Historia 113

Pablu nuu Roma

BIIYAʼ ca cadena nuu náʼ Pablu, ne biiyaʼ soldadu romanu ni cayapa laabe ca. Pablu deguyoo Roma. Cabézabe gúʼyabe xi guni César romanu que laabe. Ra deguyoobe riʼ rudiicabe lugar chuʼ tu gueeda ganna laabe.

Chonna gubidxa despué de guyuu Pablu Roma la? laabe bisendacaabe ca xaíque stiʼ ca judíu para chiguuyacaʼ laabe. Nga runi stale de ca judíu de Roma que riecaʼ ra nuube. Pablu riniʼné laacabe de Jesús ne de reinu stiʼ Dios. Caadxi de laacabe runi crécabe ne rácacabe xpinni Cristu, peru xcaadxi que, qué runi crédicaʼ.

Pablu laaca riniʼné ca soldadu ni cayapa laabe. Lu guiropaʼ iza deguyoobe que, guníʼnebe cani gunda de Stiidxaʼ Dios. Dede ne cani nabeza ralidxi César gúnnacaʼ de ca diidxaʼ nacubi ne galán stiʼ Reinu riʼ, ne caadxi de laacabe rácacabe xpinni Cristu.

Peru, tuu nga yeganna laabe ne zuba xaʼnaʼ mexaʼ ne cucaa ca pue. Ñee nannuʼ tu laabe la? Laabe nga Timoteu. Laabe laaca bideguyoobe purtiʼ bicheechebe diidxaʼ de Reinu stiʼ Dios, peru yanna maʼ bireebe. Laabe zeeda gacanebe Pablu. Ñee nannuʼ xi cucaabe la? Guidúʼyanu.

Rietenalaʼdxuʼ de guidxi Filipos ne Efeso ni bieeteʼ lu historia 110 que la? Pablu gucané ca guidxi ca para chuʼ binni gaca xpinni Cristu ne guidagulisaacaʼ. Yanna ra deguyoobe riʼ la? Pablu rucaabe carta para ca binni riʼ. Ca carta ni láʼ Efesios ne Filipenses la? zeeda cani ndaaniʼ Biblia. Pablu rábibe Timoteu xi gucaa para ca xhamígucabe ni nuu Filipos.

Ca filipenses ca guizáʼ gúcacaʼ nachaʼhuiʼ ne Pablu. Biseendacabe ti regalu para laabe ra deguyoobe ca, nga runi cudiibe xquíxepeʼ laacaʼ. Epafrodito nga yené regalu ca. Laabe nabé guca huarabe dede yaca ñátibe. Yanna maʼ nuube galán sti biaje ne qué zandaa zabiguétabe xquídxibe. Laabe chinebe carta stiʼ Pablu ne Timoteu ora guibiguétabe Filipos.

Ndaaniʼ lidxi guiibaʼ que Pablu rucaa xhupa carta ni nápanu ndaaniʼ Biblia. Tobi que para ca xpinni Cristu ni nuu guidxi Colosas. Nannuʼ xi láʼ carta riʼ la? Lani Colosenses. Sti carta ca la? nga para ti xhamígube ni láʼ Filimón, de guidxi Colosas. Carta ca caníʼ de Onésimo, ti mozo stiʼ Filimón.

Onésimo bixooñebe de Filimón ne guyebe Roma. Laabe gúnnabe deguyoo Pablu raqué ne yegannabe laa, Pablu guniʼné laabe de Stiidxaʼ Dios. Qué nindaa diʼ gúcabe xpinni Cristu. Yanna raca arrepentirbe pur bixooñebe. Pur nga runi, nannuʼ xi rucaa Pablu lu carta ruseendabe ra nuu Filimón ca la?

Pablu rinábabe Filimón gutiidilaʼdxiʼ ni biʼniʼ Onésimo que. Cudxiguetaʼ laabe lii, na Pablu. Peru yanna maʼ cadi xmózosiluʼ laabe sínuque maʼ nácabe bíʼchiluʼ. Ora ribiguetaʼ Onésimo guidxi Colosas, rinebe guiropaʼ carta que, tobi para ca colosenses ne stobi para Filimón. ¡Guníʼ ique si pabiáʼ nayecheʼ guyuu Filimón ora gúnnabe de que Onésimo mozo stibe que maʼ naca xpinni Cristu cásica laabe!

Ora bicaa Pablu ra nuu ca filipenses ne ra nuu Filimón la? guizáʼ galán ca diidxaʼ bicaabe. Cuseendaʼ Timoteu ra nuutu na Pablu rabi ca filipenses. Peru qué zandaadiʼ laaca zigannaʼ laatu. Ne Filimón rábibe laa: Binichaahuiʼ ti lugar ra guiaanaʼ.

Ora riree Pablu la? rigánnabe ca bíʼchibe ni zinanda Cristu ni nabeza stale guidxi. Peru despué rideguyoo Pablu guidxi Roma sti biaje. Yanna maʼ nánnabe de que zuuticabe laabe. Nga runi, rucaabe ra nuu Timoteu para gueeda nagueenda. Qué nucheeniáʼ Dios nabe, ne laabe zudiibe naa ti premiu. Caadxi dxi despué de guti Pablu, Jerusalén rinitilú sti biaje, peru yanna maʼ ca romanu ca runi ni.

Peru ndaaniʼ Biblia cayeeteruʼ jma de ni guca riʼ. Jiobá rábibe apóstol Juan gucaa ca últimu libru stibe, tobi de laacani nga Apocalipsis. Libru riʼ caníʼ de ni chigaca lu ca dxi ni zeeda. Guidúʼyanu xi chigaca ca dxi chigueeda riʼ.

Hechos 28:16-31; Filipenses 1:13; 2:19-30; 4:18-23; Hebreos 13:23; Filemón 1-25; Colosenses 4:7-9; 2 Timoteo 4:7-9.