Makani 113: Paulu mu Loma
LANGA nketani kuli Paulu, alimwi langa sikalumamba muna Loma uumulindilila. Paulu mwaange mu Loma. Ulalindila kusikila Kaisala waku Loma aambe ncobaya kumucita. Kali muntolongo, bantu balazumizyigwa kumubona.
Kwiinde mazuba otatwe Paulu naasika ku Loma, watumya mulomo kubasololi baba Juda kuti bazyi kumubone. Aboobo banji ba Juda baku Loma baboola. Paulu wabakambaukila makani aamba zya Jesu abwami bwa Leza. Ibamwi basyoma akuba Banakristo, pele bamwi tiibasyoma pe.
Alimwi Paulu wakambauka akuli basikalumamba baindenyi-indenyi bamulindilila. Kwamyaka yobilo njaakkede muno kali mwaange, Paulu wali kukambauka kufwumbwa kumuntu. Akaambo kakucita boobu, nibaba bamukwasyi wa Kaisala bamvwa makani mabotu aa Bwami, eelyo bamwi baba Banakristo.
Pele ino ngwani mweenzu ooyu uulemba atebulu? Zumba tubone. Ngu Timoti. Awalo Timoti wakali muntolongo akaambo kakukambauka makani aa Bwami, pele wakaangululwa. Waboola kuno kutegwa azyikugwasye Paulu. Hena ulicizyi Timoti ncalemba? Atubone.
Hena ulauyeeya munzi wa Filipi awa Efeso mu Makani 110? Momuminzi eeyo Paulu mwaakagwasya kutalisya mbungano zya Banakristo. Lino Paulu kali muntolongo, wakalemba magwalo kulembela Banakristo aaba. Magwalo aaya nkwaali mu Bbaibbele, alimwi aitwa kuti Ba-Efeso a Ba-Filipi. Paulu aawa waambila Timoti nceelede kulemba kulembela Banakristo beenzyinyina baku Filipi.
Bana Filipi bakali kumuyanda kapati Paulu. Bamutumina cipego muno muntolongo, aboobo lino Paulu ncalemba lugwalo kubalumba. Epafuloditasi ngomuntu wakaleta cipego. Pele wakaciswa kapati calufwu. Lino waba kabotu, aboobo ulilibambide kujokela kumunzi. Ulalutoleezya lugwalo oolu lwazwa kuli Paulu a Timoti ajokela ku Filipi.
Paulu kacili muntolongo, walemba alimwi aamwi magwalo obilo ngotujisi mu Bbaibbele. Lumwi luya ku Banakristo bamumunzi wa Kolose. Hena uliluzyi mbolwiitwa? Lwiitwa kuti Ba-Kolose. Lumwi ndugwalo lwakwe luya kumweenzyinyina mwini-mwini wiitwa kuti Filimoni uukkala mu Kolose. Lugwalo lwaamba Onesimo mubelesi wa Filipo.
Onesimo wakaccija kuli Filipo akuboola ku Loma. Kwiinda munzila eeyi, Onesimo wakamvwa kuti Paulu uli muntolongo kuno. Wakaboola kumubona, eelyo Paulu wakamukambaukila Onesimo. Ino-ino awalo Onesimo wakaba Munakristo. Lino Onesimo wausa kapati akaambo kakuti wakaccija. Aboobo hena ulicizyi Paulu ncalemba kuli Filimoni mulugwalo oolu?
Paulu ulomba Filimoni kuti amulekelele Onesimo. Paulu ulalemba kuti: ‘Ndamutumizya kuli nduwe. Pele lino tali buyo mubelesi wako. Mukwesu Munakristo uuli kabotu.’ Ajokele Onesimo ku Kolose, watoleezya magwalo obilo, lomwe luya kubana Kolose, pele lumwi luya kuli Filimoni. Katuyeeya buyo mbwaakakondwa Filimoni naakamvwa kuti mubelesi wakwe waba Munakristo.
