Vhonani ngeḓane dzi re kha Paulo, ni vhone na ḽiswole ḽa Roma ḽine ḽa khou mu linda. Paulo ndi tshivhotshwa Roma. U khou lindela u swikela Kesare wa Roma a tshi humbula uri u ita mini ngae. E dzhele, vhathu vho vha vha tshi tendelwa u mu dalela.

Maḓuvha mararu Paulo o no swika Roma a rumela ipfi ḽa uri vhaṅwe vharangaphanḓa vha Vhayuda vha ḓe u mu vhona. Ha ḓa Vhayuda vhanzhi vha Roma, a vha ṱanziela nga ha Yesu na Muvhuso wa Yehova. Vhaṅwe vha tenda vha vha Vhakriste, vhaṅwe vha si tende.

Paulo a ṱanziela na kha maswole o fhambanaho e a vha e na mushumo wa u mu linda. Miṅwaha mivhili o dzudzwa afha sa tshivhotshwa Paulo a ṱanziela kha vhoṱhe. Ngauralo, na muṱa wa Kesare wa pfa nga ha mafhungo a Muvhuso, nahone vhaṅwe vhavho vha vha Vhakriste.

Fhedzi uyu mueni a khou ṅwalaho ndi nnyi? Ni nga bvumba? Ee, ndi Timotheo. Timotheo na ene o vha e dzhele nga u huwelela nga ha Muvhuso, fhedzi o vha o vhofhololwa. O vha o ḓa afha u thusa Paulo. Ni a ḓivha uri u khou ṅwalani? Kha ri vhone.

Ni a humbula muḓi wa Filipi na wa Efeso i re Mafhungoni a 110? Paulo o thusa u thoma zwivhidzo zwa Vhukriste miḓini yeneyo. Zwino, musi a dzhele, Paulo a ṅwalela avha Vhakriste marifhi. Marifhi a Bivhilini, a vhidzwa Vhaefesa na Vhafilipi. Paulo o vha a tshi khou vhudza Timotheo zwe a vha o fanela u ṅwalela khonani dzavho dza Vhakriste dza Filipi.

Vhafilipi vho vha vho rumela Paulo tshifhiwa afha dzhele, ngauralo o vha a tshi khou vha livhuha. Tsho vha tsho ḓiswa nga Epafrodito. Fhedzi a lwalesa a ṱoḓou fa. Zwino o vha o lugela u ya hayani. O vha a tshi ḓo ṱuwa na uvhu vhurifhi ha Paulo na Timotheo musi a tshi vhuelela Filipi.

Musi Paulo e dzhele o ṅwala maṅwe marifhi mavhili ane ra vha nao Bivhilini. Vhuṅwe ho vha vhu tshi ya kha Vhakriste vha Kolosa. Bivhilini vhu vhidzwa Vhakolosa. Vhuṅwe ndi vhurifhi he ha vha vhu tshi ya kha khonani i no pfi Filemoni we a vha a tshi dzula Kolosa. Vhu amba nga ha Onesimo muḓinḓa wa Filemoni.

Onesimo o vha o shavha Filemoni a ḓa Roma. Nga iṅwe nḓila Onesimo a pfa uri Paulo u dzhele henefho. Onesimo a ḓa u dala, Paulo a mu ṱanziela. Nga u ṱavhanya Onesimo a vha Mukriste. Zwino Onesimo a ḓisola nge a shavha. Ngauralo ni a ḓivha uri Paulo o ṅwala mini vhurifhini vhu yaho ha Filemoni?

Paulo o humbela Filemoni uri a hangwele Onesimo. Paulo a ṅwala: ‘Ndi khou mu vhuedzedza ha iwe, fhedzi zwino ha sokou vha muḓinḓa wau. U dovha a vha murathu wa Mukriste.’ Musi Onesimo a tshi vhuelela Kolosa a ṱuwa na aya marifhi mavhili, vhuṅwe vhu yaho ha Vhakolosa na vhuṅwe vhu yaho ha Filemoni. Ri nga tou humbulela uri Filemoni o takala hani musi a tshi pfa uri muḓinḓa wawe o vha Mukriste.

Musi Paulo a tshi ṅwalela Vhafilipi na Filemoni, o vha e na mafhungo maḓifha vhukuma. O vhudza Vhafilipi: ‘Ndi khou rumela Timotheo ha vhoinwi, fhedzi na nṋe ndi ḓo ni dalela zwenezwino.’ A ṅwalela Filemoni: ‘Ndugisele vhudzulo henefho.’

Musi Paulo o vhofhololwa a dalela vharathu vhawe na dzikhaladzi vha Vhakriste. Fhedzi nga murahu Paulo a dovha a itwa tshivhotshwa Roma. Itshi tshifhinga a zwi ḓivha uri u ḓo vhulawa. Ngauralo a ṅwalela Timotheo a mu humbela uri a ḓe nga u ṱavhanya. Paulo a ṅwala: ‘Ndo fulufhedzea kha Mudzimu, nahone u ḓo mpha malamba.’ Miṅwaha i si minzhi Paulo o no vhulawa, Yerusalema wa dovha wa fheliswa, zwino nga Vharoma.

Fhedzi hu na zwo engedzeaho Bivhilini. Yehova o ita uri muapostola Yohane a ṅwale bugu dzayo dza u fhedza, a katela na bugu ya Ndzumbululo. Bugu iyi i amba nga ha tshifhinga tshi ḓaho. Zwino kha ri gude zwe tshifhinga tshi ḓaho tsha zwi fara.

Mishumo 28:16-31; Vhafilipi 1:13; 2:19-30; 4:18-23; Vhaheberu 13:23;