Historia 113

Pablo nemi Roma

XKIMITA cadenas tlen ika saliujtika Pablo, niman xkita soldado romano akin kitlajpiya. Pablo tsaujtika Roma. Kichia ijkuak César romano makinemili tlen kichiuilis. Ijkuak tsaujtika, kikauiliaj makitlajpalotij.

Ijkuak yopanok yeyi tonajli ika oajsik ipan ueyikalpan Roma, Pablo kinnotsa akin kinyekanaj judíos makitatij. Ika yejon, miyekej judíos akin nemij Roma uajlauej. Pablo kinnojnotsa itech Jesús niman itekiuajyo toTajtsin. Sekimej tlaneltokaj niman peuaj kichiuaj ken Cristo, san ika, oksekimej xtlaneltokaj.

Pablo noijki kinnojnotsa nochimej soldados akin kitlajpiyaj. Ipan ome xiuitl ijkuak kipiyaj tsaujtika, Pablo kinnojnotsa nochimej akin itech yauej. Ipampa yejuin, noijki ichanejkauan César kikakij kuajli tlajtoltin itech Tekiuajyotl, niman sekimej peuaj kichiuaj ken Cristo.

San ika, ¿akinon akin tlajkuilojtika ipan mesa? ¿Tikmatstika akinon? Kema, yejua Timoteo. Yejua noijki yokitsaujkaj pampa tenojnotsa itech itekiuajyo toTajtsin, san ika aman yokis. Niman ouajla okipaleuiko Pablo. ¿Tikmatstika tlenon kijkuiloua? Matikitakan.

¿Tikilnamiki ueyikalpan Filipos niman Éfeso ipan Historia 110? Pablo otlapaleui maoniakan miyek tlanechikoltin ompa. Amatlajkuiloltin tlen onotokayotijkej Efesios niman Filipenses, nonextiaj ipan Biblia. Aman Pablo kijlia Timoteo tlenon komintlajkuilouilis akin kichiuaj ken Cristo ne ipan Filipos.

Filipenses yolkualmej, niman kuajli okiselijkej Pablo. Niman kititlaniliaj se tetlayokolijli kampa tsaujtika, ika yejon, Pablo pampa kitlasojkaita, komintlajkuilouilia. Epafrodito kuajkuilia yejuin tetlayokolijli. San ika, yejua melak otlanauj niman imikiya. Aman oksejpa kuajli nemi niman xok uejkauis nokuepas ipan ueyikalpan kampa yejua chanti. Yejua kitkis amatlajkuilojli tlen Pablo iuan Timoteo okitlalijkej ijkuak nokuepas ipan Filipos.

Kampa tsaujtika, Pablo ok kijkuiloua ome amatlajkuiloltin tlen tikinnextiaj ipan Biblia. Se okimijkuilouili akin kichiuaj ken Cristo ipan ueyikalpan Colosas. ¿Tikmatstika kenon itoka? Colosenses. Okse, amatlajkuilojli okititlanili Filemón, akin iuan nouika, yejua chanti Colosas. Yejuin amatlajkuilojli tlajtoua itech Onésimo, se itlakeual Filemón.

Onésimo ocholo itech Filemón niman ouajla Roma. Yejua okimat ika Pablo nikan tsaujtoya. Okitlajpaloto, niman Pablo okinojnots itech kuajli tlajtoltin. Xouejkauj Onésimo noijki opeuj kichiua ken Cristo. Aman, Onésimo notekipachoua pampa ocholo. Ika yejon, ¿tikmatstika tlenon Pablo okonijkuilouili Filemón?

Pablo kitlajtlanilia Filemón makitlapopolui Onésimo. ‘Oksejpa nimitsontitlanilia’, kijkuiloua Pablo. ‘San ika, aman xok sa yes motekipanojkauj. Yonochiuj tokniuj akin kichiua ken Cristo.’ Ijkuak Onésimo nokuepa ipan ueyikalpan Colosas, kimitki yejuin ome amatlajkuiloltin, se kinmakas colosenses niman okse kimakas Filemón. ¡Xnemili kenon melak opak Filemón ijkuak okimat ika itlakeual Onésimo, aman kichiua ken Cristo, ijkon ken yejua!

Ijkuak Pablo komintlajkuilouilia filipenses niman Filemón, kimijlia itlaj tlen melak kuajli. ‘Nimechtitlanilia Timoteo’, Pablo kimijlia filipenses. ‘San ika, sa xuejkauis nejua noijki nias nimechontlajpalos.’ Niman, Filemón, kijlia: ‘Xyektlali kampa uelis ninoseuis’.

Ijkuak Pablo kisa, komintlajpaloua akin kichiuaj ken Cristo ipan miyekan ueyikalpamej. San ika, sakin Pablo oksejpa kitsakuaj ipan ueyikalpan Roma. Aman kimatstika ika kimiktiskej. Ika yejon, kontlajkuilouilia Timoteo nimantsin mauajla. ‘Xkeman onijkauj toTajtsin’, kijkuiloua, ‘niman yejua nechteochiuas’. Ijkuak opanok seki xiujtin ika omik Pablo, Jerusalén oksejpa kixoxotoniaj, aman kichiuaj romanos.

Ijkuak Pablo yomik, okseki amoxtin onoijkuilojkej ipan Biblia. Jehová kichiua Juan itlatitlankauj Jesús, makijkuilo sa seki amoxtin tlen onotlalijkej ipan itlamiyan Biblia, se itoka Revelación noso Apocalipsis. Yejuin amoxtli tlajtoua itech tlen panos ika tlayekapan. Matikitakan tlenon panos.

Hechos 28:​16-​31; Filipenses 1:​13; 2:​19-​30; 4:​18-​23; Hebreos 13:​23; Filemón 1-​25; Colosenses 4:​7-9; 2 Timoteo 4:​7-9.