BIBIʼ caden ni noʼ yainyña Pablo, né láaca bibiʼ soldad ni cayap láabu. Pablo noʼbu press gudx Roma. Láabu cabésbu que César ni rony mandary Roma gann xí gony láabu. Laʼga noʼbu press, nitisi buñ labúu ridguen láabu.

Tzón govitz de goló bidxinbu Roma, Pablo ranab que tipnés buñguieeu ni rasanir nisló judíos guiedtixlóo láabu. Por ngú, xidal buñ judíos de gudx Roma rieed ronoʼbu. Pablo raniné layibu de Jesús né de Gobierno xtuny Dios. Tipnésyibu raluladx né racanalyibu Cristo, per stipnésyibu diti raluladx.

Pablo láaca raninébu xtiitz Dios xidal soldad ni rap láabu. Ló chop íz ni rioʼbu press lagary reʼ raninébu guirá buñ ni rigaʼlni láabu. Por ni bunybu guirá ndeʼ, hasta guirá xfamily César racadiag diitz sacró de Gobierno xtuny Dios, né tipnésyibu radxiin racanal Jesús.

Per ¿chú láabu ngú ni biedtixlóo a Pablo né sob roʼ mexh cacaʼ? ¿Nanlo chú láabu la? Scú láani, nacbu Timoteo. Láabu láaca goyoʼbu press portín goníbu de Gobierno xtuny Dios, per nigoreʼ ma diti noʼbu press. Bieedbu par gacnébu Pablo. ¿Nanlo xí racaʼbu la? Guibino guidoni.

¿Rasetnaladxlo gudx ni laa Filipos né Éfeso ni bíilno ló Historia 110 la? Pablo gocné goyaʼ congregaciones lagarycu. Nigoreʼ ni ma noʼbu press, Pablo raxelbu guiich ló guirá ni racanal Jesús ni rabés lagarycu. Guiich cú laani Efesios né Filipenses, guiropcani sieetni ló la Biblia. Pablo nigoreʼ cayaibybu Timoteo xí láani guicaʼbu ló guiich ni guixelbu par ximigyibu ni racanal Jesús ni noʼ gudx Filipos.

Guirá buñ filipenses nigolú buñtzay gocyibu né Pablo. Raxelyibu xidal galrrascad lainy press ronoʼ Pablo, por ngú raduidybu guixquix biinreʼ. Epafrodito ngú ni bitné galrrascad reʼ. Per láabu bixoʼgolúbu né mersi ñaitybu. Per nigoreʼ ma nasaʼcbu stoib né ma guibiguetbu xcudxbu. Láabu tzanébu xquiich Pablo né Timoteo gudx Filipos.

Lainy press, Pablo racaʼbu xchop guiich ni sieed ló la Biblia. Toibni par buñ ni racanal Cristo ni noʼ lainy gudx Colosas. ¿Nanlo ximod laani la? Laani Colosenses. Stoibni nac xquiich Pablo ni bixelbu nosi par ximigbu Filemón, ni rabés lainy gudx Colosas. Guiich reʼ rasetlani de Onésimo, toib xomós Filemón.

Onésimo bixonybu lidx Filemón né bidxinbu Roma. Láabu gonbu que Pablo noʼ press lagary reʼ. Né bieedbu biedtixlóbu Pablo, ór cú Pablo goniné láabu xtiitz Dios. Onésimo láaca ni maca gócbu buñ ni racanal Jesús. Nigoreʼ Onésimo rioʼobni láabu por ni bixonybu lidx Filemón. Por ngú, ¿nanlo xí racaʼ Pablo ló guiich ni caxelbu lóo Filemón la?

Pablo ranab lóo Filemón guituidy scásiʼ ni buny Onésimo. Né ló guiich ni raxelbu náni scareʼ: Radxiguet láabu ronoʼlo. Per nigoreʼ diti nosi nacbu xomóslo láaca ma nacbu xhermanlo, toib buñtzay. Órni Onésimo rabiguet Colosas, rinébu chop guiich reʼ, toibni par buñ colosenses né stoibni par Filemón. ¡Bunysi xpensarylo balaati bibaladx Filemón órni gonbu que xomósbu Onésimo, ma nac toib ni racanal Cristo xomod láabu!

Órni Pablo raxelbu guiich lóo filipenses né lóo Filemón, ló guiich reʼ sieed xidal diitz sacró. Pablo raiby a buñ filipenses: Caxela Timoteo ro nóoto. Per naʼ láaca mápa mer tzáguena lóoto. Né guiich ni raxelbu lóo Filemón ná: Biyopy toib lagary ro guiaʼana.

Órni Pablo rareʼ press, riebu riguenbu xiermanbu ni noʼ xidal lagary. Per diti xidzú ranásyibu né ragoʼyibu Pablo press lainy gudx Roma stoib. Nigoreʼ nambu que tzó ni guigaity láabu. Por ngú, racaʼbu guiich lóo Timoteo que guieed ni maca ronoʼbu. Pablo racaʼbu: Buni guirá ni ná Dios, né láabu saduidybu xiroʼ xilaaybu naʼ. Diti xidzú de goló goity Pablo, Jerusalén binitlóni stoib, per nigoreʼ buñ romanos binitló gudxcú.

Per ló la Biblia sieed más guiich. Jehová rony que Juan toib xpiin Jesús guicaʼ tipnés libros ro radopy la Biblia, toibticani laa Revelación. Ló libro reʼ raniʼ xí gac. Guisuidyno nigoreʼ ximod guiguaʼno ló dzú ni sietra.