EME whọ jọ etenẹ ruẹ? Ẹhẹ, ogbaẹmo evaọ ehru enyenya efuafo. Rekọ muẹrohọ obonọ i bi nọze. Enyenya na isiawọ notọ bi no ehru ze otọ evaọ ẹgho! Enyenya eghinẹ rọ obọ odhiwu?

Ijo, enana emamọ enyenya ha. Ma riẹ onana keme enyenya erẹ sae dhẹ ohrẹ evaọ ẹgho ho, erẹ sae dhẹ? Rekọ Ebaibol eta ẹme te enyenya evaọ obọ odhiwu. Kọ whọ riẹ onọ osoriẹ nọ ejẹ ta ere?

Whaọ fiki nọ oke jọ a jẹ rehọ enyenya ruiruo gaga evaọ emo ifio. Fiki oye Ebaibol e jẹ ta kpahe ahwo nọ a be dhẹ enyenya no ehru ze otọ ro dhesẹ nọ Ọghẹnẹ o wo ẹmo nọ o bi ti lele ahwo otọakpọ na fiẹ. Kọ whọ riẹ epanọ a re se oria ẹmo ọnana? Amagẹdon. Ẹmo ọyena ọ te raha eyoma kpobi nọ ọrọ otọakpọ na.

Jesu họ Ọnọ ọ te k’obaro ẹmo ọnana ofio evaọ Amagẹdon. Kareghẹhọ nnọ, Jesu họ ọnọ Jihova ọ hae re ọjọ ovie ọ rọ isuẹsu Riẹ. Fiki oye Jesu ọ jẹ rehọ etu uvie tuwu. Ọgbọdọ na o te dhesẹ nọ o re ti kpe ewegrẹ Ọghẹnẹ kpobi no. Kọ u re gbe omai unu nnọ Ọghẹnẹ o re ti kpe ahwo oyoma kpobi no?

Riri kpemu kpohọ Ikuigbe Avọ 10. Eme whọ jẹ etẹ ruẹ? Ẹhẹ, Ẹvo ologbo nọ o kpe ahwo oyoma no. Ono ọ rehọ Ẹvo ọyena ze? Jihova Ọghẹnẹ. Who je ri Ikuigbe Avọ 15. Eme ọrọ etẹ via? Errae nọ Jihova o vi ze eye ebe mahe Sọdọm gbe Gomora na.

Rovie kpohọ Ikuigbe Avọ 33. Rri oware nọ o be via kẹ enyenya gbe ekẹkẹ ẹmo Ahwo-Ijipti. Ono oru ame hrẹ ze brae yao otọ? Jihova. O rue’i rọ thọ ahwo riẹ. Riri Ikuigbe Avọ 76. Whọ te jọ etẹ ruẹ nnọ Jihova o siobọ no Ahwo-Izrẹl, makọ arọ ahwo riẹ, re a kpai no fiki umuomu rai.

Fikiere, u re gbe omai unu hu inọ Jihova o re ti vi ogbaẹmo odhiwu riẹ re a rehọ umuomu otọakpọ na kpobi te oba. Rekọ dai roro epanọ oyena orẹ te jọ! Rovie ẹwẹ obe na re ma ruẹ.