HYANDI nuyu̱ yä kadenä thätꞌi ha yä yꞌe̱ Pablo ꞌne nuni soldado di su. Pablo xki tsꞌitsꞌi ngu nꞌa yꞌofadi ha Romä, ꞌne mi to̱ꞌmitho te xä mända Sesar xä tꞌo̱tꞌpäbi. Mientra mi jotꞌi, mi tꞌumbäbi nse̱ki toꞌo dä ma dä nuu.

Mi thogi hñupa de xki zo̱ni ha Romä, Pablo bi nzohni rꞌa yä judio nuꞌu̱ mi ja yä däta nsu. Hänge ndunthi de nuꞌu̱ yä judio mi ꞌmu̱i ha Romä, bi ma bä nuu. Pablo bi ꞌñuti de rä Hesu ꞌne de rä tsꞌu̱tꞌhui Äjuä. Rꞌaa bi gamfri ꞌne bi de̱ni rä Hesu, pe märꞌaa himbi ne.

Pablo ꞌnehe bi ꞌñuti de rä Noya Äjuä rꞌa de nuꞌu̱ yä soldado mi su. Nuꞌu̱ yo nje̱ya bi ñꞌofadi Pablo ha Romä, nzäntho bi hyoni toꞌo dä ꞌñuti de rä Noya Äjuä. Asta nuꞌu̱ yä jäꞌi mi ꞌmu̱i ha rä ngu Sesar bi yꞌo̱de nuꞌu̱ yä rꞌayꞌo hogä noya de rä Tsꞌu̱tꞌhui Äjuä, ꞌne rꞌa de geꞌu̱ bi zo̱ho̱ bi de̱ni rä Hesu.

Xibye̱, ¿gi pädi toꞌo nuni zo̱nte huhni ofo? Hää, gehni Timoteo. Nuni ꞌnehe xki ñꞌofadi ngeꞌä mi ungä ntꞌo̱de de rä Tsꞌu̱tꞌhui Äjuä, pe nubye̱ ya xki bo̱ni, ꞌne bi ma bä nuu Pablo pa bi matsꞌi. ¿Gi pädi te ofo? Ma gä handihu̱.

¿Gi beni ge ha Rä ꞌmede 110 dä pädihu̱ de nuꞌu̱ yä hnini Efeso ꞌne Filipos? Pablo bi mfaxte pa bi zo̱ho̱ bi nja yä mhuntsꞌi ha nuꞌu̱ yä hniniꞌu̱. Nubye̱ nuua ha fadi, bi yꞌofo yä karta pa bi me̱mpäbi nuꞌu̱ yä ku. Nuꞌu̱ yä karta yä thuhu Filipenses ꞌne Efesios, dä za gä tinihu̱ ha rä Mäkä Tꞌofo. Pablo bi xipi Timoteo te dä yꞌofo pa nuꞌu̱ yä ntsitsꞌi mi ꞌmu̱i ha Filipos.

Nuꞌu̱ yä mengu Filipos xa xki ñhojäꞌi ko Pablo, ꞌne xki me̱mpäbi nꞌa regalo ha rä fadi. Hänge Pablo mi umbäbi njamädi ha näꞌä karta. Epafrodito go geꞌä bi hñäꞌspäbi näꞌä regalo. Epafrodito bi ñheni ꞌne ya ma xä du, pe bi hogi de rä ñheni. Hänge nguntꞌä ma dä mengi pa Filipos ꞌne ma dä hñätsꞌi näꞌä karta bi yꞌofo Pablo ꞌne Timoteo.

Ha fadi, Pablo bi yꞌofo mä yoho yä karta hutsꞌi ꞌnehe ha rä Mäkä Tꞌofo. Nꞌaa bi me̱mpäbi nuꞌu̱ yä ku mi ꞌmu̱i ha Kolosas. ¿Gi pädi te rä thuhu nunä karta? Rä thuhu Colosenses. Näꞌä mänꞌa karta bi me̱mpäbi nꞌa rä ntsitsꞌi mi ꞌmu̱i ha Kolosas mrä thuhu Filemon. Ha näꞌä karta bi yꞌofo de nꞌa rä ꞌme̱go Filemon mrä thuhu Onesimo.

Onesimo xki ꞌmatꞌi de Filemon ꞌne xki ma pa Romä. Onesimo bi zo̱ho̱ bi bädi ge Pablo mi o ha fadi hänge bi ma bä nuu. Pablo bi ꞌñuti de rä Noya Äjuä ꞌne Onesimo nguntꞌä bi zo̱ho̱ bi de̱ni rä Hesu. Nubye̱ Onesimo xa bi ntso̱ꞌmi ngeꞌä xki ꞌmatꞌi de rä hmuu. Hänge, ¿gi pädi te bi yꞌofo Pablo ha näꞌä karta bi me̱mpäbi Filemon?

Pablo bi yꞌapäbi Filemon ge dä pumbäbi Onesimo. Bi ꞌñembi: “Di pe̱hnäꞌibu̱ Onesimo, pe nubye̱ hingä se̱he̱ ri ꞌme̱go, ꞌnehe ri ku”. Mi mengi Onesimo ha Kolosas bi hñätsꞌi nuya yä karta, nꞌaa pa nuꞌu̱ yä ku de Kolosas ꞌne näꞌä mänꞌaa pa Filemon. ¡Hängu rä johya bi me̱ꞌtsi Filemon mi bädi ge Onesimo ya mi nꞌa rä de̱ni rä Hesu nguꞌä!

Pablo bi yꞌofo yä hogä noya ha nuꞌu̱ yä karta bi me̱mpäbi yä me Filipos ꞌne Filemon. Bi ꞌñembäbi yä me Filipos: “Di pe̱hnäꞌihu̱bu̱ Timoteo, pe mänꞌitꞌho ma gä mabu̱ ꞌnehe”. Ha Filemon bi ꞌñembäbi: “Hyoki nꞌa luga habu̱ dä za gä kohi”.

Mi bo̱ni de rä fadi, Pablo bi ma bä nuu yä ku de ndunthi yä luga. Pe mꞌe̱fa Pablo bi tꞌe̱ntꞌi mänꞌaki ha rä fadi de Romä. Nubye̱, Pablo mi pädi ge ma dä tho, hänge bi yꞌopäbi Timoteo ꞌne bi ꞌñembi ge nguntꞌä xä ma pa xä nuu. Bi yꞌofo: “Xtä yꞌo mänjuäntho ha rä ꞌñuu Äjuä ꞌne näꞌä ma dä jäpigi”. Himbi thogi ndunthi yä je̱ya de nuꞌmu̱ xki du Pablo, rä hnini Jerusalen bi uadi mänꞌaki, pe nubye̱ yä romäno go geꞌu̱ bi huati.

Pe bi tꞌofo märꞌa yä mfistꞌofo de rä Mäkä Tꞌofo. Jeoba bi huahni rä apostol Juan pa bi yꞌofo nuꞌu̱ yä gäxä mfistꞌofo, ꞌnehe bi yꞌofo rä mfistꞌofo Apocalipsis. Nunä mfistꞌofo mää te ma dä thogi mꞌe̱fa. ¿Gi ne gi pädi? Ma gä handihu̱.