TALA malenge a li ku mavoko a Paulu, kaha tala ou lisualale ua vakuaLoma a li na ku mu niunga. Paulu a li mu kamenga ka ku Loma. A li na ku lavelela noho Sezale ua mu Loma a singanieke vati a mu linga. Paulu mua kele mu kamenga, va tavesele vantu kua ku mu meneka

Mua puisile matangua atatu mu Loma, Paulu ua tumine mezi linga vamo vantuamena va vaYundeya veze mu kua ku mu meneka. Omo lia mezi aa, kuezile vaYundeya va vengi va mu Loma mu kua ku mu mona. Kaha Paulu ua va ambuluilile via Yesu na via vuangana vua Njambi. Vamo va tavele kaha vapua vaKilistau, vunoni vakuavo ka va tavele.

Paulu ua ambuluilile masualale va kuli seza-seza vaze va kele na cipanga ca ku mu niunga. Mu miaka ivali ya kele mu kamenga, Paulu ua ambuluile vantu va vengi cikuma. Omo lia ku ambulula ceni, vakua ndzivo ya Sezale navo va vuile muzimbu ua cili ua Vuangana, kaha vamo va himpukile vaKilistau.

Amba co iya ou ngendzi a li aha ha mesa mu ku soneka? A ci seteke ku mu tumbula? Eyo, ikeye Timoteo. Timoteo neni ua kele mu kamenga omo lia ku ambulula muzimbu ua Vuangana, vunoni va muecela laza. Kaha neza mu kua ku kuasa Paulu. Ua tantekeya vika a li na ku soneka Timoteo ni? Tu ci vi tantekeye.

U ci vuluka vimbonge via Filipu na Efeso vi tua handekele ha Muzimbu 110 ni? Paulu ua kuasele ku sokolola vikungulukilo via vakua Kilistu mu vimbonge viaco. Vuovuno, ntsimbu a ci li mu kamenga Paulu ua sonekele mikanda ku vikungulukilo evi. Mikanda yaco ya kala mu Mbimbiliya kaha va iluka nguavo Efeso na Filipu. Paulu a li na ku leka Timoteo viuma vi va sonekela vavusamba vuavo vakua Kilistu ku Filipu.

Vakua Filipu va muesele ngozi ya kama kuli Paulu. Va mu tumine vuana omu mu kamenga, ngeci mukemuo Paulu a li na ku va santsela. Epafolondito ikeye ua nehele vuana vuaco. Vunoni ua vavalele cikuma ua tonda ku tsa. Vuovuno na kanguka kaha na liviukisila linga a hiluke kuimbo. Ikeye ambata ou mukanda ua Paulu na Timoteo, mua hiluka ku mbonge ya Filipu.

Ntsimbu a cili mu kamenga Paulu ua sonekele mikanda ikuavo ivali ya kala mu Mbimbiliya. Umo kuli vakua Kilistu va mu mbonge ya Kolose. Ua tantekeya vati va u luka ni? Va u luka nguavo Kolose. Kaha ukuavo ua u sonekelele kuli kavusamba keni ua lizina Filemone neni ua kala mu mbonge ya Kolose. Ou mukanda ua handeka via ngamba ya Filemone ua lizina Onesimu.

Onesimu ua tinine Filemone ua ya ku Loma. Onesimu ua tantekeyele ngueni Paulu a li mu kamenga mu mbonge ize vene. Kaha uezile mu ku mu meneka ngeci Paulu ua mu ambuluilile. Kaha Onesimu ua himpukile mukua Kilistu. Vuovuno honi Onesimu na liveye vika ua tininine. Ua tantekeya vika Paulu ua sonekele mu mukanda ua tumine kuli Filemone ni?

Paulu ua vundilile Filemone linga a konekele Onesimu. Paulu ua sonekele ngueni: ‘Nji na mu tumu a hiluke kuli ove, vunoni vuovuno ka puile lika ngamba yove. Na pu naua muanetu ua cili mu ku tsiliela’. Omo Onesimu ua hilukile ku Kolose ua ambatele eyi mikanda ivali, umo kuli vakua Kolose ukuavo kuli Filemone. Filemone ua viukilile cikuma omo ua tantekeyele ngueni ngamba yeni na pu mukua Kilistu.

Omo Paulu ua sonekelele vakua Filipu na kuli Filemone, ua va lekele mizimbu ya cili, ngueni: ‘Nji li na ku mi tuma Timoteo, nange amba nja ku mi mona vunoni mu ntsimbu ya indende’. Kaha kuli Filemone ua sonekelele ngueni: ‘Nji viukisile cihela ci nja ku tulila.’

Paulu mua tuhukile mu kamenga, ua ile ku vihela via kuli seza-seza, mu ku meneka vamuanaye va vampuevo na va vamala mu ku tsiliela. Kaha Paulu va mu sokele naua mu kamenga ku Loma. Hano honi na tantekeya ngueni va ka mu tsiha. Kaha ua sonekelele Timoteo linga eze vuasi vuasi. Kaha ua sonekele naua ngueni: ‘Nji na muesa lutsilielo kuli Njambi, kaha Njambi a ka nji lunguisa’. Munima ya miaka ya indende fume ha ku tsa ca Paulu, Yelusalema va i nongesele naua kuli vakua Loma.

Vunoni mu Mbimbiliya muli mizimbu ya ingi. Yehova Njambi ua tumine kapostolo Yoano linga a soneke mikanda ya ku manusuila ya mu Mbimbiliya hamo na mukanda ua Ku-solola. Ou mukanda ua handeka ha viuma vika soloka ku lutue. Vuovuno tu ka lilongesa via viuma vi tua lavelela ku lutue.