NEA nwɔnzɔnwɔnzɔ ne mɔɔ gua Pɔɔlo asa la, na nea Wulomu sogya ne mɔɔ ɛlɛbɔ ɔ nwo bane la. Pɔɔlo la efiade wɔ Wulomu. Ɔlɛkendɛ kɔkpula kɛ Wulomu Siza ne kɛzi kpɔkɛ wɔ mɔɔ ɔwɔ kɛ ɔyɛ ye la anwo. Mekɛ mɔɔ ɔla efiade la, bɛmanle menli adenle kɛ bɛkpɔla ye.

Pɔɔlo hɔle Wulomu la ye kenle nsa anzi ɔdole nrɛlaleɛ kɛ Dwuu adekilevolɛma bie mɔ ɛrɛla ɛranwu ye. Ɔlua ɛhye ati, Dwuuma dɔɔnwo mɔɔ wɔ Wulomu la rale. Pɔɔlo hanle Gyisɛse yɛɛ Nyamenle belemgbunlililɛ ne anwo edwɛkɛ hilele bɛ. Bie mɔ liele lile na bɛrayɛle Keleseɛnema, noko bie mɔ anlie anli.

Pɔɔlo eza hanle edwɛkɛ ne hilele sogyama ngakyile mɔɔ bɔ ɔ nwo bane la. Wɔ ɛvolɛ nwiɔ ne mɔɔ bɛdole ye efiade wɔ ɛke la anu Pɔɔlo hanle edwɛkɛ ne ɔhilele awie biala mɔɔ ɔkɛhola la. Ɔlua ɛhye ati, Siza sua nu amra bɔbɔ dele Belemgbunlililɛ ne anwo edwɛkpa ne, na bie mɔ rayɛle Keleseɛnema.

Na ɛyɛvolɛ ɛhye mɔɔ de ɛkponle ne anwo ɛlɛkɛlɛ debie la a le nwane? Ɛbahola wɔabɔ ɛ ti anu wɔaha ɔ? Ɛhɛe, Temɔte ɔ. Temɔte noko lale efiade ɔlua Belemgbunlililɛ ne anwo edwɛkɛ mɔɔ ɔhanle la ati, noko ɔ nwo ɛdɔ ye. Na yera ɛke kɛ ɔba yeraboa Pɔɔlo. Asoo ɛze edwɛkɛ mɔɔ Temɔte ɛlɛkɛlɛ la? Maa yɛnlea.

Ɛkakye Felepae nee Ɛfɛsɛse azua ne mɔ wɔ Ɛzukoalɛdeɛ 110 ne anu ɔ? Pɔɔlo boale manle bɛbɔle Keleseɛne asafo dɔɔnwo abo wɔ azua zɔhane mɔ azo. Akee mekɛ mɔɔ ɔla efiade la, Pɔɔlo hɛlɛle ngɛlata hɔmanle Keleseɛnema ɛhye mɔ. Ngɛlata ne mɔ wɔ Baebolo ne anu, na bɛfɛlɛ bɛ Ɛfɛsɛsema nee Felepaema. Pɔɔlo akee ɛlɛka ahile Temɔte mɔɔ ɔwɔ kɛ bɛkɛlɛ bɛkɔmaa bɛ gɔnwo mɔ Keleseɛnema wɔ Felepae la.

Felepaema ɛyɛ Pɔɔlo ahunlunyele kpole. Bɛvale ahyɛlɛdeɛ bɛnwanle ye wɔ efiade ɛke, yemɔti Pɔɔlo ɛlɛda bɛ ase wɔ nwolɛ. Ɛpafulodaetɛse a le sonla ne mɔɔ vale ahyɛlɛdeɛ ne rale a. Noko ɔ nwo dole ye kpole mɔɔ asɛɛ ɔwule a. Kɛkala yede kpɔkɛ bieko na yeziezie ɔ nwo kɛ ɔkɔ ye sua zo. Ɔbava Pɔɔlo nee Temɔte kɛlata ɛhye yeazia ɔ nwo wɔ mekɛ mɔɔ ɔlɛsia yeahɔ Felepae la.

