Bible hem no story nomoa abaotem trufala samting wea happen bifor bat hem talem samting wea bae happen long future tu. Olketa man kanduit for talem samting wea bae happen long future. Dastawe iumi savve Bible hem kam from God. Wanem nao Bible talem abaotem future?

Hem story abaotem wanfala big war bilong God. Long disfala war God bae finisim evri nogud samting and nogud pipol, bat hem bae protectim olketa wea servem hem. King bilong God, Jesus Christ, bae mek sure olketa servant bilong God enjoyim peace and hapi living, and olketa bae nating sik or dae moa.

Iumi hapi from God bae mekem wanfala niu paradaes long earth, iaman? Bat iumi mas duim samting sapos iumi laek for stap insaed long disfala paradaes. Long lastfala story bilong disfala buk, iumi bae lanem samting wea iumi mas duim for enjoyim olketa nambawan samting wea God redyim for olketa wea servem hem. So readim PART 8 and faendemaot wanem nao Bible sei bae happen long future.