, soo íyotu savana kǒo níkandíxa.

Ta̱ Pablo nátúʼunra xa̱ʼa Ndióxi̱ xíʼin ndiʼi na̱ soldado na̱ ndáañaʼá. Ti̱xin ña̱ u̱vi̱ ku̱i̱ya̱ ña̱ ndíka̱a̱ra veʼeka̱a yóʼo nátúʼunra xíʼin ndiʼi na̱ yiví na̱ xáa̱ nu̱úra. Xa̱ʼa ña̱yóʼo nda̱a̱ na̱ veʼe ta̱ chíñu ñuu Roma na̱kunda̱a̱-ini xa̱ʼa Tu̱ʼun Ndióxi̱, ta savana ni̱xa̱a̱na ndu̱una discípulo ta̱ Jesús.

Soo, ¿á xíniún ndáa ta̱a kúú ta̱ káʼyí tutu níndúʼu nu̱ú mesa yóʼo? Ta̱ Timoteo kúúra. Saátu ta̱yóʼo veʼeka̱a xi̱ndika̱a̱ra xa̱ʼa ña̱ nátúʼunra xa̱ʼa Ndióxi̱, soo vitin ki̱tavara veʼeka̱a. Ta ki̱xa̱a̱ra ñuu Roma yóʼo ña̱ chindeé táʼanra xíʼin ta̱ Pablo. ¿Á xíni̱ún ndáaña káʼyíra? Yóʼo sakuaʼayó xa̱ʼaña.

¿Á ndákaʼún xa̱ʼa ñuu Filipos xíʼin ñuu Éfeso ña̱ va̱xi nu̱ú historia 110? Ta̱ Pablo chi̱ndeé táʼanra xíʼin ña̱ ñuu yóʼo ña̱ ki̱xaʼá ndátakana ña̱ sákuaʼana xa̱ʼa Ndióxi̱. Ta vitin veʼeka̱a yóʼo káʼyíra carta ku̱a̱ʼa̱n nu̱úna. Ña̱ carta ka̱ʼyíra naníña Efesios, Filipenses, ta nu̱ú Biblia ñúʼuña. Ta̱ Pablo káʼa̱nra xíʼin ta̱ Timoteo ndáa tu̱ʼun kúú ña̱ kaʼyíra ku̱ʼu̱n nu̱ú na̱ migora na̱ ndóo ñuu Filipos.

Na̱ ñuu Filipos va̱ʼaní inina xíʼin ta̱ Pablo. Ña̱ ndíka̱a̱ra veʼeka̱a vitin chi̱ndaʼána ña̱ʼa ku̱a̱ʼa̱n ndaʼa̱ra, xa̱ʼa ña̱yóʼo táxira tixaʼvi ndaʼa̱na. Ta̱ naní Epafrodito kúú ta̱ ki̱xa̱a̱ xíʼin ña̱ʼa yóʼo. Ta ki̱ʼin kue̱ʼe̱ra si̱loʼo kuvira. Soo xa̱ndu̱va̱ʼavara vitin, ta ndikóra ku̱ʼu̱nra chí ñuu Filipos. Ta̱yóʼo kúú ta̱ kuniʼi carta ku̱ʼu̱nra tá ná ndikóra xíʼin ta̱ Timoteo.

Tá ndíka̱a̱kara veʼeka̱a ka̱ʼyíkara u̱vi̱ carta ña̱ va̱xi nu̱ú Biblia. Iinña ku̱a̱ʼa̱n nu̱ú na̱ ñuu Colosas. ¿Á xíni̱ún nda̱saa naní carta yóʼo? Colosenses naníña. Ta inkaña ku̱a̱ʼa̱n nu̱ú ta̱ migora ta̱ naní Filemón. Ta ña̱yóʼo káʼa̱nña xa̱ʼa ta̱ Onésimo ta̱ káchíñu nu̱ú ta̱ Filemón.

