KAʼAKXILHTI cadenas nema lichikanit Pablo chu kaʼakxilhti soldado tiku kuentajtlawama Pablo. Pablo tamaknukanit kpulachin kRoma. Kgalhima tuku natlawaniy mapakgsina xalak Roma. Akxni anta wilacha kpulachin maxkikan talakaskin kalakgapaxialhnanka.

Akgtutu kilhtamaku akxni xchanitta kRoma, Pablo skilh pi pulalinanin judíos kalakgminkgolh. Wa xlakata lhuwa judíos tiku kRoma lamakgolh lakgminkgolh. Pablo kalixakgatlilh xlakata Jesús chu xtamapakgsin Dios. Makgapitsi kanajlakgolh chu kstalaninanin Cristo wankgolh pero makgapitsi ni kanajlakgolh.

Pablo na kalixakgatliy xlakata Cristo, tanu tanu soldados tiku kuentajtlawamakgolh. Akxni tama akgtiy kata xtanuma kpulachin Pablo, tiku tlan katachuwinan kalixakgatliy xlakata xTamapakgsin Dios. Xlakata Pablo katiwa talichuwinan asta tiku xwilakgolh kxchik mapakgsina na kgaxmatkgolh xlakata xasasti xalakwan xlakata xTamapakgsin Dios chu makgapitsi kstalaninanin Cristo wankgolh.

Pero, ¿tiku uma xlakgapaxialhna tiku tsokgnama? ¿Katsiya wix tiku? Wa Timoteo. Timoteo na xtanuma kpulachin xlakata xlichuwinama xTamapakgsin Dios, pero uku maxtukanitta. Chu minit makgtayay Pablo. ¿Katsiya tuku tsokgma? Kaʼakxilhwi.

¿Lakapastaka kachikinin Filipos chu Éfeso nema akxilhwi ktakgalhtawakga 110? Pablo makgtayanalh xlakata anta natawilakgoy congregaciones. Chu uku xlakata kpulachin wi, anta katsokgnaniy uma kstalaninanin Cristo. Uma tatsokgni kawanikan Efesios chu filipenses anta wilakgolh kBiblia. Pablo waniy Timoteo tuku nakatsokgnani xtalalinaninkan tiku xalak Filipos.

Li Filipo lu tlan likatsinikgonit Pablo. Malakgachanikgolh akgtum tamaskiwin anta kpulachin wa xlakata Pablo kamalakgachanima tapaxtikatsinit. Epafrodito limilh tamaskiwin nema mastalikgocha li Filipos. Pero Epafrodito snun tatatlalh chu atsinu ni nilh. Chu uku ay paksnit chu naʼampara kxkachikin. Chu nalin xtatsokgni Pablo chu Timoteo akxni naʼan kFilipos.

Anta kpulachin Pablo na tsokgli amaktiy tatsokgni nema wi kBiblia. Maktum kamalakgachani kstalaninanin Cristo tiku wilakgolh kkachikin wanikan Colosas. ¿Katsiya wix la wanikan tama tatsokgni? Colosenses. Chu amaktum tatsokgni namaxkikan xtalalina Pablo xalak Colosas xtukuwani Filemón. Uma tatsokgni lichuwinan Onésimo chatum kskujni Filemón.

Onésimo tsalanicha Filemón chu milh kRoma. Max Onésimo wi tuku likatsilh pi Pablo xtanuma kpulachin. Wa xlakata alh lakgapaxialhnan chu Pablo lixakgatlilh xlakata Cristo. Ni makgas Onésimo na kstalanina Cristo wa. Chu uku Onésimo nitlan makgkatsiy xlakata tsalanitancha Filemón. Wa xlakata, ¿katsiya tuku tsokgnanilh Pablo Filemón?

Pablo skinilh Filemón pi katapatilh Onésimo. Waniy kxtatsokgni: Kpuspitniyan Onésimo pero uku nialh kaj miskujni nawan na mintala, na kstalanina Cristo. Akxni Onésimo taspitli kColosas lin maktiy tatsokgni, maktum tatsokgni nakamaxkiy congregación xalak Colosas chu amaktum maxki Filemón. ¡Katlawa la akxilhpat, max lu lipaxuwalh Filemón akxni katsilh pi kskujni na kstalanina Cristo!

Akxni Pablo katsokgnanilh li Filipos chu Filemón lhuwa tuku xatlan kamakatsini. Pablo kawaniy tiku xalak Filipos: Kkamalakgachaniman Timoteo. Pero ni makgas na nakkalakgapaxialhnanan. Chu Filemón waniy kxtatsokgni: Kakimakaxni niku naklhtatay.

Akxni Pablo maxtuka kpulachin kalakgapaxialhnalh kstalaninanin Cristo xala kaniwa. Pero alistalh, Pablo tamaknuparaka kpulachin kRoma. Chu uku Pablo ay katsiy pi namakgnikan. Wa xlakata tsokgnanilh Timoteo pi kalakgmilh lakapara. Chu na waniy: Akit nikxni a kmakgxtakga Dios chuntiya kskujnanima chu Dios nakisikulanatlaway. Chu ni akglhuwa kata akxni xninitta Pablo, Jerusalén malakgsputuparaka, pero uku li Roma malakgsputulh.

Pero kBiblia katuwa tuku tlakgku lichuwinan. Jehová tlawalh pi Juan katsokgli xaʼawatiya libros xalak Biblia chu maktum nema na tsokgli Juan wa Apocalipsis. Uma libro lichuwinan xlakata tuku aku nalay. Kaʼakxilhwi tuku aku nalay.