E Biblia siyiri thulha esyangano esy’ekwenene nyisa okwa byabanika omwa buthuku obulhabire aliriryo yikathasya thubwira okwa bikendi syabanika omughulhu ow’akasa. Abandu sibanga minyerera ebikendi syabya embere. Kyakikaleka ithwaminya thuthi e Biblia yalhua ewa Nyamuhanga. E Biblia yikabugha yithiki okwa mughulhu ow’akasa?

Yikakanaya okwa lhuhi lhunene olhwa Nyamuhanga. Omwa lhuhi olhu Nyamuhanga asyerya ekihugho kw’obubi bwosi n’abandu babi, aliriryo asyatheya abakamukolera. Omwami wa Nyamuhanga, ya Yesu Kristo, akendi syalhangira athi abaghombe ba Nyamuhanga batsemere obuholho n’eriyisalhaghanda, kandi athi sibendi syaswabya balhwere kutse eriholha.

Thwanganabya n’etseme kundi Nyamuhanga akendi syakolha eparadiso nyihya-nyihya okwa kihugho, kwabithe? Aliriryo hane ekya thutholere ithwakolha thwamabya b’er’ikalha omwa paradiso eyi. Omwa lhughano lhw’erighunzerera olhw’ekitabu, thuk’igha ekya thutholere ithwakolha erisyabana ebindu bibuya ebya Nyamuhanga abiritheghekera abo abakamukolera. Neryo wusome EKITSWEKA 8 wangaminya ebya Biblia yikalhaghulha okwa mughulhu ow’akasa.