Taggara n cceṛ
TAQSIṬ TIS 114
Taggara n cceṛ
ACU akka i teţwaliḍ dagi? D lɛeskeṛ ɣef iɛawdiwen imellalen. Teẓriḍ ansi i d-kkan? Seg igenni! Atnan la d-ţṣubbun s tazzla ɣef usigna! Ɣef usigna? Eɛni llan iɛawdiwen deg igenni?
Xaṭi, ulac. Iɛawdiwen-agi i teţwaliḍ mačči d iɛawdiwen n ṣṣeḥ axaṭer iɛawdiwen ur zmiren ara ad azzlen ɣef usigna. Xas akken, Adlis Iqedsen iţmeslay-ed ɣef iɛawdiwen deg igenni. Teẓriḍ acimi?
Axaṭer zik-nni lɛibad ssexdamen iɛawdiwen i lgirra. Imi i d-iheddeṛ ihi Wedlis Iqedsen ɣef iɛawdiwen d yemnayen i d-iţṣubbun seg igenni, annect-a ibeggen-ed belli Ṛebbi ad ixdem lgirra neţţa d yemdanen yellan ɣef lqaɛa. Tessneḍ isem n wemkan anda ara teḍru lgirra-yagi? Isem-is Harmagidun. Lfetna-yagi aţ-ţekkes cceṛ meṛṛa yellan ɣef lqaɛa.
D Ɛisa ara yezwiren zdat n lɛeskeṛ-is deg umenɣi-yagi n Harmagidun. Tecfiḍ? D Ɛisa i gextaṛ Yahwa akken ad yuɣal d Agellid n lḥukuma-s. Ɣef waya i gelsa taɛeṣṣabt ɣef uqerruy-is. Ma d isekkin-agi (ssif-agi) i geṭṭef ibeggen-ed belli ad issenger akk ixṣimen n Ṛebbi. Twehmeḍ imi yeqsed Ṛebbi ad issenger imcumen meṛṛa?
Muqel taqsiṭ tis 10. Acu akka i teţwaliḍ dagi? D aḥemmal-nni ameqran n waman i gessengren akk imcumen. Anwa i d-isseɣlin aḥemmal-agi? D Yahwa Ṛebbi. Tura, muqel taqsiṭ tis 15. Tecfiḍ d acu yeḍran dagi? Timdinin n Sudum akk-d Gumur ţwanegrent s tmes i d-iceggeɛ Yahwa.
Ṛuḥ tura ɣer teqsiṭ tis 33. Twalaḍ amek i teḍra d iɛawdiwen akk-d ikeṛṛusen n lɛeskeṛ n Imaṣriyen? Anwa i d-yesseɣlin aman-agi fell-asen? D Yahwa. Ixdem annect-a iwakken ad isellek agdud-is. Muqel tura tis 76. Yahwa yeǧǧa At Isṛayil yellan d agdud-is, ad ţwanegren ɣef ddemma n cceṛ akk i xedmen.
Annect-a ibeggen-ed ihi belli ur ilaq ara a newhem imi yeqsed Yahwa a d-iceggeɛ lɛeskeṛ-is n igenwan akken ad ikkes ccum meṛṛa yellan ɣef lqaɛa. Teẓriḍ d acu yezmer akk a d-yawi wannect-a? D ayen ara nwali di teqsiṭ i d-iteddun.