ATAYÁÁ cadena rí kaxto̱ʼóo ga̱jma̱a̱ ñawúunʼ Pablo, ga̱jma̱a̱ atayáá soldado bi̱ nindxu̱u̱ romano bi̱ xtáa rañewu̱u̱n. Pablo xtáa náa guʼwá e̱jua̱nʼ dí rígá náa Roma. Xtáa gíʼthuun asndu índo̱ César bi̱ xtáa náa Roma maʼthí ndiéjunʼ gagumaa. Índo̱ xtáa náa guʼwá e̱jua̱nʼ nuniñanʼ rí maguwáʼ gúyáá xa̱bu̱.

Ajtsú mbiʼi nda̱wa̱á rí niguáʼnu náa xuajin Roma, Pablo na̱nda̱ʼa̱ rí maguwáʼ gúyáá tikhun xa̱bu̱ ede̱ bi̱ nindxu̱ún judío. Ikha jngó mbaʼin xa̱bu̱ judío bi̱ kuwa náa xuajin Roma naguwaʼ. Pablo naʼthúún ga̱jma̱a̱ numuu Jesús ma̱ngaa reino ndrígóo Dios. Tikhuun nunimbu̱ún ga̱jma̱a̱ nanindxu̱ún cristianos, mú eʼwíínʼ na̱nguá enimbu̱ún.

Pablo ma̱ngaa naʼtáruʼun mbaʼin soldados bi̱ nuñawa̱a̱n. Nákha Pablo nixtáa a̱jma̱ tsiguʼ náa guʼwá e̱jua̱nʼ, ikhaa niʼtáruʼun xúgínʼ xa̱bu̱. Dí nirígá rígi̱, asndu náa goʼwóo César nidxawíín ajngáa rí májánʼ ndrígóo Reino, ga̱jma̱a̱ tikhuun dí ikhiin naguanu nanindxu̱ún cristianos.

Mú, tsáa ñajunʼ bi̱ gíiʼ náa mesa, bi̱ xtáa raʼnirámáʼ i̱yi̱i̱ʼ rá. Lá natayáá tsáa nindxu̱u̱ ráʼ. Xúʼko̱, ikhaa nindxu̱u̱ Timoteo. Ikhaa ma̱ngaa nixtáa náa guʼwá e̱jua̱nʼ numuu rí niʼtáraʼa ga̱jma̱a̱ numuu Reino, mú xúgi̱ nigájna̱a̱ náa guʼwá e̱jua̱nʼ. Ni̱ʼkha̱ gambáyuu Pablo. Lá natayáá rí eʼnirámáʼ xáʼ. Guʼyáá.

Lá narmáʼáan a̱jkia̱nʼ rí náa historia 110 niʼthí ga̱jma̱a̱ numuu xuajin Filipos ga̱jma̱a̱ xuajin Éfeso ráʼ. Pablo niguguambáá mu marigá congregación ikhí. Rí xúgi̱, Pablo naʼnirámáʼ carta asndu náa guʼwá e̱jua̱nʼ mu makuʼma náa inún cristianos bugi̱. Carta rígi̱ nagumbiʼyuu Efesios ga̱jma̱a̱ Filipenses, dí rígá náa Biblia. Rí xúgi̱ Pablo naʼthúu̱n Timoteo ndiéjunʼ gaʼnirámáʼ náa cristianos bi̱ nambáxu̱u̱n májánʼ gajmiún bi̱ kuwa náa Filipos.

Xa̱bu̱ bi̱ kuwa náa Filipos ninindxu̱ún májánʼ wéñuʼ a̱jkiún gajmiún Pablo. Nuxuʼma regalo asndu náa guʼwá e̱jua̱nʼ rí kraʼaa, ikha jngó Pablo naxnáala núma̱aʼ. Epafrodito nindxu̱u̱ bi̱ ni̱ʼkha̱ kayóo regalo. Mú ikhaa niʼniuu wéñuʼ nandii rí itháan makhañúu. Rí xúgi̱ xtáa májánʼ mbu̱júu̱ ga̱jma̱a̱ nacha̱ má gáʼga̱a̱ náa xuajñu. Ikhaa maʼga̱ kayóo carta ndrígóo Pablo ga̱jma̱a̱ Timoteo índo̱ gátanga̱a̱ náa xuajin Filipos.

