Mbivilia ndĩnenganae o ngewa sya maũndũ ala meekĩkie ĩvinda yĩla ĩvĩtũku me moka, ĩndĩ nĩtavanasya maũndũ ma ĩvinda yĩla yũkĩte o namo. Andũ maitonya kũelesya maũndũ ala mokĩte. Kĩu nĩkyo kĩtumaa tũmanya kana Mbivilia yumĩte kwa Ngai. Mbivilia yaasya ata ĩũlũ wa ĩvinda yĩla yũkĩte?

Ĩtavanasya ĩũlũ wa kaũ mũnene wa Ngai. Kaũnĩ ũsu Ngai akavetanga ũthũku w’onthe na andũ athũku kuma nthĩ, ĩndĩ akamavonokya ala mamũthũkũmaa. Yesũ Klĩsto, Mũsumbĩ ũla wiĩtwe nĩ Ngai, akaĩkĩĩthya kana athũkũmi ma Ngai mena mũuo na ũtanu, na kana maikawaa kana kũkw’a ĩngĩ nongi.

Nĩtũtonya kwĩthĩwa na ũtanu nũndũ Ngai akaseũvya valatiso nzaũ ĩũlũ wa nthĩ, kana tiw’o? Ĩndĩ no nginya twĩke ũndũ mũna ethĩwa tũkatũa nthĩnĩ wa valatiso ĩsu. Nthĩnĩ wa ngewa ya kũminĩa ya ĩvuku yĩĩ twĩĩmanyĩsya ũndũ twaĩlwe nĩ kwĩka nĩ kana tũtanĩe maũndũ maseo ala wiĩe andũ ala mamũthũkũmaa we. Kwoou soma KĨLUNGU kya 8 ũmanye kĩla Mbivilia yathanĩte ĩũlũ wa ĩvinda yĩla yũkĩte.