LUKU fa den keti Paulus èn luku fa a srudati fu Rome e hori wakti drape. Paulus na wan strafuman na ini Rome. A e wakti teleki a Kèiser fu Rome sa bosroiti san musu pasa nanga en. Aladi Paulus na wan strafuman, toku sma mag kon luku en.

Dri dei baka di Paulus kon na Rome, a e seni kari wan tu Dyu tiriman fu kon na en. Fu dati ede, furu Dyu na Rome e kon na en. Paulus e preiki gi den fu Yesus èn fu a Kownukondre fu Gado. Sonwan fu den e bribi èn e tron Kresten, ma trawan no e bribi.

Paulus e preiki tu gi den difrenti srudati, di musu luku en. Na ini den tu yari di den hori en dya leki strafuman, Paulus e preiki gi ala sma di e kon na en. Dati e meki, taki srefi sma fu na oso fu a Kèiser e yere a bun nyunsu fu a Kownukondre èn sonwan fu den e tron Kresten.

Ma suma na a fisitiman di e skrifi drape na a tafra? Yu kan rai suma na en? Iya, na Timoteyus. Timoteyus ben de na strafu tu fu di a ben preiki fu a Kownukondre, ma a kon fri baka. Èn a kon dya fu yepi Paulus. Meki wi go luku san Timoteyus e skrifi.

Yu e memre den foto Filipi nanga Efeise ete na ini Tori 110? Paulus ben yepi fu opo Kresten gemeente na den foto disi. Now, aladi Paulus de na strafu, toku a e skrifi brifi gi den Kresten disi. Den brifi de na ini Bijbel. Den e kari den Efeisesma nanga Filipisma. Paulus e fruteri Timoteyus now san a musu skrifi den Kresten mati na Filipi.

Den Filipisma ben de tumusi bun gi Paulus. Den ben seni wan presenti gi en dya na strafu. Èn now Paulus e taki den tangi fu dati. Epafroditus ben de a sma di ben tyari a presenti kon. Ma a ben kon siki te fu dede. Now a kon betre baka èn a klari fu drai go baka na oso. A sa tyari a brifi disi fu Paulus nanga Timoteyus go nanga en te a e go baka na Filipi.

Aladi Paulus de na strafu, toku a e skrifi ete tu brifi di wi abi na ini Bijbel. A wan de gi den Kresten na a foto Kolose. Yu sabi fa a brifi nen? Kolosesma. A trawan na wan brifi gi wan bun mati di nen Fileimon èn di e libi na Kolose. A brifi e taki fu a futuboi fu Fileimon, Oneisimus.

Oneisimus ben lowe fu Fileimon èn ben kon na Rome. Awansi fa a no fa, a ben yere taki Paulus ben de dya na strafu. A ben kon luku en èn Paulus ben preiki gi Oneisimus. Heri esi Oneisimus ben tron wan Kresten. Now Oneisimus e sari taki a ben lowe. Yu sabi san Paulus e skrifi fu dati ede na ini a brifi gi Fileimon?

A e aksi Fileimon fu gi Oneisimus pardon. ’Mi e seni en kon baka na yu’, Paulus e skrifi. ’Ma now a no de yu futuboi wawan. A de wan bun Kresten brada tu.’ Te Oneisimus e drai go baka na Kolose, a e tyari den tu brifi disi go nanga en, a wan brifi gi den Kolosesma èn a trawan gi Fileimon. Yu kan prakseri o bigi a prisiri fu Fileimon de te a e yere taki en futuboi tron wan Kresten.

Te Paulus e skrifi gi den Filipisma èn gi Fileimon, dan a abi trutru bun nyunsu. ’Mi e seni Timoteyus kon na unu’, Paulus e taigi den Filipisma. ’Ma misrefi sa kon luku unu gaw.’ Èn gi Fileimon a e skrifi: ’Bigin sreka wan sribipresi gi mi drape.’

Baka di Paulus kon fri, dan a e go luku den Kresten brada nanga sisa na ini furu presi. Ma bakaten Paulus de baka leki strafuman na Rome. A tron disi a sabi taki den o kiri en. Dati meki a e skrifi Timoteyus èn e aksi en fu kon esi-esi na en. ’Mi ben tan getrow na Gado,’ Paulus e skrifi, ’èn Gado sa pai mi.’ Wan tu yari baka di den kiri Paulus, den e pori Yerusalem ete wan tron, a tron disi nanga anu fu den Romesma.

Ma moro de ete na ini Bijbel. Yehovah Gado meki na apostel Yohanes skrifi den lasti buku fu Bijbel, makandra nanga a buku Openbaring. A buku disi fu Bijbel e fruteri fu a ten di e kon. Meki wi go leri now san a ten di e kon sa tyari kon.