CHAWILAMPEʼ ri täq chʼichʼ ximom che uqʼabʼ ri Pablo, xuqujeʼ chawilaʼ ri ajchʼoj romano tijan kuchajej. Pablo tzʼapal pa Roma. Riyem che Cesár romano kuchomaj su kubʼan che. Chiʼ tzʼapalik, xyaʼ che, che nikʼaj chik winaq kekilaʼ.

Qʼaxnäq chi oxibʼ qʼij che xopan Roma, Pablo xubʼij chike nikʼaj ajkʼamal bʼe judíos kepe che rilik. Rumal laʼ, kʼi täq judíos rech Roma xekilaʼ. Pablo xuya ubʼixik chirij ri Jesús xuqujeʼ chirij rajawbʼäl ri Ajawaxel chike. E kʼo jujun xkekojo tekʼuriʼ xkebʼan cristianos, e kʼo nikʼaj che xkekoj ta ri xbʼix chike.

Pablo xuya ubʼixik utzij ri Ajawaxel chike jalajoj täq ajchʼoj che kkechajej. Pa ri kebʼ junabʼ tzʼapalik, Pablo xuya ubʼixik ri tzij chike kojonel ri xeʼopan che rilik. Xuqujeʼ ri e kʼo pa rachoch ri César xketa ri utzalaj täq tzij rech ri Ajawbʼäl, nikʼaj chike wariʼ xkebʼan cristianos.

Tekʼuriʼ, ¿jachin laʼ xerilaʼ ri Pablo tijan ktzʼibʼan puwiʼ ri mesa? ¿La awetaʼm jachin laʼ? Jeʼ, are Timoteo. Areʼ xuqujeʼ xtzʼapixik rumal che xuya ubʼixik chirij ri Ajawbʼäl, tekʼuriʼ kimik tzʼapal ta chik. Xpe che utoʼik ri Pablo. ¿La awetaʼm su tijan kutzʼibʼaj? Chqilampeʼ.

¿La xsach ta pa ajolom ri täq tinamit Filipos xuqujeʼ Éfeso kʼo pa ri bʼantajik 110? Pablo xtobʼan che ubʼanik täq congregaciones cristianas chilaʼ. Chiʼ Pablo tzʼapalik xutzʼibʼaj täq wuj chike wa täq cristianos. Ri täq wuj ubʼiʼ Efesios xuqujeʼ Filipenses, e kʼo pa ri Loqʼalaj Pixabʼ. Kimik ri Pablo xubʼij che Timoteo su kutzʼibʼaj chike ri täq kachiʼl cristianos e kʼo Filipos.

Ri täq filipenses xkebʼan utzilal che ri Pablo. Xketaq bʼi jun sipanik che, rumal laʼ Pablo tijan kumaltyoxij chike pa ri wuj. Epafrodito are xkʼamaw lo ri sipanik. Wajun achi xuriq yabʼil xuqujeʼ xa jubʼiqʼ xraj xkamik. Kimik utz chik tekʼuriʼ kkunik ktzalij pa utinamit. Areʼ xukʼam bʼi ri wuj kech Pablo rukʼ Timoteo chiʼ xtzalij Filipos.

Chiʼ Pablo tzʼapalik xutzʼibʼaj chi nikʼaj wuj kʼo pa ri Loqʼalaj Pixabʼ. Jun chike are xutaq chike ri cristianos e kʼo pa ri tinamit Colosas. ¿La awetaʼm su ubʼiʼ? Colosenses ubʼiʼ. Ri jun chik wuj xutaq bʼik, xaq xiw che ri rachiʼl ubʼiʼ Filemón kʼo Colosas. Ri wuj kchʼaw chirij Onésimo, ri ajpatanel rech Filemón.

Onésimo xanmaj bʼi chuwäch Filemón tekʼuriʼ xpe Roma. Onésimo xretaʼmaj che Pablo tzʼapal waral Roma. Rumal laʼ xerilaʼ, xuqujeʼ Pablo xuya ubʼixik ri utzij ri Ajawaxel che. Ri Onésimo xubʼan cristiano chanim. Kimik Onésimo kʼäx xunaʼo che xanmajik. Rumal laʼ, ¿la awetaʼm su xutzʼibʼaj Pablo pa ri wuj xutaq bʼi che Filemón?

Pablo xuta che Filemón che kusach umak ri Onésimo. ‹Kintzelej bʼi chawe›, xchaʼ Pablo. ‹Kimik xaq xiw ta chi amos. Xuqujeʼ jun utzalaj achalal cristiano chik.› Chiʼ Onésimo xtzalij pa Colosas, xukʼam bʼi ri kebʼ wuj, jun kech ri täq colosenses, ri jun chik rech Filemón. ¡Chachomajampeʼ che ri Filemón xkikotik chiʼ xretaʼmaj che ri umos, Onésimo, kimik cristiano chik junam rukʼ areʼ!

Chiʼ Pablo xutzʼibʼaj chike ri filipenses xuqujeʼ che ri Filemón, xubʼij che su utz täq kukʼulmataj na. ‹Kintaq bʼi Timoteo iwukʼ›, xchaʼ Pablo chike ri filipenses. ‹Xuqujeʼ kixinsolij in›, che Filemón xutzʼibʼaj wariʼ: ‹Chatzukuj jun lugar rech kinkanaj wi›.

Chiʼ xel bʼi pa ri tzʼapibʼal, Pablo xbʼe che kilik ri täq rachalal cristianos pa kʼi täq tinamit. Tekʼuriʼ ri Pablo xtzʼapix chi pa Roma. Kimik retaʼm che kkamsaxik. Rumal laʼ xutzʼibʼaj che Timoteo che kpe chanim. ‹Nubʼanom sukʼ chuwäch ri Ajawaxel›, xchaʼ. ‹Areʼ kuya na tewchibʼäl chwe.› Chiʼ qʼaxnäq chi kebʼ oxibʼ junabʼ che xkam ri Pablo, xsach uwäch Jerusalén kumal ri täq romanos.

Chirij ri ukamikal ri Pablo xtzʼibʼax chi nikʼaj wuj kʼo pa Loqʼalaj Pixabʼ. Jehová xubʼan che ri apóstol Juan che xutzʼibʼaj ri täq kʼisbʼal täq wuj, jun chike are ri wuj rech Apocalipsis. Wajun wuj riʼ kchʼaw chirij ri petinäq. Kqil na su kbʼan na.