Ne nakai talahau ni he Tohi Tapu e tala mooli ke he tau mena ne tutupu i tuai ka e talahau foki e tau mena ka tutupu he vahā anoiha. Nakai maeke e tau tagata ke iloa e vahā anoiha. Ko e kakano haia ati iloa e tautolu na mai he Atua e Tohi Tapu. Ko e heigoa e talahauaga he Tohi Tapu hagaao ke he vahā anoiha?

Kua talahau ai hagaao ke he tauaga lahi he Atua. He tauaga nei to fakameā he Atua e lalolagi mai he tau mena kelea oti kana mo e tau tagata kelea, ka e puipui e ia a lautolu kua fekafekau ki a ia. Ko e patuiki he Atua ko Iesu Keriso, to eketaha ke moua he tau fekafekau he Atua e mafola mo e fiafia, mo e to nakai liu a lautolu ke gagao po ke mamate.

Maeke ia tautolu ke fiafia to taute he Atua e parataiso foou he lalolagi, pihia nakai a tautolu? Ka kua latatonu ia tautolu ke taute taha mena ka manako a tautolu ke nonofo he parataiso nei. He tala fakahiku he tohi to fakaako a tautolu ke he tau mena kua lata ia tautolu ke taute ke fiafia ke he tau mena ofoofogia nukua fakatoka he Atua ma lautolu kua fekafekau ki a ia. Ti totou ā e VALA 8 mo e kumikumi e tau mena kua talahau tuai he Tohi Tapu ma e vahā anoiha.