Ta̱ Onésimo ta̱ xi̱nu se̱ʼé kúúra nu̱ú ta̱ Filemón ku̱a̱ʼa̱nra chí ñuu Roma. Tá ni̱xa̱a̱ra kán na̱kunda̱a̱-inira xa̱ʼa ta̱ Pablo ña̱ ndíka̱a̱ra veʼeka̱a. Tasaá ni̱xa̱ʼa̱nra xi̱toniʼnira ta̱ Pablo, ta ta̱yóʼo na̱túʼunra xa̱ʼa Ndióxi̱ xíʼinra. Loʼova tiempo ni̱ya̱ʼa ta ni̱xa̱a̱ra ndu̱ura discípulo ta̱ Jesús. Ta vitin ndándikóní-inira ña̱ xi̱nu se̱ʼéra nu̱ú ta̱ Filemón. Ña̱kán, ¿á xíni̱ún ndáaña káʼa̱n ta̱ Pablo nu̱ú carta ña̱ ku̱a̱ʼa̱n ndaʼa̱ ta̱ Filemón?

Nu̱ú ña̱yóʼo káʼa̱nra xíʼin ta̱ Filemón ná koo káʼnu-inira xa̱ʼa ta̱ Onésimo. Ta káchira: ʼVitin chindaʼíi̱ ta̱ Onésimo xa̱a̱ra nu̱ún soo su̱ví ta̱ káchíñu kuití nu̱ún kuura chi ñanivaún ndu̱uraʼ. Tá ndi̱kó ta̱ Onésimo ñuu Colosas, níʼira u̱vi̱ saá carta yóʼo ku̱a̱ʼa̱nra, iinña ku̱a̱ʼa̱n ndaʼa̱ na̱ ñuu yóʼo ta inkaña ku̱a̱ʼa̱n ndaʼa̱ ta̱ Filemón. ¿Á ni̱kusi̱í-ini ta Filemón túviún tá na̱kunda̱a̱-inira xa̱ʼa ta̱ káchíñu nu̱úra ña̱ ndu̱ura discípulo ta̱ Jesús?

Tá ka̱ʼyí ta̱ Pablo carta ku̱a̱ʼa̱n ndaʼa̱ na̱ ñuu Filipos xíʼin ta̱ Filemón ku̱a̱ʼákaví tu̱ʼun va̱ʼa ka̱ʼyíra nu̱ú carta yóʼo. Xíʼin na̱ ñuu Filipos káchira: ʼChíndaʼíi̱ ta̱ Timoteo ku̱xa̱a̱ra nu̱úndó, ta si̱loʼo xa̱a̱tu yi̱ʼi̱vaʼ. Ta xíʼin ta̱ Filemón káchira: ʼNdukú loʼo nu̱ú xa̱i̱ koi̱ʼ.

Tá ki̱ta ta̱ Pablo veʼeka̱a, ku̱a̱ʼání ñuu ni̱xa̱ʼa̱nra xi̱toniʼninara na̱ xa̱sákuaʼa xa̱ʼa Ndióxi̱. Ni̱ya̱ʼa loʼo tiempo tuku chi̱ka̱a̱nara veʼeka̱a ñuu Roma. Soo vitin kúnda̱a̱-inira kaʼnívanara. Ña̱kán ka̱ʼyíra tutu ku̱a̱ʼa̱n nu̱ú ta̱ Timoteo ña̱ ná kixi kamara nu̱úra, ta káchira: ʼVa̱ʼaní ka̱chíñui̱ nu̱ú Ndióxi̱, ta taxivara ña̱ va̱ʼa ndaʼíi̱ʼ. Tándi̱ʼi ni̱xi̱ʼi̱ ta̱ Pablo, ni̱ya̱ʼa loʼo ku̱i̱ya̱ tuku ndi̱ʼi-xa̱ʼa ñuu Jerusalén, soo vitin na̱ ñuu Roma sa̱ndíʼi-xa̱ʼaña.

Soo íyo ku̱a̱ʼáka sava libro va̱xi nu̱ú Biblia. Jehová xi̱niñúʼura ta̱ Juan ña̱ ka̱ʼyíra sava ña̱yóʼo ta va̱xiña nu̱ú ndíʼi ña̱ Biblia, ta iin ña̱yóʼo naní Revelación. Libro yóʼo káʼa̱nña xa̱ʼa ña̱ koo chí nu̱únínu. Vitin sakuaʼayó xa̱ʼaña.