Mekɛ mɔɔ Pɔɔlo wɔ efiade la ɔhɛlɛle ngɛlata nwiɔ bieko mɔɔ yɛlɛ bɛ wɔ Baebolo ne anu a. Ɔhɛlɛle ko ɔhɔmanle Keleseɛnema mɔɔ wɔ Kɔlɔsae sua ne azo la. Ɛze duma mɔɔ bɛfa bɛfɛlɛ ye la ɔ? Bɛfɛlɛ ye Kɔlɔsaema. Ko ne mɔɔ ɛha la le ɔ ti anwo kɛlata mɔɔ ɔhɛlɛle ɔhɔmanle ɔ gɔnwo kpalɛ mɔɔ bɛfɛlɛ ye Faelimɔn mɔɔ wɔ Kɔlɔsae la. Kɛlata ne fane Faelimɔn sonvolɛ Onɛsemɛse anwo.

Onɛsemɛse nriandile vile Faelimɔn anwo na ɔrale Wulomu. Wɔ adenle bie azo Onɛsemɛse dele kɛ Pɔɔlo la efiade wɔ ɛke. Ɔrakpɔlale ye, na Pɔɔlo hanle edwɛkɛ ne bie hilele Onɛsemɛse. Yeangyɛ Onɛsemɛse noko rayɛle Keleseɛnli. Akee Onɛsemɛse nlunle ɔ nwo kɛ ɔnriandile a. Ɛhye ati ɛze mɔɔ Pɔɔlo hɛlɛle ye wɔ kɛlata ɛhye anu hɔmanle Faelimɔn a?

Pɔɔlo hanle hilele Faelimɔn kɛ ɔva Onɛsemɛse ɛtane ɔhyɛ ye. Pɔɔlo hɛlɛle kɛ: ‘Melɛsiane ye meamaa yeara ɛ nwo lɔ bieko. Noko kɛkala ɔnle wɔ akɛlɛ angome. Eza ɔle Keleseɛne adiema kulovolɛ.’ Mekɛ mɔɔ Onɛsemɛse ziale hɔle Kɔlɔsae la ɔvale ngɛlata nwiɔ ɛhye ɔziale ɔ nwo ɔhɔle, ɔvale ko ɔmanle Kɔlɔsaema na ɔvale ko ne noko ɔmanle Faelimɔn. Yɛkola yɛnwu kɛzi Faelimɔn anye balie kpole wɔ mekɛ mɔɔ ɔnwunle ye kɛ ye sonvolɛ ne ɛrayɛ Keleseɛnli la.

Mekɛ mɔɔ Pɔɔlo hɛlɛle Felepaema nee Faelimɔn la, ɛnee amgba ɔlɛ edwɛkɛ kpalɛ bie ɔka ɔkile bɛ. Pɔɔlo hanle hilele Felepaema kɛ: ‘Melɛsoa Temɔte meamaa yeara bɛ nwo lɔ. Noko ɔnrɛhyɛ medame noko mebara mearakpɔla bɛ.’ Na ɔhɛlɛle Faelimɔn kɛ: ‘Kpondɛ dabelɛ sie me.’

Mekɛ mɔɔ bɛgyakyile Pɔɔlo la ɔhɔle ɛleka dɔɔnwo ɔhɔkpɔlale ɔ mediema Keleseɛne mrenya nee mraalɛ. Noko nzinlii bɛdole Pɔɔlo efiade bieko wɔ Wulomu. Mekɛ ɛhye anu ɛnee ɔze kɛ bɛbahu ye. Yemɔti ɔhɛlɛle Temɔte na ɔhanle ɔhilele ye kɛ ɔrɛla ndɛndɛ. Pɔɔlo hɛlɛle kɛ: ‘Meli nɔhalɛ memaa Nyamenle, na Nyamenle bamaa me ahyɛlɛdeɛ.’ Bɛhunle Pɔɔlo la ye ɛvolɛ ekyi anzi, bɛzɛkyele Gyɛlusalɛm bieko, mekɛ ɛhye anu Wulomuma a zɛkyele ye a.

Noko dɔɔnwo tɛbɔ Baebolo ne anu. Gyihova Nyamenle manle ɛzoanvolɛ Dwɔn hɛlɛle ye mbuluku ne mɔ mɔɔ li awieleɛ, mɔɔ Yekile buluku ne boka nwolɛ la. Baebolo buluku ɛhye ka kenlebie anwo edwɛkɛ. Akee maa yɛzukoa mɔɔ bara kenlebie la anwo debie.