Te Biblia ma jaʼuknax ya yalbey skʼoplal te bin smelelil kʼot ta pasel ta nameye, jaʼnix jich ya yal te bin yato xkʼot ta pasel ta pajel chaʼbeje. Te ants winiketike ma xjuʼ yuʼunik snaʼel te bin yato xkʼot ta pasele. Jaʼ yuʼun te bin ya yal te Bibliae jnaʼojtik te talem ta stojol te Diose. ¿Bin ya yal te Biblia ta swenta te bin yato xkʼot ta pasel ta pajel chaʼbeje?

Ya yalbey skʼoplal ta swenta te mukʼul guerra yuʼun te Diose. Ta guerra ini, te Dios yame slajin spisil te chopolile soknix te chopol ants winiketik ta Balumilale, jaʼukmeto yame skoltay stukel te machʼatik yakʼoj sbaik ta abatinel ta stojole. Te Jesucristo te ajwalil tsabil yuʼun te Diose, jaʼme ya yil stukel te ya smulambeyik yutsil te lamal kʼinal sok te tseʼel oʼtanil te j-abatetik yuʼun te Diose, sok te maʼyuk bin ora ya stsakotikix ta chamel sok te maba ya xlajikixe.

¿Mabal jichuk te tseʼelnax koʼtantik yuʼun te bitʼil ya schaʼpas ta yachʼil nichimal kʼinal te Dios te Balumilale? Jaʼukmeto ay bin ya skʼan ya jpastik teme ya jkʼantik ya xkuxinotik ta nichimal kʼinal ini. Ta slajibal aʼyej yuʼun te libro ini yame jnoptik te bin ya skʼan ya jpastik yuʼun jich ya jmulantik-a te bintik chajpnax ya yakʼ te Dios ta stojol te machʼatik yakʼoj sbaik ta abatinel ta stojole. Jaʼ yuʼun kʼopona te SWAXAKEBAL PARTE sok ilawil te bin ya yal te Biblia ta swenta te bin yato xkʼot ta pasel ta pajel chaʼbeje.