‘Oku ‘ikai ke ngata pē ‘i hono ‘omai ‘e he Tohitapú ‘a e talanoa mo‘oni ‘o e me‘a na‘e hoko ‘i he kuo hilí ka ‘okú ne toe tala mo e me‘a ‘e hoko ‘i he kaha‘ú. He‘ikai malava ‘e he fa‘ahinga ‘o e tangatá ke tala ‘a e kaha‘ú. Ko e ‘uhinga ia ‘oku tau ‘ilo ai ‘oku mei he ‘Otuá ‘a e Tohitapú. Ko e hā ‘a e lau ‘a e Tohitapú ‘o kau ki he kaha‘ú?

‘Oku lave ‘o fekau‘aki mo e tau lahi ‘a e ‘Otuá. ‘I he tau ko ‘ení ‘e fakama‘a ai ‘e he ‘Otuá mei he māmaní ‘a e kovi kotoa pē mo e kakai koví, ka te ne malu‘i ‘a e fa‘ahinga ‘oku nau tauhi kiate iá. Ko e Tu‘i ‘a e ‘Otuá, ko Sīsū Kalaisi, te ne fakapapau‘i ‘e ma‘u ‘e he kau sevāniti ‘a e ‘Otuá ‘a e melino mo e fiefia, pea ‘e ‘ikai ‘aupito te nau toe puke pe mate.

‘Oku tau fiefia ‘e ngaohi ‘e he ‘Otuá ha palataisi fo‘ou ‘i he māmaní, ‘ikai ko ia? Ka kuo pau ke tau fai ha me‘a ‘o kapau te tau fie nofo ‘i he palataisi ko ‘ení. ‘I he talanoa faka‘osi ‘o e tohí ni te tau ako ai ki he me‘a kuo pau ke tau fai kae ma‘u ‘a e ngaahi me‘a fakaofo kuo tuku tauhi ‘e he ‘Otuá ma‘á e kakai ‘oku tauhi kiate iá. Ko ia lau ‘a e KONGA 8 pea ke ‘ilo ai ‘a e ngaahi me‘a ‘oku kikite‘i ‘e he Tohitapú ki he kaha‘ú.