Paulu naalemba kubana Filipi akuli Filimoni ulijisi makani mabotu ncobeni. Paulu waambila bana Filipi kuti: ‘Ndamutumizya Timoti kuli ndinywe. Pele andime ndiya kuboola ino-ino kuzyi kumubona.’ Alimwi kuli Filimoni walemba kuti: ‘Undibambile busena bwakukkala ooko.’
Aangululwe buyo Paulu, waswaya ibanyina abacizyi Banakristo mumasena manji. Pele kumpela Paulu waangwa alimwi ku Loma. Lino wazyiba kuti uya kujaigwa. Aboobo walemba kuli Timoti akumulomba kuti aboole cakufwambaana. Paulu walemba kuti: ‘Ndali kusyomeka kuli Leza, aboobo Leza uya kundipa bulumbu.’ Kwamyaka misyoonto kuzwa Paulu naajaigwa, Jelusalemu wanyonyoonwa alimwi, luno lweendo wakanyonyoonwa abana Loma.
Pele kuli zintu zinji mu Bbaibbele. Jehova Leza wacita kuti Johane alembe mabbuku aamamanino kubikkilizya abbuku lya Ciyubunuzyo. Eeli bbuku lya Bbaibbele lyaamba zyakumpela. Lino atwiiye zyakumpela.
Incito 28:16-31; Ba-Filipi 1:13; 2:19-30; 4:18-23; Ba-Hebrayo 13:23; Filimoni 1-25; Ba-Kolose 4:7-9; 2 Timoti 4:7-9.
Mibuzyo
- Mbabaani Paulu mbaakambaukila kali muntolongo mu Loma?
- Ngwani mweenzu acifwanikiso uuli atebulu, alimwi ncinzi ncamugwasya Paulu?
- Ngwani Epafuloditasi, alimwi ncinzi ncaakatoleezya naakajokela ku Filipi?
- Nkaambo nzi Paulu ncalemba lugwalo kumweenzyinyina Filimoni?
- Ncinzi Paulu ncaacita naangululwa, alimwi kumane ncinzi cacitika kuli nguwe?
- Ngwani Jehova ngwaabelesya kulemba mabbuku aakumamanino aa Bbaibbele, alimwi ncinzi bbuku lya Ciyubunuzyo ncolyaamba?
Mibuzyo aimwi
- Bala Incito 28:16-31 a Ba-Filipo 1:13.
Mbuti Paulu mbwaakacibelesya ciindi cakwe kali muntolongo mu Loma, alimwi mbuti kutazungaana kwakwe mulusyomo mbokwakajatikizya mbungano ya Banakristo? (Inc. 28:23, 30; Flp. 1:14)
- Bala Ba-Filipo 2:19-30.
Majwi nzi aakulumba Paulu ngaakaamba kuli Timoti akuli Epafuloditasi, alimwi mbuti mbotukonzya kwiiya cikozyanyo ca Paulu? (Flp. 2:20, 22, 25, 29, 30; 1 Kor. 16:18; 1 Tes. 5:12, 13)
- Bala Filimoni 1-25, Ci.
Kwiinda mukaambo nzi Paulu mwaakamuyumya-yumya Filimoni kucita cintu cibotu, alimwi mbuti eeci kubaalu mboili nzila iiyandika kuccilila sunu? (Fili. 9; 2 Kor. 8:8; Gal. 5:13)
Mbuti majwi aa Paulu aajanwa ku Filimoni 13, 14 mbwaatondezya kuti wakabikkila maano kumanjezyeezya aabantu mumbungano? (1 Kor. 8:7, 13; 10:31-33)
- Bala 2 Timoti 4:7-9, Ci.
Mbuti mbotukonzya kuba masimpe mbuli mwaapositolo Paulu kuti Jehova uya kutupa bulumbu ikuti twazumanana kusyomeka kusikila kumamanino? (Mt. 24:13; Heb. 6:10)
