ALOLE unyolo wamtaŵile nawo Paulowo, soni alole msilikali jwa Ciloma jwakumlolela Paulojo. Paulo sambano ali mkayidi ku Loma. Jwalakwe akulindilila yacalamule Kayisala jwa ku Loma kuti amtendele. Pali mkayidi, ŵandu akwakunda kwawula kukuwonegana najo.

Pali papite masiku gatatu Paulo cijawulile ku Loma, akutumisya utenga kwa acimlongola ŵa Ciyuda kuti ayice kukumlola. Kaneko, Ayuda ŵajinji ŵa ku Loma akwisa. Paulo akwalalicila jemanjajo pakwamba ya Yesu, soni ucimwene wa Mlungu. Ŵane akukulupilila, soni akuŵa Aklistu, nambo ŵane ngakukulupilila.

Paulo akwalalicilasoni asilikali ŵakulekanganalekangana ŵakumlolela. Kwa yaka yiŵili yaŵele mu ukayidi akuno, Paulo akulingalinga kumlalicila jwalijose. Yakuyicisya yakwe yili yakuti, atamose ŵandu ŵa m’nyumba ja Kayisala akupikana utenga wambone wa Ucimwene, soni ŵane mwa jemanjajo akuŵa Aklistu.

Nambo ana mlendo jwakulemba patebuloju ali nduni? Ana mpaka akombole kummanyilila? Jwalakwe ali Timoteyo. Nombe najo Timoteyo ŵalijisoni mu ukayidi ligongo lyakulalicila ya Ucimwene, nambo jwalakwe ŵamgopwele. Sambano jwalakwe ayice akuno kukumkamucisya Paulo. Ana akumanyilila yakulemba Timoteyojo? Kwende tulole.

Ana akujikumbucila misinda ja Filipi ni Efeso jajili mu Ngani 110? Paulo ŵakamucisye kutandisya mipingo ja Ciklistu m’misindaji. Sambano pali ku ukayidi, Paulo akwalembela yikalata Aklistu ŵa m’misinda jeleji. Yikalatayi yili mu Baibulo, soni yikusakolanjikwa kuti Aefeso ni Afilipi. Sambano Paulo akumsalila Timoteyo yakuti alembe kwa Aklistu acimjakwe ŵa ku Filipi.

Aklistu ŵa ku Filipi aŵele ali mkumlosya mnope Paulo cinonyelo. Jemanjaji ŵamtumicisye mtuka ku ukayidi kuno, sambano Paulo akwayamicila ligongo lya mtukawo. Epafulodito ni juŵayice nawo mtukawo. Nambo jwalakwe ŵalwasile mnope mwati ŵasigele panandi kuwa. Sambano jwalakwe akusimana cenene, soni akusaka kwawula kunyumba. Jwalakwe cajigale cikalata calembile Paulo ni Timoteyoci pakuwujila ku Filipi.

Pali mu ukayidi, Paulo akulembasoni yikalata yine yiŵili yayili m’Baibulo. Cikalata cimo cili ca Aklistu ŵa mumsinda wa Kolose. Ana akumanyilila lina lya cikalataci? Cili Akolose. Cikalata cine cili cakwawula kwa mjakwe jwapamtima jwakolanjikwa kuti Filimoni juŵatamagasoni ku Kolose. Cikalataci cikusala ya jwamasengo jwa Filimoni jwakolanjikwa kuti Onesimo.

Onesimo ŵatisile kwa Filimoni ni kwawula ku Loma. Yikuwoneka kuti Onesimo ŵayimanyi kuti Paulo ali mu ukayidi akuno. Jwalakwe ŵayice kukumlola, ni Paulo ŵamlalicile Onesimo. Mwangacelewa, Onesimo ŵaŵele Mklistu. Sambano Onesimo akulitendela canasa kuti ŵatisile. Ana sambano akumanyilila yakulemba Paulo m’cikalata kwa Filimoni?

Paulo akum’ŵenda Filimoni kuti amkululucile Onesimo. Jwalakwe akulemba kuti: ‘Ngumtumisyasoni jwalakwe kwa mmwejo, nambo jwalakwe nganaŵape jwamasengo jwenu. Alisoni Mklistu mjetu jwambone.’ Onesimo pakuwujila ku Kolose akujigala yikalata yiŵili yila, cimo cakwawula kwa Akolose, soni cine kwa Filimoni. Agambe kuganisya mwaŵaŵelele jwakusangalala Filimoni paŵayimanyi kuti jwamasengo jwakwe ali Mklistu.

Paulo pakwalembela Afilipi ni Filimoni, jwalakwe akwete ngani jambone. Akwasalila Afilipiwo kuti: ‘Ngumtumisya Timoteyo kwa jemanja. Nambo unesoni ciyice kweleko pacangakaŵapa.’ Filimoni akumlembela kuti: ‘Muninganyicisye malo gakutama kweleko.’

Paulo pagopwece mu ukayidi akwajendela Aklistu acimjakwe m’mikuli jakulekanganalekangana. Nambo kaneko Paulo akumtaŵasoni ukayidi ku Loma. Pandaŵiji jwalakwe akumanyilila kuti cam’wulaje. Sambano akumlembela cikalata Timoteyo cakum’ŵenda kuti ayice mwacitema. Paulo akulemba kuti: ‘Mbele jwakulupicika kwa Mlungu, soni Mlungu cacimba mbote.’ Yaka yakuŵalanjika Paulo ali am’wuleje, Aloma akonanga Yelusalemu.

Nambo m’Baibulo yipalisoni yindu yine. Yehofa Mlungu akumtuma Yohane kulemba mabuku gakumbesi, kupwatikapo buku ja Ciwunukuko. Buku ja m’Baibulo jeleji jikusala yam’bujo. Kwende tulijiganye yayicitendekwa m’bujoyi.