I ƝƐƐ be mun lo la yan? Kɛlɛdenw lo, u siginin be soo gwɛmanw kan. Nka a filɛ, u bɔra yɔrɔ min na. U be soow bolila ka jigi ka bɔ sankolo la! Nka, soow be sankolo la tiɲɛn tiɲɛn na wa?

Ayi, sabu soow tɛ se ka boli sankabaw kan. Tiɲɛn tɛ? Nka, Bibulu kɔnɔ u be soow kofɔ sankolo la. I b’a lɔn fɛɛn min kama wa?

Galen, u tun be kɛlɛ kɛ ni soow ye. Bibulu kɛtɔ k’a fɔ ko kɛlɛdenw be soow bolila ka jigi ka bɔ sankolo la, a b’a fɛ k’a yira ko Ala bena kɛlɛ dɔ lawuli adamadenw kama dugukolo kan. O kɛlɛ bena kɛ yɔrɔ min na, i b’o yɔrɔ tɔgɔ lɔn wa? A be weele ko Arimagedɔn. O kɛlɛ kɛkun ye ka juguya bɛɛ ban dugukolo kan.

Yezu lo bena o Arimagedɔn kɛlɛ ɲɛminɛ. Kana ɲinɛ ko Jehova ye Yezu lo kɛ a ka gofɛrɛnɛman kuntigi ye. O lo kama masafugulan b’a kuun na. Murujan min b’a bolo, o b’a yira ko a bena Ala ka juguw bɛɛ halaki. Yala o koo ka kan ka bari an na wa?

Segi ka maana 10nan ka jaa lajɛ. I ɲɛɛ be mun lo la o yɔrɔ la? Sanjiba min ye mɔgɔjuguw halaki. Jɔn lo tun y’a kɛ o sanjiba benna? Jehova Ala lo. Maana 15nan ka jaa lajɛ sisan. Mun lo be kɛra yen? Jehova ka tasuma be Sodɔmu ni Gɔmɔri duguw halakira.

Maana 33nan ka jaa lajɛ. A filɛ min be kɛra Misirakaw ka soow n’u ka kɛlɛkɛ wotorow la. Jɔn lo y’a kɛ jii karila u kan? Jehova lo. A y’o kɛ walisa k’a ka jama tanga. Maana 76nan ka jaa lajɛ. I ɲɛɛ b’a la ko Jehova y’a to ale yɛrɛ ka jama, Israɛldenw, ka halaki u ka juguya kosɔn.

O la do, a man kan ka bari an na k’a mɛn ko Jehova bena a ka kɛlɛbolow ci ka bɔ sankolo la ka na juguya bɛɛ ban dugukolo kan. I ka miiri ka filɛ o bena kɛ min ye! An k’o filɛ gafe ɲɛɛ nata kan.