113-нҗи хекая

Павлус Римде

ЭЛИ зынҗырлы Павлусы хем-де янындакы гаравулы гөрйәңми? Павлус хәзир Рим түрмесинде. Ол Рим хөкүмдарының берҗек җезасына гарашяр. Павлус туссагда болса-да, онуң янына адамлар гелип билйәрди.

Риме гелип, үч гүнден Павлус янына ехуды ёлбашчылары чагыряр. Шейлеликде, онуң янына Римде яшаян энчеме ехудылар хем гелйәр. Павлус олара Иса ве Худайың патышалыгы барада вагыз эдйәр. Кәбир адамлар ынанып, месихчи боляр, кәбирлери болса оңа ынанмаяр.

Павлус гаравул дуран эсгерлере хем вагыз эдйәр. Ики йылың ичинде Павлус түрмедәки хемме адамлара вагыз этди. Хатда хөкүмдарың өйүндәки адамлар хем Патышалык барадакы хабары эшидйәр. Шейдип, оларың хем кәбири месихчи боляр.

Эйсем, хат язян адамың кимдигини билйәңми? Догры, ол Тимотеос. Патышалык барада вагыз эдени үчин Тимотеос хем түрмеде отурыпды, йөне ол түрмеден бошады. Хәзир ол Павлуса көмек этмәге гелди. Тимотеосың нәме язяныны билйәңми? Гел, билели.

Ядыңдамы, 110-нҗы хекаяда Филипи ве Эфесос шәхерлери барада гүррүң эдипдик? Павлус шол шәхерлерде йыгнак дөретмәге көмек эдипди. Ынха, түрмедекә Павлус шол месихчилере хат язяр. Шол хатлара Мукаддес Язгыларда «Эфеслилер» хем-де «Филипилилер» дийилйәр. Эдил шу вагт Павлус Тимотеос аркалы Филипи шәхериндәки доганлара хат язяр.

Филипилилер Павлуса көп ягшылык этди. Олар түрмә совгат ибердилер. Павлус мунуң үчин олара сагболсун айдяр. Совгатлары Эпафродит гетирйәр. Йөне ол агыр кеселләп, тас өлүпди. Хәзир онуң ягдайы говулашыпды. Басым өйүне доланмалыды. Ол Павлусың хем-де Тимотеосың хатыны яны билен Филипи шәхерине әкидер.

Павлус түрмедекә ене ики саны хат язяр. Шол хатлар хәзир Мукаддес Язгыларда бар. Оларың бирини Колосе шәхериндәки месихчилере язяр. Шол хатың адыны билйәңми? Оңа «Колоселилер» дийилйәр. Павлус икинҗи хатыны Колосе шәхериндәки якын досты Филимуна язяр. Шол хатда Филимуның гулы Онесимус барада айдыляр.

Онесимус Филимундан гачып, Риме гелйәр. Бир себәп билен ол Павлусың түрмеде отураныны билйәр. Павлусың янына геленде, ол оңа вагыз эдйәр. Тизден Онесимус хем месихчи боляр. Инди Онесимус гачанына гынаняр. Инди Павлусың Филимуна нәме барада язаныны билйәңми?

Ол Филимундан Онесимусы багышламагы хайыш эдйәр. Павлус: «Мен саңа Онесимусы ызына иберйәрин. Ол инди диңе бир гул дәл. Эйсем, говы месихчи доганымыз» дийип, Филимуна язяр. Онесимус Колосе шәхерине яны билен ики хат әкидйәр. Бирини колоселилере, бейлекисини болса Филимуна берйәр. Филимун гулуның месихчи боланына нәхили бегенендир!

Павлусда филипилилере хем-де Филимуна хат язмак үчин говы тәзелик барды. Ол филипилилере: «Мен сизе Тимотеосы иберйәрин. Йөне басым өзүм хем барарын» диййәр. Филимуна болса: «Мен ол ерде болар ялы җай тайярла» дийип язяр.

Павлус түрмеден бошап, көп ерлердәки месихчи доган-уяларыңка баряр. Йөне Павлусы ене-де Римде түрмә басярлар. Бу гезек өзүниң өлдүрилҗегини билйәрди. Шонуң үчинем ол Тимотеосдан тиз гелмеги хайыш эдйәр. Ол хатында: «Мен Худая вепалы болдум. Ол маңа пата берер» дийип язяр. Павлусың өлдүриленине бирнәче йыл гечйәр. Иерусалим икинҗи гезек йыкыляр. Бу сапар оны римлилер йыкяр.

Эмма Мукаддес Язгылар мунуң билен гутармаяр. Ехова Худай Яхя ресула Мукаддес Язгыларың иң соңкы китапларыны хем-де Ылхам китабыны яздыряр. Мукаддас Язгыларың Ылхам китабында гелеҗек барада айдыляр. Гел, инди гелеҗек барада билели.

Ресулларың ишлери 28:16—31; Филипилилер 1:13; 2:19—30; 4:18—23; Еврейлер 13:23; Филимун 1—25; Колоселилер 4:7—9; 2 Тимотеос 4:7—9.