Ja Biblia mi kechanta wa xyala sbʼaja jas ekʼtaʼi, chomajkil wa xyala sbʼaja jastik oj ekʼuk ja bʼa tyempo jakumtoʼi. Ja ixuk winiki mi xbʼobʼ yal-e wa snaʼawe ja jasa ojto ekʼuk ja bʼa tyempo jakumtoʼi, ja yuj wa xnaʼatik ja Biblia tini jakel bʼa Dyosa. ¿Jasa wa xyala ja Biblia sbʼaja jas jakumtoʼi?

Wa xyala sbʼa jun niwan kʼakʼanel bʼa Dyos. Ja bʼa kʼakʼanel it, ja Dyos ojni skus ja jastik mi lekuk wan ekʼel ja bʼa Luʼumi soka ixuk winik mi lekukeʼi, pe ojni skoltay ja matik wa x-aʼteltajiyuji. Ja mandaranum stsaʼunej ja Dyosi, ja Jesukristo, yeʼnani oj skʼel ja yaʼtijum Dyosi bʼa aʼajyuke gusto lek sok laman, bʼa mini oj koʼuke chamel sok bʼa mi oj chamuke.

¿Anke jelni tsamal yabʼjel ja Dyosi oj skʼul jun tsamal kʼachinubʼ ja bʼa Luʼumi? Pe ayni jas oj jkʼuluktik bʼa oj ajyukotik sakʼan bʼa tolabida ja bʼa kʼachinubʼ it. Ja bʼa tsaʼanxta loʼil yiʼojan ja juʼun it wa xnebʼatik ja jasa oj jkʼuluktik bʼa oj kabʼtik stsamalil ja jasa skʼapunej ja Dyos sbʼaja matik wa x-aʼteltajiyuji. Ja yuj, kʼuman ja XETʼAN 8 sok nebʼa stojolil ja jasa wa xyala ja Biblia sbʼaja tyempo jakumto.