TUANGA 8
Ka Tupu ta te Pipiria e Totou Maira
Te oronga maira te Pipiria i te tua tika no tei tupu i te tuatau i topa e te akakite katoa maira i te ka tupu i te tuatau ki mua. Kare e rauka i te tangata i te akakite mai i te tuatau ki mua. No reira tatou i kite ei e no ko mai te Pipiria i te Atua. Eaa ta te Pipiria e akakite maira no te tuatau ki mua?
Te akakite maira te reira i te tamaki maata a te Atua. I roto i teia tamaki ka tama te Atua i te enua i te au kino pouroa e te au tangata kino, inara ka paruru aia i te aronga e tavini ra iaia. Na te ariki o te Atua ko Iesu Karaiti e akapapu e ka rauka i te au tavini o te Atua te au e te mataora, e kia kore roa ratou e maki akaou me kore e mate.
Ka mataora tatou e ka maani te Atua i tetai parataito ou i runga i te enua, me kare ainei? Inara ka anoanoia tatou kia rave i tetai apinga me ka noo tatou ki roto i teia parataito. I roto i te tua openga o te puka ka kite mai tatou e eaa ta tatou ka rave kia mataora i te au apinga meitaki ta te Atua i akanoo no te aronga e tavini ra iaia. No reira e tatau i te TUANGA 8 kia kite mai e eaa ta te Pipiria e totou ra no te tuatau ki mua.
I ROTO I TEIA TUANGA
TUA 114
Te Openga o te Kino Pouroa
No teaa ra te Atua ka tono ia Iesu ei arataki i te nuku vaeau ki te tamaki o Aramakito?
TUA 115
Parataito Ou i Runga i te Enua
I noo ana te tangata i roto i te enua parataito, e ka tupu akaou te reira.
TUA 116
Akapeea Tatou me Ora e Mutu Kore ua Atu
Ka rava ua ainei kia kite no runga te Atua ko Iehova e Iesu Mesia? Me kare, eaa atu tei anoanoia?