Baibal nih a luan cia mi caan chung i a tlung mi a hmaan mi tuanbia lawng a chim lo, sihmanhsehlaw hmailei a tlung hnga mi kong zong a chim ve. Minung nihcun hmailei kong cu an chim kho lo. Cucaah Baibal cu Pathian sin in a ra mi a si ti kan hngalh. Hmailei kong ah Baibal nih zeidah a chim?

Pathian ral nganpi kong a chim. Hi raldohnak ah Pathian nih vawlei cu ṭhatlonak le mi ṭhalo vialte in a thenh lai. Sihmanhsehlaw amah a bia mi cu a khamh hna lai. Pathian thim mi siangpahrang, Jesuh Kri nih Pathian sal hna cu daihnak le lawmhnak a pek hna lai i, ahohmanh an zaw ṭhan ti lai lo i an thi ti lai lo.

Pathian nih vawlei cung ah paradise thar a tuah lai caah kan i lawmh ngaingai awk a si, a si lo maw? Sihmanhsehlaw hi paradis chung i nun kan duh ahcun zeimaw kan tuah awk a um. Hi cauk hmanung bik tuanbia ah, amah a bia mi hna caah Pathian nih a tuahpiak mi hna khuaruahhar thil hna hmuh awk ah zeidah kan tuahawk cu a si ti kan cawn te lai. Cucaah ṬHEN 8-nak hi rel law hmailei caah Baibal nih a chim chung mi cu zeidah an si ti kawl ve tuah u.