Kipungu 8
Byaambila Jimo Baibolo Bifikizhiwa
Baibolo kechi ubulañanatu bintu bya kine byamwekele kunyuma ne, bino witubula ne bikamweka kulutwe na lwendo. Bantu kechi bakonsha kwamba bikamweka kulutwe ne. O ene mambo o twayukila’mba Baibolo wafuma kwi Lesa. Nga Baibolo waambapo’mba ka pa kimye kya kulutwe?
Witubula pa nkondo ikatampe ya Lesa. Mu ino nkondo Lesa ukawamisha ntanda yatama, kufumyapo bantu batama, ne kuzhikijila boba bamwingijila. Mfumu watongolwa na Lesa, aye Yesu Kilishitu, ukamona’mba bantu ba Lesa babena kwikala mu mutende ne lusekelo, ne kuba’mba kechi bakabelapo jikwabo nangwa kufwa ne.
Twafwainwa kusangalala bingi pa kuyuka amba Lesa ukaleta paladisa mupya panopantanda, kechi ibyo nenyi? Bino twafwainwa kubapo kintu kimo umvwe tukeba kukekala mu uno paladisa. Mu kino kipungu kyapelako mu uno buku tufundamo kyo twafwainwa kuba pa kuba’mba tukeyowenga bintu byawamisha Lesa byo alamina boba bamwingijila. Onkao mambo tanga KIPUNGU 8 ne kutana Baibolo byo aambila jimo bintu bikamweka kulutwe.
BIJI MU KINO KIPUNGU
JISHIMIKILA 114
Mpelo kya Bintu Byonse Byatama
Mambo ka Lesa o akatumina Yesu kuya na kulwa nkondo ya Amagedonyi ?
JISHIMIKILA 115
Paladisa Mupya Pano pa Ntanda
Bantu baikalanga mu paladisa pano pa ntanda, kabiji kino kikobiwa jibiji.
JISHIMIKILA 116
Byo Twakonsha Kwikala Myaka ne Myaka
Nanchi muntu wafwainwa kupelelatu pa kuyuka Yehoba ne Yesu Kilishitu kwapwa nyi? Inge ine, kika kikwabo kikebewa kuba muntu?