Pablo naʼnirámáʼ náa guʼwá e̱jua̱nʼ a̱jma̱ carta rí na̱ʼkha̱ náa Biblia. Mbóo niʼni mu maʼga̱ náa inún cristiano bi̱ kuwa náa xuajin Colosas. Lá natayáá xú káʼnii mbiʼyuu ráʼ. Carta rígi̱ nagumbiʼyuu Colosenses. Imbo̱o̱ carta na̱jkha̱ náa inuu Filemón bi̱ nambáxu̱u̱ májánʼ ga̱jma̱a̱ bi̱ xtáa náa xuajin Colosas. Náa carta naʼthí ga̱jma̱a̱ numuu Onésimo, bi̱ nañajunʼ náa xa̱bu̱ bi̱ nagumbiʼyuu Filemón.

Onésimo xtáa rañejunʼ náa Filemón índo̱ nigáyúu mu ma̱ʼkha̱ náa xuajin Roma. Onésimo niʼdxuun rí Pablo xtáa gi̱i̱ náa guʼwá e̱jua̱nʼ. Ni̱jkha̱ gáʼyoo, ikhú Pablo niʼthúu̱n ga̱jma̱a̱ numuu Dios. Nacha̱ Onésimo nanindxu̱u̱ cristiano. Rí xúgi̱ Onésimo nagáwíínʼ a̱jkiu̱u̱n numuu rí nigáyúu. Ikha jngó, lá natayáá rí eʼnirámáʼ Pablo náa carta rí maʼga̱ náa inuu Filemón ráʼ.

Pablo naʼthúu̱n Filemón rí maʼni mba̱a̱ a̱jkiu̱u̱n kaʼyoo Onésimo. Pablo naʼnirámáʼ: ‹Nakuʼmáa maʼga̱a̱ náa ikháánʼ mbu̱júu̱. Mú xúgi̱ raʼkháa índo bi nañajunʼ náa ikháánʼ. Ma̱ngaa nindxu̱u̱ mbáa ndxájulú cristiano›. Índo̱ Onésimo natanga̱a̱ náa xuajin Colosas, na̱jkha̱ kayóo a̱jma̱ carta rígi̱, mbóo na̱jkha̱ náa inún a̱ngiu̱lú bi̱ kuwa náa xuajin colosenses ga̱jma̱a̱ imbo̱o̱ na̱jkha̱ náa inuu Filemón. ¡Ra̱ʼkhá tháán nixtáa gagi Filimón índo̱ ndiʼyoo rí Onésimo bi̱ nañajunʼ náa ikhaa ninindxu̱u̱ cristiano xó má ikhaa!

Índo̱ Pablo naʼnirámáʼ carta rí maʼga̱ náa inún a̱ngiu̱lú bi̱ kuwa náa xuajin filipenses ga̱jma̱a̱ náa inuu Filemón, naʼthúún mbá rí májánʼ wéñuʼ. Pablo naʼthúún a̱ngiu̱lú bi̱ kuwa náa filipos: ‹Nakuʼmáa Timoteo maʼga̱ náa ikháanʼ, mu nacha̱ má maʼgá gayalá mangúún›. Ga̱jma̱a̱ Filemón, naʼthúu̱n náa carta: ‹Atayááʼ mbá guʼwá náa ma̱ndoo maguanúʼ›.

Índo̱ Pablo nagájna̱a̱ náa guʼwá e̱jua̱nʼ, ikhú na̱jkha̱ gáʼñun a̱ngui̱i̱n bi̱ ñajunʼ cristiano bi̱ kuwa náa mbaʼa xuajin. Mú nda̱wa̱á nuxuda̱ʼ mbu̱júu̱ Pablo náa guʼwá e̱jua̱nʼ dí rígá náa xuajin Roma. Rí xúgi̱ ikhaa ndaʼyoo rí muxiyáa. Ikha jngó naʼnirámáʼ náa Timoteo rí ma̱ʼkha̱ nacha̱. Ikhaa naʼnirámáʼ: ‹Ninindxu̱ʼ mbáa xa̱bu̱ jmbi náa Dios, ga̱jma̱a̱ ikhaa má gáʼni tsajkuramúnʼ›. Mbá nguátha tsiguʼ nda̱wa̱á rí nikháñu Pablo, Jerusalén naguma gámbáa mbu̱júu̱, mú xúgi̱ xa̱bu̱ romanos ñajúnʼ bi̱ nuni gámbáa.

Mú náa Biblia naʼthí xóo itháan. Jeobá naʼni rí apóstol Juan maʼnirámáʼ libro rí na̱ʼkha̱ nda̱wa̱á kayuʼ, mbá dí ikhaa ñajunʼ Rí huasjŋgajma Juan. Libro rígi̱ naʼthí rí gárígá nda̱wa̱á. Rí xúgi̱ guʼyáá ndiéjunʼ rí gárígá nda̱wa̱á.