TLAPOUALISTLI 113

Pablo okatka Roma

XIKITA cadenas tlen kipia Pablo, uan xikita soldado romano tlen kimaluijtok. Pablo tsaktok Roma. Ye mochixtok pampa tekiua romano César ma kijto tlen kichiuilis. Ijkuak tsaktok itech telpiloyan, kinkauaj sekimej ma kitlajpalotij.

Eyi tonal satepan oajsito Roma, Pablo okinmiluij sekimej tlayekankej teopixkamej ma kitatij. Ik non, miakej judíos tlen ochantiayaj Roma okitatoj. Pablo okintlapoui itech Jesús uan itech iTekiuajkayo toTajtsin Dios. Sekimej otlaneltokakej uan opejkej kichiuaj ken Cristo, maski ijkon, oksekimej amo otlaneltokakej.

Pablo noijki okintlapoui nochtin soldados tlen okimaluiaya. Itech ome xiuitl tlen Pablo otsaktoka, okintlapoui nochtin akinmej okitatoj. Ik non, noijki akinmej okatkaj ikalijtik César okikakej itech iTekiuajkayo toTajtsin Dios, uan sekimej opejkej kichiuaj ken Cristo.

Uan, ¿akin nin tlakatl tlen yetok inauak mesa uan tlajkuilojtok? ¿Tikmati akin ye? Kema, ye Timoteo. Ye noijki otsaktoka pampa otetlapouiaya itech iTekiuajkayo toTajtsin Dios, maski ijkon, axkan ayakmo tsaktok. Ouala pampa okipaleuiko Pablo. ¿Tikmati tlen okijkuilo? Ma tikitakan.

¿Tikilnamiki yotiktlajtoltijkej itech Tlapoualistli 110 itech altepemej Filipos uan Éfeso? Pablo otlapaleui pampa omochijkej tlanechikolmej ompa. Axkan ken otsaktoka, okijkuilo sekimej amatlajkuilolmej pampa akinmej okichiuayaj ken Cristo itech non tlanechikolmej. Ninmej amatlajkuilolmej intoka Efesios uan Filipenses, uan katej itech Biblia. Axkan Pablo okilui Timoteo tlen moneki kijkuilos pampa ikniuan akinmej okichiuayaj ken Cristo itech Filipos.

Filipenses melauak yolkualmej inauak Pablo. Okititlanilijkej se tetliokolil kanin otsaktoka, ik non, axkan Pablo okintlasojkamatili. Epafrodito ye akin okiualikili tetliokolil. Maski ijkon, ye omokoko miak uan yimikiskia. Axkan yikuali okatka uan oksepa oyajki itech ialtepetl. Ye okiuikak nin amatlajkuilol tlen okititlankej Pablo uan Timoteo ijkuak omokuepki Filipos.

Ijkuak Pablo otsaktoka, okinmijkuilo ok ome amatlajkuilolmej tlen noijki tikinmajsij itech Biblia. Se okinmijkuilili akinmej okichiuayaj ken Cristo itech Colosas. ¿Tikmati tlen itoka? Colosenses. Okse amatlajkuilol okijkuilili se iyolikni tlen omotokayotiaya Filemón uan ochantiaya Colosas. Nin amatlajkuilol otlapoaya itech Onésimo akin okitekichiuiliaya Filemón.

Onésimo okicholili Filemón uan oyajki Roma. Onésimo okimatki Pablo otsaktoka. Oyajki okitlajpaloto, uan ompa Pablo okitlapoui. Satepan, noijki Onésimo opejki kichiua ken Cristo. Axkan Onésimo omoyolkoko pampa okicholili Filemón. Ik non, ¿tikmati tlen okijkuilo Pablo itech nin amatlajkuilol tlen okititlanili Filemón?

Pablo okijkuilili Filemón ma kitlapojpolui Onésimo. Pablo okilui: ‘Oksepa nimitstitlanilia. Maski ijkon, axkan ayakmo san motlakeual. Axkan noijki ye mokni pampa yikichiua ken Cristo. Noijki se tokni yolkuali’. Ijkuak Onésimo omokuepki Colosas, okinuikak ome amatlajkuilolmej, se okintitlanili colosenses uan okse Filemón. ¡Ximokuayejyeko ken Filemón oyolpakik pampa itlakeual Onésimo axkan noijki yokichiuaya ken Cristo!

Ijkuak Pablo okintlajkuilili Filipenses uan Filemón, okinmilui miak tlamantli kuali. Pablo okinmilui filipenses: ‘Nimechtitlanilia Timoteo. Maski ijkon, satepan ne noijki namechtlajpaloti’. Uan Filemón okilui: ‘Xitlayektlali kanin nimokauas’.

Ijkuak Pablo okiski itech telpiloyan, okintlajpaloto ikniuan itech miakej altepemej. Maski ijkon, satepan oksepa okitsakej itech Roma. Axkan ye okimatiaya kimiktiskej. Ik non, okijkuilili Timoteo ma kitati san niman. Okijkuilo: ‘Ne niyolmelajki ixpan toTajtsin Dios, uan ye nechteochiuas’. Amo miak xiuitl satepan ijkuak Pablo omikik, axkan romanos okixpolojkej Jerusalén.

Itech Biblia onka oksekimej amochtin. Jehová okinauati tlatitlanil Juan ma kijkuilo saiktlami amochtin, uan noijki amochtli Apocalipsis. Nin amochtli tlapoa itech tlen tlapanos satepan. Ma tikitakan tlen omoijto panoskia satepan.

Hechos 28:16-31; Filipenses 1:13; 2:19-30; 4:18-23; Hebreos 13:23; Filemón 1-25; Colosenses 4:7-9; 2 Timoteo 4:7-9.