BUKA lamaketane lasemikhonweni yaPawula, buka futsi nalelisotja laseRoma lelimgadzile. Pawula usiboshwa eRoma. Umele kutsi Khesari waseRoma asho kutsi uncuma kwentani ngaye. Njengoba asiboshwa, bantfu bebavumelekile kutsi bamvakashele.

Ngemuva nje kwemalanga lamatsatfu aseRoma, wabhalela baholi bemaJuda tincwadzi wacela kutsi bete batemhlola. Ngako-ke manyenti kakhulu emaJuda laseRoma leta kutemhlola. Pawula washumayela kuwo ngaJesu nangembuso waNkulunkulu. Labanye kuwo bakholwa futsi baba ngemaKhristu, kodvwa labanye abakholwanga.

Pawula waphindze washumayela nalamasotja lahlukahlukene labemgadza. Iminyaka lemibili layichitsa alapha ejele, washumayela bonkhe bantfu labekababona. Ngenca yaloko, ngisho nalabanye bemndeni waKhesari beva ngetindzaba letinhle teMbuso, futsi labanye babo baba maKhristu.

Kodvwa ngubani lolovakashele Pawula lobhalako lapha etafuleni? Ungacombelela? NguThimothi. Thimothi naye abeboshelwe kushumayela ngeMbuso, kodvwa waphindze wakhululwa. Ute lapha ejele kute atewusita Pawula. Uyati kutsi ubhalani? Ase sibone.

Uyawakhumbula emadolobha lamabili, laseFiliphi nelase-Efesu lesifundze ngawo eNdzabeni yesi-110? Pawula wasita kutsi kwakhiwe emabandla ebuKhristu kulawo madolobha. Njengoba alapha ejele, abebhalela emaKhristu akulawo mabandla tincwadzi. Letincwadzi tiseBhayibhelini, futsi tibitwa ngekutsi incwadzi yebase-Efesu neyabaseFiliphi. Kulesitfombe, Pawula utjela Thimothi loko lokufanele akubhalele emaKhristu labangani babo baseFiliphi.

EmaKhristu aseFiliphi abenemusa kakhulu kuPawula. Amtfumelela sipho akhona lapha ejele, ngako abewabhalela abonga leso sipho. Ephafrodithu nguye lowaletsa lesipho. Kodvwa watsi nakefika, wagula wacishe wafa. Manje abesaphilile, futsi asalungele kubuyela emuva ekhaya. Nakabuyela eFiliphi, abetawuhamba nalencwadzi boPawula naThimothi labebayibhalile.

Aselapha ejele, Pawula waphindze wabhala tincwadzi letimbili lesinato eBhayibhelini. Lenye wayibhalela emaKhristu asedolobheni laseKholose. Uyayati kutsi ibitwa ngekutsini eBhayibhelini? Kutsiwa yincwadzi yebaseKholose. Lena lenye yona abeyibhekise kumngani wakhe losedvute ligama lakhe lokunguFilemoni, naye abehlala eKholose. Lencwadzi yayikhuluma ngesisebenti saFilemoni lesingu-Onesimuse.

Onesimuse wabalekela Filemoni waya eRoma. Nguloko lokwamenta wati kutsi Pawula uboshiwe. Weta kutemvakashela, Pawula wabese sewuyamshumayela. Ngekushesha lokukhulu Onesimuse waba ngumKhristu. Manje weva buhlungu ngekutsi wabalekela Filemoni. Uyati kutsi Pawula yini layibhala kulencwadzi leya kuFilemoni?

Abemcela kutsi acolele Onesimuse. Pawula wabhala watsi: ‘Ngimtfumela emuva kuwe, kodvwa manje akasasiso nje sisebenti sakho kuphela, sewungumzalwane wakho futsi.’ Nakabuyela emuva eKholose, Onesimuse abephetse letincwadzi totimbili, lenye yayiya kubaseKholose kantsi lena lenye iya kuFilemoni. Singacabanga nje kutsi abejabule kanganani Filemoni nakeva kutsi sisebenti sakhe sesingumKhristu.

Pawula nakabhalela Filemoni nebaseFiliphi, abenetindzaba letinhle labefuna kubatjela tona. Watsi kubaseFiliphi: ‘Ngitfumela Thimothi kini, kodvwa nami ngitanivakashela masinyane.’ KuFilemoni watsi: ‘Ngilungisele indzawo lengitawuhlala kuyo nangifika lapho.’

Watsi nje nakakhululwa ejele Pawula, wavakashela bazalwane nabodzadze wakhe labangemaKhristu etindzaweni letinyenti. Kodvwa kamuva waphindze waboshwa futsi eRoma. Abati kamhlophe-ke manje kutsi utawubulawa. Ngako wabhalela Thimothi futsi wacela kutsi ete kuye masinyane. Watsi kuye: ‘Bengetsembekile kuNkulunkulu, futsi yena utanginika umvuzo.’ Ngemuva nje kweminyaka lembalwa abulewe Pawula, liJerusalema laphindze labhujiswa. Manje lase libhujiswa ngemaRoma.

Kodvwa kunalokunyenti lokukhulunywa ngako eBhayibhelini. Nkulunkulu Jehova wenta kutsi umphostoli Johane abhale tincwadzi tekugcina teliBhayibheli, kuhlanganise nencwadzi yeSembulo. Lencwadzi yeSembulo isitjela ngelikusasa. Ase sifundze manje ngekutsi likusasa lisiphatseleni.