MBAʼÉPA rehecha koʼápe? Upéicha, peteĩ ehérsito oúva heta kavaju morotĩ ári. Péro ehechami moõguipa ou hikuái. Umi kavaju ogalopea oúvo arai rehe yvágagui! Oĩnepa yvágape kavaju?

Nahániri, umíva ndahaʼéi kavaju añetegua. Upéva jaikuaa pórke kavajukuéra ndaikatúi ogalopea arai rehe, ajépa? Péro la Biblia heʼi oĩha kavaju yvágape. Ndépa reikuaa mbaʼérepa?

Pórke yma ojeporuvaʼekue kavajukuéra oñeñorairõ hag̃ua gerrahápe. Upévare la Biblia heʼi oĩha heta persóna oguejýva yvágagui kavaju ári, ohechauka hag̃ua Ñandejára oguerekoha peteĩ gérra yvyporakuéra ndive. Moõpa oikóta upéva? Armagedónpe, ha ohundipáta opaichagua mbaʼe vai oĩva Yvy ape ári.

Jesús omoakãta pe ñorairõ oikótava Armagedónpe. Nemanduʼáne Jehová oiporavohague Jesúspe haʼe hag̃ua rréi Igoviérnope. Upévare Jesús oguereko iñakãre peteĩ koróna. Ha pe espáda ohechauka ojukapataha Ñandejára enemigokuérape. Jahecharamovaʼerãpa Ñandejára ohunditaha umi hénte añáme?

Ehekami pe Istória 10. Mbaʼépa rehecha upépe? Pe Dilúvio guasu ohundipavaʼekue hénte añáme. Mávapa oguerurakaʼe upe Dilúvio? Ñandejára Jehová. Koʼág̃a emañami pe Istória 15 rehe. Mbaʼépa oikohína upépe? Jehová ohundi tata rupive Sodoma ha Gomórrape.

Ehechami pe Istória 33. Emaña mbaʼépa ojehuhína umi ehípsio kavaju ha kárro de gérra rehe. Mávapa ombou hiʼarikuéra pe y? Jehová. Ojapo upéva oñangareko hag̃ua ipuévlore. Ehekami pe Istória 76. Upépe rehecháta Jehová ohejahague ipuévlo jepe oñehundi hembiapo vaígui.

Upévare, ndajahecharamoivaʼerã Jehová ombou jey vove ijehersitokuéra yvágagui oipeʼapa hag̃ua opa mbaʼe vai Yvy ape árigui. Mbaʼépa oikóta upe rire? Ehasa pe ótra páhinape ha jahechami.