WONA a ngenje gi nga ka Paule, niku tlhela u cuwuka a musochwa loyi wa muRoma a mu lavelelako. Paule i peresu le Roma. Yena o rinzela kala Kesari wa muRoma a tsema mhaka ya lezi a lavako ku maha hi yena. Zalezo a nga peresu, a vanhu va vumeliwa a ku mu kamba.

Loku ku hunzile masiku manharu na Paule a chikele Roma yena i rumela a gezu lezaku a varangeli va vaJuda vata va ta wonana naye. Kota hlamulo, a vaJuda vo tala va lomu Roma va mu tela. Paule i xumayela ka vona xungetano hi Jesu ni mufumo wa Nungungulu. A vo kari vabye va kholwa zonake va maha vaKristu, kanilezi lava vanwani a va kholwi.

Paule kambe i xumayela ka masochwa yo hambanahambana lawa ma nga ni ntiro wa ku mu lavelela. A ka malembe mambiri lawa a tshamako laha kota peresu Paule i xumayela ka vanhu vontlhe lava a zi kotako. A bhinzu ga kona hi lezaku hambu ni va le ngangweni wa Kesari vazwa mahungu yo saseka ya Mufumo, zonake a vo kari vabye va maha maKristu.

Kanilezi himani a mupfhumba loyi a nga laha mezeni na a tsala zo kari ke? U nga dumba? Ina, hi Timote. Timote yenawu i wa hi paxweni hi kota ya ku xumayela hi Mufumo, kanilezi i tlhatlhilwe. Zonake yena i lota laha lezaku a ta vuna Paule. Wa zi tiva lezi Timote a tsalako? A hi woneni.

Wa ma alakanya a madoropa ya Filipi ni Efesusi lomu ka Tlhatlhambuto 110? Paule i vunetele ku vulula mabandla ya wuKristu ka madoropa lawo. Zalezi a nga paxweni, Paule i tsala mapapilo a ma rumela ka maKristu lawo. A mapapilo lawo ma lomu ka Biblia, niku ma vitwa ku ngalo Va Le Efesusi ni Va Le Filipi. Paule makunu o byela Timote lezi a faneleko ku tsalela vanghana vabye va maKristu va le Filipi.

A va le Filipi vave va nene nguvu ka Paule. Va mu rumelele xinyikiwo kwalaha paxweni, niku hizalezo Paule o va bonga hi xona. A wanuna loyi a nga neha a xinyikiwo lexo hi Epafroditusi. Kanilezi yena i lo babya nguvu laha ko kala a hi kusuhani ni kufa. Zalezi yena i mahile chukwana niku i ti longisele ku tlhelela kaya. Yena i ta teka a papilo ga Paule na Timote a tlhela nago Filipi.

Na a hi paxweni Paule i tsala manwani mapapilo mambiri hi nga nawo lomu ka Biblia. A ginwe giya ka maKristu ya le doropeni ga Kolosi. Wa zi tiva lezi gi vitaniswako zona? Va Le Kolosi. A ginwani papilo i gi tsalela munghana wakwe wa hombe a vitwako Filemoni loyi yenawu a tshamako le Kolosi. A papilo lego gi wulawula hi nanza ga Filemoni, Onesimusi.

Onesimusi i lo tsutsuma Filemoni ata Roma. Hi ndlela yo kari Onesimusi i lo tiva lezaku Paule i lomu paxweni kwalaho. Yena i lota a ta mu kamba, zonake Paule i lo xumayela Onesimusi. Hi xikhatanyana Onesimusi i lo maha muKristu yenawu. Zalezi Onesimusi wa ti sola hi lezi a nga tsutsuma. Makunu wa zi tiva lezi Paule a tsalako lomu ka papilo legi gi yako ka Filemoni?

Paule i kombela Filemoni lezaku a tsetselela Onesimusi. Paule i tsala lezi: ‘Nza mu rumela lezaku a tlhelela ka wena. Kanilezi yena makunu a nga hi nanza ga wena ntsena. Yena kambe makabye wa mu nene wa wuKristu.’ Laha Onesimusi a tlhelako Kolosi i teka a mapapilo lawo ya mambiri, a ginwe giya ka va le Kolosi ni legi ginwani giya ka Filemoni. Ha zi kota ku alakanyela a kutsaka loku Filemoni a ku kumako laha a tivako lezaku a nanza gakwe gi mahile muKristu.

Laha Paule a tsalelako va le Filipi na Filemoni, i na ni mahungu ya ma nene hakunene. Yena i byela va le Filipi ku ngalo: ‘Nza rumela Timote ka nwina. Kanilezi minawu nzi ta mu enzela lokuloku.’ Zonake, ka Filemoni, i tsala lezi: ‘Nzi longisele wutshamu laho lezaku nzi ta tshama kona.’

Laha Paule a tlhatlhiwako i enzela vamakabye va xinuna ni va xisati va wuKristu ka matshamu yo tala. Kanilezi loku ku hunzile xikhati Paule i tlhela a mahiwa peresu le Roma. A ka xikhati lexi yena wa zi tiva ku ngalo i ta dawa. Hikwalaho yena i tsalela Timote a mu kombela lezaku a mu tela hi kuhatlisa. Yena i tsala aku ngalo: ‘Nzi mahile wo tsumbeka ka Nungungulu, zonake yena i ta nzi chachazela.’ Loku ku hunzile malembe matsongwani anzhako ka ku dawa ka Paule, Jerusalema gi tlhela gi loviswa, a ka xikhati lexi hi vaRoma.

Kanilezi ku na ni zinwani lomu ka Biblia. Jehova Nungungulu i maha lezaku mupostoli Johani a tsala a mabhuku yo gumesa ya Biblia, a ku patsa ni bhuku ga Kuvululelwa. A bhuku lego ga Biblia gi wulawula hi wumanziko. A hi gonzeni makunu a ku zini lezi a wumanziko gi tako nazo.