ANO ining nahihiling mo? Sarong hukbo nin mga nakakabayo! Hilinga kun sain sinda hali. Nagdadaralagan an mga kabayo pababa hali sa mga panganuron sa langit! May mga kabayo daw talaga sa langit?

Mayo. Bako ining tunay na mga kabayo. Dai man baga nakakadalagan sa panganuron an kabayo. Pero sa Bibliya, talagang may sinambit na mga kabayo sa langit. Aram mo kun ta’no?

Pirmi kaya kaidtong ginagamit sa ralaban an mga kabayo. Kaya, sinambit sa Bibliya na may mga parakabayo hali sa langit ’nganing ipahiling na makikigiyera an Diyos sa mga tawo sa daga. Aram mo daw kun ano an apod sa giyerang ini? Armagedon. Iyan an matapos kan gabos na maraot sa daga.

Si Jesus an manginginot sa ralaban na ini. Tandaan, siya an pinili ni Jehova na magin hadi kan gobyerno Niya. Iyan an dahilan kaya may korona si Jesus. May espada man siya huli ta gagadanon niya an gabos na kaiwal nin Diyos. Dapat ta daw ipagngalas na uubuson nin Diyos an mararaot na tawo?

Balikan mo an Istorya 10. Ano an nahihiling mo? Iyo, an dakulang Baha na uminubos kan mararaot na tawo. Si’say an nagpabaha? Si Jehova. Hilinga man an Istorya 15. Ano an nangyari diyan? Napara an Sodoma asin Gomora paagi sa kalayo hali ki Jehova.

Balikan mo an Istorya 33. Hilinga an nangyayari sa mga kabayo asin karwahe kan mga Ehipsiyo. Si’say an nagpabagsak kan tubig sainda? Si Jehova. Ginibo niya iyan para proteksiyunan an banwaan niya. Buklata sa Istorya 36 asin 76. Mahihiling mo na tinugutan pa ngani ni Jehova na mapahamak an mga Israelita huli sa maraot nindang gibo.

Kaya, dai kita magngalas na isusugo ni Jehova an mga hukbo niya sa langit tanganing tapuson an gabos na maraot sa daga. Pero isip-isipa an magigin kamugtakan pag nangyari na iyan! Buklaton mo sa sunod na pahina ’nganing maisihan ta.