NSO ke afo okụt mi? Ih, udịm ekọn̄ ke mfia horse. Edi tịm fiọk ebiet mmọ ẹtode. Mme horse oro ke ẹfrọ ẹto heaven ke ntọn̄enyọn̄! Nte mme horse ẹnen̄ede ẹdu ke heaven?

Baba, mmọ emi idịghe ata mme horse. Nnyịn ifiọk emi koro mme horse ikemeke ndifehe ke ntọn̄enyọn̄, nte ẹkeme? Edi Bible etịn̄ aban̄a mme horse ke heaven. Nte ọmọfiọk ntak enye etịn̄de?

Edi koro ini kiet ko, ẹkeda mme horse ẹn̄wana mme ekọn̄. Ntre Bible etịn̄ aban̄a mme owo ẹwatde mme horse ẹto heaven ndiwụt nte Abasi enyene ẹkọn̄ ndin̄wana ye mme owo ke isọn̄. Nte ọmọfiọk se ẹkotde ebiet ẹkọn̄ emi? Armageddon. Ekọn̄ oro eyesobo kpukpru idiọk ido ke isọn̄.

Jesus edida iso ke ndin̄wana ekọn̄ emi ke Armageddon. Ti, Jesus edi kiet emi Jehovah ẹmekde ndidi edidem ukara Esie. Oro edi ntak Jesus ayarade uyaribuot edidem. Ndien ofụt oro owụt ete enye eyewot kpukpru mme asua Abasi. Nte nnyịn ikpodu ke n̄kpaidem nte Abasi eyesobo kpukpru mme idiọk owo?

Fiak se Mbụk 10. Nso ke afo okụt do? Ih, akwa Ukwọ oro okosobode mme idiọk owo. Anie akanam Ukwọ oro? Jehovah Abasi. Ke emi se Mbụk 15. Nso itịbe do? Ke ẹsobo Sodom ye Go·morʹrah ke ikan̄ oro Jehovah ọkọdọn̄de.

Kụbọde ka Mbụk 33. Se se itịbede inọ mme horse ye mme chariot mbon Egypt. Anie akanam mmọn̄ edi editọ emen mmọ? Jehovah. Enye akanam oro ndikpeme ikọt esie. Sese Mbụk 76. Afo eyekụt ete ke Jehovah ama ayak idem ikot esie, nditọ Israel ẹkụt nsobo ke ntak idiọk ido mmọ.

Ntre ndien, idem ikpakpaha nnyịn nte Jehovah eyedọn̄ mme udịm ekọn̄ esie eke heaven ndida utịt nsọk kpukpru idiọk ido ke isọn̄. Edi kam kere se oro ediwọrọde! Kụbọde page yak ise.